Read Kahua SIRAKE 12 Bible Online

SIRAKE 12 - Kahua bible

SIRAKE 12

¹Manga go korokoro tanga na enoni, go girara nga vi tanga va ti kanigo koro tanga. Vikana ngaia ki visigo koro renia na korohamu.

²Go korokoro tanga na enoni i tê viteana God hanana go page nahunia na memu renia na korohamu. Manga i mareha vi ngaia ma ngaia hete kani God raramohaga hunia.

³Na enoni i tamania na enoni era, ngaia ki asa vige akê me bâkoro, suria na parongana ki pe koro i maana God.

⁴Go mahata tangara na enoni ga tê viteana God ma siana ko tamanira na enoni tasi.

⁵Go korokoro tangara na ani ga haritagi. Siana ko vatera ta na marâ na ani ga haritohea God. Siana ko hagangêra se vigo korokoro tangara, i era ma ka erasigo renia na korohamu, suria na eraha i page tarahugo ki page raha teharigi na ara ni korohamu tangara.

⁶God raramohaga hunia nikâ ki kitenira na enoni tasi ma ki page hagaitangira na ani ga pe botage renia.

⁷Go mahata tangara na enoni koro ma siana ko tamanira na enoni tasi.

⁸Matena go gâga igê na ramana, ki bara, vigu girara vi ti ka na tamamu monari. Ma na matena go pe akê me bâkoro, igo ko kahu tahetara, vi ti ka na merongamu.

⁹Matena go gâga igê na ramana, na merongamu ki komanigo. Ma na matena go pe akê me bâkoro, na tamamu koro ki page kasikasi renigo nogana.

¹⁰Siana hagetage ko hagêguritogo renia na merongamu, suria na eraha iana ki vagavaga me mave, manga na hehegana na aiani.

¹¹Go bâbâ taramu ma ko hinarua, henaka i bâ manga i haritagi ma ki tubê so tangago. Vikana igo ko manga na ani i taruhia tare na galasi ni surasura bê ma ko bani girara vi ngaia ki page guruha ngavê.

¹²Siana ko naka ki ruata me tangago, i era ma ki hagavotarigo ma ki urusigo. Siana ko naka ki ngahisigo, i era ma ki uhungia vi gâga urusigo igê na atohamu. Vikana igo ko kahu tahetara, vi na hagaotonga iaku ki monari ma ko hagahunigo maremu, matena go takusia aporo.

¹³Ti ki takia na enoni i hagamanatara na ma ma na ma ka garea, se na ani i hagarêra hagarangira na marâ vasiga ga garagara?

¹⁴I tagenana ma tangago igo, manga go hakunira na enoni tasi ma ko têtê henira igê na bagatauhata.

¹⁵Na merongamu ki gâga henigo rârâ mataro me na matena go pe akê me bâkoro ma ki kahu kasikasi renigo.

¹⁶Na gaviharana na merongamu ka mamaki manga na pirui ma igê na aitangihana ngaia ki katokato renigo, vi hagavotarigo igê na etu iana. Henaka i bâ manga i takigo ngavê matena i rugurugu na obamu, ma na matena i nahunia na matora ngaia ki page nahuigo ko meme.

¹⁷Manga i tarahugo ta na perenga, ngaia ki ngahisigo vi tamanigo ma hete i kato ma vi hagavotarigo.

¹⁸Vikana ngaia ki araragebê ma ki hitahita baro ma ki tamasi ngurunguru renigo ki hagatoraigo. Na tauhana tangago i ngekê ki totora getea tenia i nago.