Read Kahua SIRAKE 10 Bible Online

SIRAKE 10 - Kahua bible

SIRAKE 10

¹Na maneraha i tako mataha ki hagaotora na enoni i ruguhana ma na marungiha iana ki arâ manga ko hanana.

²Na gavumane iana ma na enoni i ruguhana ka maratorana ngaia.

³Na maneraha i pe araria vige maneraha ki aerasira na enoni i ruguhana. Na ogaha i hinua ki girara i akê me bâkoro manga vi na enoni raha igê ma ka nahuni takoha mataha.

⁴Na marungiha ni maveta ki tâ i rimana na Araha. Ngaia ki naka na ani i araria vi maneraha igê na matena i araria vi maneraha igê.

⁵Na tagaraha koro iana ki tâ i rimana na Araha ma na hagahigasiana renia ki râ me tenia na Araha.

⁶Siana ko gâga ni mangariaganiha tanga na enoni, henaka i aharê igê na anima na tarani. Siana ko paroparo, suria vigo tongesurigo so maremu.

⁷Na Araha ma na enoni nikâ ka kitenia na paroparoha ma ka makimakitenigi na tarani ga pe oto.

⁸Na paroparoha, na tarani ga pe oto ma na ruruguha ka girara ga hagavotarira na apaneni nuni ma ka katora na apaneni nuni getera ka urusira.

⁹Igia ka na momo ma na rahu ma. Ga paroparo tanga na ta? Na apeka ka bani kakaga, henaka ga mauri mêngagia.

¹⁰Na maeha i gâga arihu, ki hagatugupunia na mane mangata. Henaka vi na maneraha, ngaia ki mauri i ngekê ma i gomaha ngaia ki meme vari.

¹¹Matena na enoni ma ki meme, na ta ki nahunia? Na mama, na rango ma na marâ vigana ma.

¹²Na paroparoha ki haganega, matena na enoni ki murisigea na Araha ma ki rumakaka renia God i hagavora.

¹³Na paroparoha ka na hunana na tasi. Na ani i bara i bêta na paroparoha na eraha ka page aharêsira. Ngaira ka manga na maana na ve ni tasi i gogogo me. Tahema na Araha ki hagagasuganira renigi na hagaitangiha raha ma ki hagamagahurura ngavê.

¹⁴Na Araha ki hatungira na maneraha ga paroparo ma ki urusira renira na ani ga haritagi.

¹⁵Na Araha ki pirira akê na enoni ga paroparo ma ki urusira renira na ani ga haritagi.

¹⁶Na Araha ki ruhuruhura na agua ga paroparo ma ki hagamagahurura ngavê tenia na maveta.

¹⁷Ngaia ki ruhuruhugi ma ki hagamagahurugi. Vikana na enoni ka hitenigi ngavê.

¹⁸God ki pe hagavorara na enoni tanga vige paroparo se vige mangariaga ngavê.

¹⁹Ti ki ararigia viga hagahigasira? Ngaira ka na enoni ga hagahigasia na Araha. Ti ki pe ararigia vige hagahigasira? Ngaira ka na ani ga aharêngigi na ramata iana na Araha.

²⁰Na enoni ka hagahigasira na maneraha iata. Na Araha ki hagahigasira na enoni ga hagahigasia ngaia.

²¹Na hagahigasiana na Araha ka na hunana na tavorahana bâkoro. Na togeaganiha ni paroparoha ka na hunana na votaha.

²²Na enoni ruruguha, na enoni i rongo raha na atata ma na enoni matareha ke ageagesia na hagahigasiana na Araha.

²³I pe oto vige ruhia na enoni matareha i toto suria na Araha. Ma ki pe oto vige hagahigasia na enoni tasi.

²⁴Na enoni ki tuguhira viga hagahigasira na maneraha, na mane ni hagatamasinga ma na ani ga nahuni ramoha. Ma na ani i hagahigasia na Araha ngaia ki teharira ngaira hato. Ma ki tuguhira na enoni viga hagahigasia ngavê teharira ngaira.

²⁵Na enoni ga asitatara ka tagara tanga na kare rakuraku i nahuni takoha mataha. Manga vi ngaira ma ka takotako bâkoro, ki asa vige hagagege renia.

²⁶Siana ko meparo na tagaraha iamu. Siana ko paroparo, matena i pe tongasigo na marâ.

²⁷Go tagara hete hanana ga aharêsigo na marâ go obanigi teharia go paroparo ma ko magê.

²⁸Kakare, go tongesurigo so maremu ma siana ko paroparo. Go hagahigasigo so maremu manga vi marisimu.

²⁹Ti ki girara i hagahigasia na ani i tevotevo ruhia so marena? I asa vige hagahigasia na ani i tevotevo ruhia so marena purupuru.

³⁰Ga hagahigasia na enoni matareha renia na aitangisiha iana. Ga hagahigasia na enoni ruruguha renigi na ruruguha iana.

³¹Manga vi na enoni matareha ngekana ma ki ruruguha, ngaira ka page hagahigasia ngavê teharia i nago. Manga na enoni ma ka pe hagahigasia na enoni ruruguha ngekana, ngaira ki asa vige hagahigasia, matena i matareha.