Read Kahua SIRAKE 15 Bible Online

SIRAKE 15 - Kahua bible

SIRAKE 15

¹Manga go hagahigasia na Araha, igo ko katokato vikana. Manga go marupegi na ramata iana, igo ko page nahunia na takoha mataha.

²Na takoha mataha ki page râ vurusigo manga vi ngaia kani kenamu se na gete go kahu êragia.

³Ngaia ki page hagangêgo renia na aitangisiha ma ki page hagatunumigo renia na takoha mataha.

⁴Go kaviria ma hanana i asa vigu tapasu ku votavota. Go hagêguritogo renia ma hanana i asa vigu maki.

⁵Ngaia ki page kasigo akê teharira na enoni getera ma igê na hekarigiana ngaia ki page katogo ko tamasigi na tamasinga ni takoha mataha.

⁶Vikana igo ko page vagevage ma ko page obakoro monari ma ki page rongo raha hagahu na atamu.

⁷Na enoni ga pe nahuni aitangisiha ki asa iata vige tarahua ma na enoni tasi ki asa iata vige bâsia.

⁸Ngaia ki makimakitenira na enoni paroparo. Na enoni ni hagaparunga ki asa iata vige takusia.

⁹Na enoni tasi ki pe araria vige hagarahasia na Araha, suria na hagarahenga iana ki pe hagakoro obana.

¹⁰Na hagahigasiana na Araha ki arâ me nga tenia na takoha mataha, tenia na Araha, hanana na Araha ki aganaria.

¹¹Siana ko vivi: “Na Araha kani katoê kê tasi.” Na Araha ki asa vige hagavoragi na marâ i kitenigi.

¹²Siana ko vivi: “Ngaia kani hagatasiê!” Ngaia ki pe obanira na enoni tasi, hanana i hagahurasigi na katoha iana.

¹³Na Araha ki kitenia na eraha, henaka vi na ani ta. Ma na ani ga hagahigasia na Araha ngaira ka kitenia nogata.

¹⁴I nago kerevê noga matena na Araha ki hagavorara na enoni ngaia ki nakara vê ka paronga tangara so ma mareta.

¹⁵Manga go obania, igo ko girara ma go marupegi na ramata iana na Araha. Igo ma kanigo atea go tototo suria se mareha.

¹⁶Ngaia ki nakarerua i maamu na gi ma na ve. Igo ma kanigo girara go atea na ani ta na hitangiterua go obania.

¹⁷I maamu karu tâ na mêriha ma na mera. Na ani go atea ngaia noga.

¹⁸Na aitangisiha iana na Araha ki raha teha ngavê. Na raramohana ki bagararaha ma ngaia ki bâsigi na ara ni marâ hato.

¹⁹Ngaia ki giraragi na ara ni tauhana hato na enoni. Ngaia ki marupera na ani ga hagahigasia.

²⁰Ngaia ki mareha ngavê vige bonasia ta na enoni hanana vige bagatauhana. Ngaia ki mareha ngavê vige hagamarumungenia ke tasitasi.