Read Kahua SIRAKE 1 Bible Online

SIRAKE 1 - Kahua bible

SIRAKE 1

¹Na ara ni takoha mataha hato ka râ me tenia na Araha. Na takoha mataha ki oga hagahu henia.

²Ti ki girara i tomanigi na êsusu na rangi, se na one i one, se na tangiani igê na matena i asa vige page hato?

³Manga i he kani kerekê noga na vavearo? Manga i he kani aberabera na maveta? Manga i he kaniga vato ngavê na rutuni ni asi? Ti ki girara i aramigi na hagatenga ngegana? Ti ki girara i aitangisia na takoha mataha?

⁴Na takoha mataha ki bani vora me i nago tarani na ara ni marâ hato. Na aitangisiha ki bani oga me tare.

⁵Na hunana na takoha mataha ka na tamasinga iana God raramohaga hunia. Na tarani iana na takoha mataha ka na ramata ga tâtâ tonge tare.

⁶Ti ki bâsia na vagana na nahu otona na takoha mataha? Ti ki aitangisia ngavê na parongana?

⁷Ti ki aitangisia na giraraha iana na takoha mataha? Ti ki girara na aitangisiha iana i raha teha ngavê?

⁸Na vere tage ma kani tako mataha ma ki tuguhigia viga hagahigasia ngavê. Ngaia ki oga igê na atohana.

⁹Ngaia ka na Araha. Ngaia nga kani hagavora na takoha mataha. Ngaia ki hahariria ma ki hagakitakita ma ki katoa ki angarira na ara ni marâ hato i hagavorara.

¹⁰Ngaia ki haganahunira na ara ni enoni renia na takoha mataha manga hanana i obania. Ngaia ki katoa ki angarira na ani ga takuia.

¹¹Manga go hagahigasia na Araha, na enoni ka page kasigo akê, ma igo ko page ageage. Na hagahigasiana na Araha ki na rêni ni vagevageha ma na obakoroha tangago.

¹²Na hagahigasiana na Araha ki hagakoro obamu ngavê. Ngaia ki page katogo ko vagevage ma ko mauri arihu.

¹³Tanga na enoni i hagahigasia na Araha na ara ni marâ ka page tavoraha bâkoro tanga, ma igê nikâ na tangiana i meme igê. God ki page korokoro tanga matena i meme.

¹⁴Na hagahigasiana na Araha ka na haganegahana na takoha mataha. Tangara na enoni ga tê viteana God God ki hagavorea henira i obata kenata.

¹⁵Ngaia ki bani oga me henira na enoni i nago kerevê noga ma ki gâga hagahu, ma na apaparaha i muri me ka page hagêguria.

¹⁶Na hagahigasiana na Araha ngaia ka na morana na takoha mataha. Ngaia ki hagatogo obata na enoni renigi na mahatanga iana.

¹⁷Ngaia ki hagavunusigi na ruma iata renigi na marâ manimani manga i bêbagi igê na ngêra mora i mu iana.

¹⁸Na hagahigasiana na Araha ka na takana na takoha mataha. Ngaia ki takataka renirerua na marapeha ma na apekoroha.

¹⁹Ngaia ki rangirangi renirerua na giraraha ma na aitangisiha. Ngaia ki katogi ka ama ni rongo raha nga na atata na ani ga aganaria.

²⁰Na hagahigasiana na Araha ka na vagana na nahu otona na takoha mataha. Na arani ka na mauriha arihu.

²¹Na hagahigasiana na Araha ki paigi hura na tasi. Na agua i gâga igê ngaia ki tarigenia râ na mangariaganiha.

²²Na enoni i mangariaga purupuru ngaia ki hagaratena marena ki votavota.

²³Na enoni hatara ki piringape rârâ mataro me na vagevageha ki tarahua.

²⁴Ngaia ki munimuni mataro me na matena i araria vi tamasi igê ma na enoni ka page kasia akê renia na aitangisiha iana.

²⁵Na takoha mataha ki nahunia na kiboru i vunu renigi na tamasinga ni aitangisiha. Ma na enoni tasi ki asa rârâ vige page nahunia ta na marâ, nga noga ma na ruhiana na hagahigasiana na Araha.

²⁶Manga go tangasia na takoha mataha, go marupegi na ramata iana na Araha, ma ngaia ki page haganahunigo renia na takoha mataha i aharêsigo ngavê.

²⁷Na hagahigasiana na Araha ka na takoha mataha ma na hagaotonga. Na enoni i tototo suria na Araha ma ki haritagi ngaia nga kani hagakoro obana na Araha.

²⁸Siana ko usisi vigu hagahigasia na Araha igê na ogaha iamu. Go hagahigasia hete i mêrihamu hagenani.

²⁹Siana ko tamasi igê na rogaroga purua ma i maata na enoni. Go tamasi igê hete na monariha.

³⁰Siana ko hagarahasigo maremu, i era ma ko vota ma ko maki. Na Araha ki page ranganigi na marâ ga pinihi igê na aitangihamu ma ki page hagamakigo i maata na enoni hato i ruma ni sukuru, suria go pe râ me i ngekana hanana vigu hagahigasia na Araha ma hete go hagahigasigo igo maremu ma, suria go obania ma vigo hagabekasira na enoni ka hagarahasigo.