Read Kahua AITANGISIHA 8 Bible Online

AITANGISIHA 8 - Kahua bible

AITANGISIHA 8

¹Na raramohana raha ki marungigi ma ki hagaotogi na ara ni marâ hato i maveta.

²Inê kê takuia na takoha mataha. Inê kê bani rapasia me matena gê karekare mênga. Inê kê obania vigê auragia. Na bâkorohana ki oga i na aitangihaku.

³Ngaia ki ageagesia vi ngaia ki râ me tenia God, suria i oga i pasina God, i marungira na ara ni marâ hato ma ki takuia.

⁴Ngaia ki aitangisigi maninga na takoha iana God ma ki tagara haku henia God igê na tagaraha iana.

⁵Manga vi na ruruguha ka na marâ i koro tanga viga nahunia igê na ogaha i ngekê, na ani ta na ruruguha kani raha teharia na takoha mataha i tagara i na ara ni agua hato?

⁶Manga vi na giraraha ka na marâ i koro tanga viga nahunia tanga na tagaraha, ti kani girara teharia na takoha mataha i hagavoregi na ara ni marâ hato?

⁷Manga go takuigi na tarani ga oto, na korohamu hato ka na guani na tagaraha iana na takoha mataha. Ngaia ki hagesurigo hanana go ototo surigo maremu, ko hagatogo surigo maremu, ko ototo ma ko pe rumakaka. Na tarani ngegana ma tani râ nikâ ka raha ngavê tanga na ogaha iaka teharigi na ani mavê na marâ.

⁸Manga go obania vigo aitangisigi maninga na mani marâ, na takoha mataha nga kani bani giraragi na bani tarani ma na tarani ga page voravora me. Ngaia ki girara i ramatenigi na tamasinga ga barabara ma ki girara i aramigi na hagahiana. Ngaia ki bani giraragi na giraraha ma na mena ma hemuri ka kahu voravora me, ma ki bani girara vi manga i he ka na matena ma na bevoani ka page arâ i muri me.

⁹Tahema inê kê tako vigê torea na takoha mataha i pasiku hanana i gâga heniê, suria gê girara, vi ngaia ki page hagaotoê ma ki page kanukanuê igê na anumanumaha ma na obaeraha iaku.

¹⁰Inê kê tako kê vi: Renia ngaia nga tahema na enoni ka page hagahigasiê, matena ga hakuhaku. Na bani nuni ka page hanetasiê, henaka vi inê ka na enoni haoru.

¹¹Ngaira ka page tahetara, vi na takoha iaku ka hagabêngenia na aitangisiha, ma na ani ga nahuni ramoha ka page koneteniê.

¹²Matena gê munimuni, ngaira ka page naasiê vigê tamasi ma na matena gê tamasi, ngaira ka page karinga maninga. Henaka inê kê tamasi arihu, ma ngaira ka page karinga hahutogo.

¹³Renia na takoha mataha nga, tahema inê ki asa vi ve me, suria na enoni i muriku me ka page takusiê tare ki bê ki arâ.

¹⁴Inê kê page marungira na agua ma na agua ka page gâga i ruguhaku.

¹⁵Na maneraha ga raramo hagatare ka page bubununuga, matena ga rongorongo tarohaku. Ki page rongo raha na ataku, suria inê ka na maneraha gê koro tangara na enoni ma kê ramoramo igê na hearihatana.

¹⁶Matena gê aporo i pasiku tanga na takoha mataha, inê kê page obakoro i pasina, suria na ogaha henia ki mareha rârâ vi na hekorekoreana se vi na mamasiaganiha, nga noga ma na vagevageha ma na obakoroha.

¹⁷Inê kê tako, vigê auragia na takoha mataha hanana i asa vi ve page me

¹⁸vigê takuia hanana vigê obâbakoro teha ngavê, vigê katogi na tagaraha iana hanana vigê ruruguha teha ngavê, vigê tari suria hanana vigê nahuni aitangisiha mataha, vigê metamasi hanana vi na hagarahasiha tangê. I murina gê bani tako renigi na tarani ngegana, inê kê tako hagetage vigê auragia na takoha mataha.

¹⁹Inê kê bani bâ ni vagevageha me, matena gê karekare mênga. Inê kê babarisi, suria ga haganahuniê renia na ataroku i koro,

²⁰se hete ga haganahuniê renia na apeku i apekoro, hanana gê gâga igê, suria gê bani koro.

²¹Henaka vikana, inê kê tahetara, vi i asa be nahunia na takoha mataha, manga vi God ma ki pe vateê renia. Na giraraha renia vi ngaia ma God kani girara i vateê renia, ngaia nga ka na aitangisiha nikâ. Vikê inê kê aharia na Araha ma kê nungia nga i mêrihaku hagenani, kê vi: