Read Kahua SIRAKE 11 Bible Online

SIRAKE 11 - Kahua bible

SIRAKE 11

¹Na aitangisiha ki kasia akê na enoni matareha ki gâga henira na ani ga nahuni ramoha.

²Siana ko kasia akê na enoni renia na bâkorohana ma siana ko ruhia na enoni, suria vi pe bâkoro.

³I berarogata na marâ ga gagaha na pirui ki sisite ngavê ma na robona ki mamaki teharigi na ani mavê na marâ.

⁴Siana ko hagarahasigo maremu suria ma vigo tuguni bâkoro. Siana ko paroparo, matena na enoni ka hagahigasigo, suria na tagaraha iana na Araha ka bâkoro ngavê, henaka ga pinihi tenira na enoni.

⁵Rako na maneraha ka vota ka oga i ano, matena na mane tokora ka urusira ka maneraha.

⁶Ga hagamakira rako na enoni ga nahuni ramoha. Rako na enoni raha ka vota i rimata na enoni getera.

⁷Go garia maninga na marâ ma ko kahu gegege. Go takotako hagenago ma ko kahu ramonia na enoni.

⁸Siana ko totora vora, matena i tamasi na enoni. Go karinga ma ko kahu aramia.

⁹Siana ko mehetuguri na enoni igê na tarana i pe tuguhigo igo. Siana ko têtê henira na enoni tasi igê na hekarigiana iata.

¹⁰Kakare, siana ko tangatanga hepe renigi rako na marâ. Manga go katokato vikana, na mamasiaganiha ki page tarahugo. Na tarana go gunahia ki asa vigu tarahua. Na tarana vigo gavatenia ki tâ nga tangago.

¹¹Bâ, tani na enoni ka rêrê igê na tagaraha raha. Henaka, ma ngaira ka ama ni guruguru bê aporo nga igê na tagaraha iata.

¹²Tani ka pe manisingenigi na tagaraha iata. Ngaira ka matareha bâraha ma ka pe ramoramo ni tagara vari. Ngaira ka obania na hetamaniha. Na Araha ki obakoro renira ma ki hagamahara tenigi na higata ga higa bogobogora.

¹³Ngaia ki katora ka akê me bâkoro ma na enoni hato ka konetenira ngavê.

¹⁴Na ara ni marâ hato ka râ me tenia na Araha, na marâ ga koro ma na mamasiaganiha na matareha ma na ruruguha, na mêriha ma na mera,

¹⁵na takoha mataha, na aitangisiha, na giraraha renigi na ramata, na hetakuiha ma na hekomaniha, ngaigi hato ka râ me tenia na Araha.

¹⁶Haganega tenia na haganegahana na enoni tasi ka tê tasi ma ka oga igê na roto ma na ani ga ageagesigi na eraha, na eraha ki aharêsira tare, henaka ga gemêa.

¹⁷Na mahatanga iana na Araha ki gâga hagahu tangara na enoni ga tê viteana, ma na korohana ki katora ka akê me maninga tare.

¹⁸Ta na enoni ki ruruguha, suria i tagara raha, ki hagatage marâ ma ki hahêaga. Ma na ta ki vora?

¹⁹Rârâ, ma ngaia ki tako ki vi: ‘Hoita, ma na ta nikâ? Be oga ahaha so ma igê na nahuninga iaku.’ Ma ngaia ki pe girara na matena vi page meme igê ma na enoni getera ka page nahunigi na nahuninga iana.

²⁰Go katoa nga na tagaraha iamu ma ko tâtâ nga igê. Go memerahaga na tagaraha iamu.

²¹Siana ko hengarira na enoni ga aharê, suria viga akê me bâkoro igê na ogaha iata. Go tâtâ nga igê na tagaraha iamu maremu ma ko hagêguritogo renia na Araha, suria i mataku ma tanga na Araha, vi katoa na enoni matareha ki gasuga ni ruruguha.

²²Na Araha ki koro tangara na enoni ga toto suria ma ki pe asa tangara, vi ngaira ke gasuga ni akê me bâkoro.

²³Siana ko vi: ‘Na ta kanigê obania? Gi hita me nikâ kani arariê vigê rurugi akê nikâ?’

²⁴Siana ko vivi nikâ: ‘Na nahuninga iaku ka raha, ka uhu noga! Inê be oga barebare hete.’

²⁵Matena ga tavoraha bâkoro na marâ, na enoni ka bonotenigi na tarani ga pe tavoraha bâkoro. Ma na matena ga pe tavoraha bâkoro na marâ, ngaira ka bonotenigi na marâ ga tavoraha bâkoro.

²⁶Na Araha ki mataku ma tanga vi vuria na enoni ararigi na tauhana matena i meme.

²⁷Matena i meme, na tauhana ka huhura mave. Na matena abubu ni mamasiaganiha ngekana ki girara i hagamagahurugi na vagevageha hato iana.

²⁸Siana ko visia ta na enoni vi babarisi matena i tahitahi mênga, suria na matena ma i meme igo ko kahu girara erasia ngavê.

²⁹Siana ko unia banu i pasimu na ani mavê na enoni, suria na enoni i katokato ngaia ki girara i hagabekasigo.

³⁰Na aitangihana na enoni paroparo ki manga na marâ ni hagamu. Ngaia ki gamorahigo manga na mane i ahiahi karigo.

³¹Na marâ ga koro ngaia ki horogi ka era. Ngaia ki horogi na tauhamu ka bagatauhamu.

³²Na kere ririki ki girara i voravora re na bagagi raha. Na enoni tasi ki gâga ma tanga i gâga sutaga.

³³Go hinarura na enoni vigana, suria ngaira ka rapasigo, i era ma ka hagaerasigo ki rongo era tare na atamu.

³⁴Manga go unia banu i pasimu na enoni i pe koro, ngaia ki page haganega na eraha tangago ma i berarogami igo ma na ahemata iamu.