Read Kahua SIRAKE 14 Bible Online

SIRAKE 14 - Kahua bible

SIRAKE 14

¹I babarisi na enoni i hagaotoa tare na gaviharana. I babarisi na enoni i pe hatamia na tangahuriana, suria i pe tasi rârâ.

²I babarisi na enoni i matarotaro na aitangihana ma ki asa vige bagahagêguri.

³Na enoni i hahêaga ki pe araria vige ruruguha. Na ruruguha ki pe araria na enoni maongo.

⁴Manga go rurugugi na ruruguha ma ko hahêaga renigi, igo ko rurugugi ma tangara na enoni getera. Ngaigi ki page hagarêsira ka mauri re.

⁵Manga go hahêaga renigi na ruruguha iamu ma ko pe pasi vigu vagevagesigi vigu mauri re, manga i he kanigo girara go mahata tangara na enoni getera?

⁶Na ani i hahêaga, ki hagamamasiaga so marena ngavê. Ngekana na eraha iana ki hagaitangia.

⁷Manga vi ngaia ma ki mahata tanga ta na enoni, ngaia ki mahata purupuru ma. Ma i ta na matena na maongoha iana ki page vagavaga me mave.

⁸Na enoni i maongo ki na enoni era. Ngaia ki pe botage renira na ani i bara tangara,

⁹ma ki pe togo na aitangihana renigi na nahuninga iana. Na hagatageana ki hagaratagania.

¹⁰Tani na enoni ka hahêaga ngavê. Tahema ngaira ka magê.

¹¹Kakare, manga go nahunigi na marâ, siana ko hahêaga. Go bâbâsurigo maremu hete renigi ma ko vogasia maninga na Araha renigi.

¹²Takusia, i ta na tangiana igo ko page meme ma igo ko pe girara vi i na keta.

¹³Matena go tahitahi mênga, go komanira na tamamu. Go mamahata ngavê tangara.

¹⁴Go katogi na ara ni tangiani ka na tangiani ni vagevageha tangago. Go katogi nga na marâ go obanigi, manga vi pe manimanigi na ramata.

¹⁵I ta na tangiana na enoni getera ka page nahunigi na nahuninga iamu ma ka page tonganigi na meni na tagaraha iamu.

¹⁶Vikana, gu mamahata ma ku aganarigi na mahatanga iata na enoni getera. Gu ageagesia na ogaha iamu, suria i asa vigu tarahua na vagevageha igê na agua iata na enoni ga bani me.

¹⁷Na apena na enoni ki manga na gahu i girara i kakaga. Na ramata i bani oga me kerevê noga, ki vi: “Na ara ni enoni hato ka meme.”

¹⁸Na enoni ka mangagi na ahani na apinige i araraga. Tani na ahani ka turituri ma tani ka hisihisi urusigi. Na apaparaha ninuni ki manga ngekana nikâ. Tani ka meme ma tani ka voravora me urusira.

¹⁹Na ara ni marâ na enoni i tagarahigi ka page kakaga ma ka page magahuru ma na ani i tagarahigi ki page magahuru henigi.

²⁰I babarisi na enoni i barigia na takoha mataha ma ki gunahia na aitangisiha.

²¹I babarisi na enoni i takoha igê na aitangihana renigi na tarani na takoha mataha, hanana i tarahugi na tarani pinihi iana.

²²Go hagavasi tanga na takoha mataha manga na mane i hagavasi tanga na ganiana. Gu gamorahia ku harisuria.

²³Go kirihi banu igê na mabaha na ruma iana ma ko kakaringa banu i na apanena hura na maani ruma i purupuru.

²⁴Go taunga ko mebasigu hetanga ko ngahisia.

²⁵Vikana igo ko nahunia na agua i hagagara koro ni ogaha.

²⁶Go taunga i mamarugani na arani. Go hagarukunira na karemu igê na mamarugana.

²⁷Ngaia ki mamarusigo tenia na bababana na arito ma ko mamaro i ruguhana na bâbâhana raha.