Read Kahua AITANGISIHA 9 Bible Online

AITANGISIHA 9 - Kahua bible

AITANGISIHA 9

¹“God iata na êvariku, Araha ni takiha, igo ko tamasi ma, ma ka vora me na ara ni marâ hato.

²Ma renia na takoha mataha iamu igo ko hagavorara na enoni, hanana ga marungira na ara ni marâ hato, go bani hagavorara,

³hanana ga hagaotoa ma ka suria na maveta igê na tarani ga koro ma ka oto i maamu.

⁴Gu haganahuniê renia na takoha mataha i oga ngahisia na atohamu. Gu nakê be vora re na hitangita na karemu.

⁵Inê ka na kariamu manga kenaku. Inê ka na enoni ma. Inê kê makumakusiga. Na mêriha iaku ki page abubu ma. Inê kê girara râ sisite ma na ramata se na ta ki oto tanga vi gê katoa.

⁶Naka ma na enoni i koro teha ngavê igê na ara ni tarani ma ki pe nahunia na takoha mataha i râ me tenigo, ga vi ma vi ngaia ka na marâ purua mênga.

⁷Igo ko ateê, mareha vi tani râ nikâ, hanana gê maneraha iata na kariamu maremu ma hanana gê surira o karemu ma ka karemu.

⁸Igo ko bonasiê kê tagarahia na ruma ni rotu henia na bea ni vogasiha igê na hungana apuna iamu i Jerusaleme, na hinua go atea vigo gâga igê. Ngaia ki na nununa na ruma apuna iamu go bani hagarêa me igê na haganegahana.

⁹Na takoha mataha ki oga henigo ma ki aitangisigi na tauhamu. Ngaia ki bani oga henigo, matena go hagavora na maveta. Ngaia ki giraragi na tarani ga hagakoro obamu ma ka oto surigi na ramata iamu.

¹⁰Gu hagatorangenia me tenia i pasimu. Gu naka ke so me tenia na atohamu na bâbâhamu raha, hanana ge oga heniê ma ke tagara heniê, hanana ve giraragi na tarani ga hagakoro obamu.

¹¹Ngaia ki girara erasigi na ara ni marâ. Ngaia ke haganahuniê renia na takoha koro ma ke hagaotoê igê na tagaraha iaku, hanana na raramohana raha ke anumasiê.

¹²Vikana inê kê page surira oto na kariamu ma na atohana o vaemaku ki page arariê ma ka page aganarigi na tauhaku.

¹³Ti ki giraragi na katoha iana God? Ti ki giraragi na obaniha iana?

¹⁴Na ramoha ni takoha iana na enoni ka arisigi ma na takoha iamami ka girara ga bêngenigami bera,

¹⁵suria na apemami ga girara ga meme ka higegi so na ataromami. Na apena na enoni ki manga na ruma na torasuka ikê i maveta, i hagahigea na aitangihana i takotako.

¹⁶Na marâ i maveta igami kami takusigi râ ma ma ki pe mataku tangagami vigami giraragi na marâ i pasimami. Vikana ti ki girara i tarahugi na marâ i pasimu?

¹⁷I mareha rârâ tani vige girara na katoha iamu, manga vigo pe haganahunia renia na takoha mataha ma ko pe hagatorangenia na higona apu iamu tanga, hanana vige angaria.

¹⁸Vikana igo ko hagaotogi na tara tangara na enoni i maveta ma ko hagesurira renigi na tarani ga hagakoro obamu ma na takoha mataha ki hagatahira.”