Read Kahua SIRAKE 13 Bible Online

SIRAKE 13 - Kahua bible

SIRAKE 13

¹Manga go hataria na puara, ngaia ki puruigo. Manga go hakunira na enoni paroparo igo ko page maratorata.

²Siana ko torea na marâ i higa tangago. Siana ko hakunira na enoni ga ruruguha ma ka raramohaga teharigo igo. Siana ko naka na apira na hê ki ngahisia na ani na aiani. Manga garu hetagitagi, na ani na hê ki page akamakama.

³Manga na enoni ruruguha ma ki hagamamasiaga ta na enoni, ngaia ki ageage renia. Manga vi ngaia ma ki katoa bera na enoni matareha, ngaia ki tuguria ki tangahuria.

⁴Na enoni ruruguha ki hagatagarahigo bâraha tanga ma vigu hagahanea ngaia. Ma na matena i asa so tangago vigu hagahanea, ngaia ki asa vige botage renigo.

⁵Manga ga tongasigo tani na marâ ngaia ki gâga hagêgurigo ma ki ageage ki tanumigo.

⁶Matena i obanigo, ngaia ki hagabekasigo. Ngaia ki mamanamui tangago ma ki hagakoro obamu. Ngaia ki hagamemesi ringena tangago, ki vivi: ‘E, ta na marâ vari ko obania?’

⁷Igê na magotoha iana ngaia ki hagamakigo. Rârâ, ma na matena i tanumigo ngavê, ngaia ki page rurusigo. Ma hemuri matena i bâsigo, ngaia ki sususu pane tenigo ma ki karikarige bê renigo.

⁸Go bâbâ taramu, siana ka hagabekasigo, i era ma na bekaniha iamu ki hagamakigo.

⁹Manga na mane i nahuni ramoha ma ki unigo i pasina, igo ko tamasi kakaviaga tanga ma ngaia ki megotamasi bâkoro, hanana vigo arâ.

¹⁰Siana ko bugurenigo maremu bê râ tanga, i era ma ki kitenigo. Siana nikâ ko gâga sikasika tenia, i era ma ki bâtihigo.

¹¹Siana ko katoa manga vi igo ko maratorana. Siana ko tongesurigi na ani mavê na marâ i visigi, suria i uhungigo igê na tamasinga iana ma igê na mamanamuiha iana tangago.

¹²Na enoni i nahuni ramoha ki asa vige hetaki. Ngaia ki girara ma i nahuigo ko meme se i kasigo igê na ruma ni hagaitangiha.

¹³Tahema ko bâbâ taramu ma ko tamasi takotako, suria ngaia ki manga na agua ni perenga.

¹⁴Manga go marutea vikana, go riterite. Igê na ogaha iamu go takuia na Araha ma ko avarasia ki hagatahigo.

¹⁵Na ara ni marâ mamauri hehegitigi ka hakunira na tamata hehegitigi. Ma ki tagenana ma nikâ tangara na enoni.

¹⁶Na marâ mamauri hehegitigi ka hakunira na tamata hehegitigi. Ma na enoni nikâ ka hakunira na ani ga maratorata.

¹⁷I hega, na o vasiga ma na karena sipi karu girara vari garu gâga haku? Tagenana ma tangara na enoni ga aharê ma na enoni ga tê viteana God.

¹⁸I hega na o vasiga ma na o manata karu girara vari garu hekomani? I hega, na enoni ruruguha ma na enoni matareha karu girara vari garu hekomani?

¹⁹Na laione ka gagarihira na tonki vasiga igê na bagamasusu raha. Na enoni ruruguha ka tanumira na enoni matareha.

²⁰Na enoni paroparo ka kikitenira na ani ga haritagi. Na enoni ruruguha ka makimakitenira na ani ga matareha.

²¹Matena na enoni ruruguha ma ki tapasu, na tamana ka taua, hanana vi siana ki votavota. Matena na enoni matareha ma ki votavota, na tamana ka hagaraha maeha renia.

²²Matena na enoni ruruguha ma ki atobera, ka rakorako na ani ga tamania. Manga i aharê igê na tamasinga iana ka rakorako na enoni ga totora pusia. Ma ki manga na enoni matareha ma ki aharê igê na tamasinga iana, ngaira ka ramonia ngavê renia. Henaka ngaia ki tamasi takotako, ngaira ki asa vige karinga.

²³Manga na enoni ruruguha ma ki tamasi, e, ngaira hato ka munimuni ma ka kasia akê i vavearo renigi na tamasinga iana. Manga na enoni matareha ma ki tamasi, ngaira hato ka visia: “E, baga ti raha ngekana?” Manga i tapatapasu igê na tamasinga iana, ngaira ka ama ni hagaraha nga.

²⁴Na ruruguha ki koro, manga vi pe arâ me tenia na tasi. Na matareha ki era, manga i arâ me tenia na paroparoha.

²⁵Ngaia ma na aitangihamu kani katogo ko bâbâ rikiriki se go bâbâ ruruhi.

²⁶Manga igo ma ko hata rikiriki, igo ko bâbâ rikiriki. Manga go katogi na maramarêrava, go takoha raha renigi hagenago.