Read Kahua SIRAKE 16 Bible Online

SIRAKE 16 - Kahua bible

SIRAKE 16

¹Siana ko obania viga rakorako era na karemu, manga vi ngaira ma ka erataga. Siana ko ageagesira o karemu ga murisigea na Araha.

²Henaka ga rakorako na karemu, siana ko ageagesira, manga viga pe hagahigasia na Araha.

³Siana ko hagêguri, vi ngaira ka mauri arihu. Siana ko hagêguritogo renira suria viga rako, suria manga go taua na kare i tage i tê viteana na Araha, na tarana ngekana ki koro teharia vigu aparara na rehagaro na kare ga pe tê viteana na Araha. Manga go pe tê kare ma ko meme, na tarana ngekana ki koro teharia go apara kare ka rakorako ma ka pe botage renia God.

⁴Manga na ani gi tage ma na enoni i tako mataha ma ki gâga i hinua, na hinua ki ama ni raharaha nga. Ma na hagosi ninuni ga pe botage renia God ngaia ki page magahuru.

⁵Inê kê bani bâsigi me hagarako na tarani ngegana ma kê bani rongogi me na sihonga renigi ga erataga ngavê teharigi.

⁶Na mangariaganiha iana na Araha, ki manga na bagagi raha, i hagaitangira na kere hakuta ninuni tasi se na agua hagenani i haritohea na Araha.

⁷Ngaia ki pe takira na mane ga borahu ma ka raramohaga ga haritohea, suria ga hagêgurigi na raramohata mareta.

⁸Ngaia ki pe takira na enoni o Loti i oga i berarogata, suria i kitenia na paroparoha iata.

⁹Nikâ na Araha ki pe takira na enoni, na Isiraelita ga tarigenira hura tenia na apanena iata. Ngaia ki hagaitangira meni na tasi iata ma ki mutera.

¹⁰Nikâ ngaia ki pe takira na 600.000 na enoni ga aharêvoro igê na bagamasusu raha, suria ngaira ka guguruga ngavê tanga.

¹¹Henaka vi na vere tage togo ma na enoni i guguruga tanga ngaia ka page konekonetenia, manga vi ngaia ma ki tahitahi tenia na hagaitangiha. I pasina na Araha karu oga igê na hetakiha ma na mangariaganiha. Na hetakiha iana ki raha ma ngaia ki girara i mangariaga ngavê nikâ.

¹²Na hagaitangiha i katoa ki raharaha manga na hetakiha iana. Ngaia ki suria na ara ni enoni surigi na tauhana.

¹³Na enoni tasi ki asa vige migigava na marâ i hanagogi ma na enoni i piringiape ma ki toto suria God, ngaia ki pe raruni baguru.

¹⁴Na enoni i koro i maana God ki page nahunia na mena na tauhana koro. Na ara ni enoni ki page nahunia na mena i araria.

¹⁵Na Araha ki katoa na maneraha i Esipito ki pe tê viteana rârâ, hanana na maveta ki tahetara renigi na tagaraha iana na Araha.

¹⁶Na Araha ki takira na marâ hato i hagavorara. Ngaia ki vutungira na enoni renirerua na marara ma na mengo iana.

¹⁷Siana ko vi: “Inê be ahi tenia na Araha. Ti kani i haha hanana vi takusiê? Manga i he kani girara vi bâsiê suria gê oga i berarogata rako ngavê na enoni? Na ta kani inê i berarogata na ara ni marâ hato God i bani hagavorara?

¹⁸Bâ, matena i arâ me igê na Araha na ara ni marâ hato ka page tatata: na bevoa, na vavearo, na ano ma na rutuni.

¹⁹Na barani ma na gatani na maveta ka page gisigisi, ma ka page angingi, matena na Araha ki boretenigi.

²⁰Ma tangê inê, na Araha ki asa vige takusiê. Ti kani hahêtugigi na tauhaku?

²¹Matena gê tasitasi, ti kani bâsiê? Matena gê bagatauhaku pinihi, ti kani girarê?

²²Ti kani page tamasigi na tauhaku koro tanga na Araha? Ti kani obania vi gâga naasia? Ngaia ki mehagarihu na suriha.”

²³Ngaigi nga na takotako iana na ani i bekabekaga kani pe nahuni takoha koro ma ki hagaparua so marena.

²⁴Kakare, gu rongo ma ku karingê maninga, hanana go page nahunia na aitangisiha.

²⁵Inê be hagesurigo maninga ma be hagatarêngenia maninga na aitangisiha iaku tangago.

²⁶Igê na haganegahana na Araha ki hagavorara na ara ni marâ hatohato ma ki haganahunira renigi na tauhata ma na atohata hehegitigi.

²⁷Ngaia ki bani hagaotogi hagahu na tauhata ma ka gâga tarema nga vigana. Ngaira ki asa vige page magê se vige meme na apeta. Ngaira ka ama ni tagara nga tare ki bê ki arâ.

²⁸Ngaira ki asa vige heparapara ma ka têtê viteana hete tare ki bê ki arâ.

²⁹Matena na Araha ki hagavorara hato, ngaia ki hahariria na maveta ma ki hagavunusia renigi na mahatanga koro iana.

³⁰Ngaia ki gahuia renira na ani mavê na marâ mamauri, ga page meme ma ka voravora aporo re na mako.