Read Kahua SIRAKE 17 Bible Online

SIRAKE 17 - Kahua bible

SIRAKE 17

¹Na Araha ki hagavorara na enoni renia na mako ma ki katoa na ara ni hitangita ki voravora aporo re na mako.

²Ngaia ki nakagi tangara na mateni ga mauri surigi. Ngaia ki haganahunira renia na ramoha, hanana ga marungira na marâ hato i maveta.

³Ngaia ki haganahunira renia na raramohana marena ma ki katora ka maratorana so ngaia marena.

⁴Ngaia ki katora na ani getera na marâ mamauri ka magutenira. Ngaia ki kasira ka marungira na manu ma na marâ mamauri getera.

⁵Na Araha ki haganahunira renigi na ramoha gi rima henigi na anguruta tangarerua na takotakoha ma na aitangisiha.

⁶Ngaia ki haganahunira renigi na maata, na meata, na karingata na osuta hanana ga takotako, ma na aitangihata.

⁷Ngaia ki haganahunira renigi na giraraha ma na aitangisiha ma ki hagagirarara renia na ta ki koro ma na ta ki era.

⁸Ngaia ki naka na aitangisiha iana igê na aitangihata, hanana ga tahetara renigi na hahanetagani na tagaraha hato iana,

⁹ma ka ageagesigi ma ka tamasigi,

¹⁰hanana ga hagarahasia re na atana apuna ma ka tarohenigi na hahanetagani na tauhana hato.

¹¹Ngaia ki naka na giraraha ki oga tangara ma ki vatera renigi na ramata ni mêriha.

¹²Ngaia ki naka na suruheri i gâga hagahu henira ma ki hagagirarara renigi na ramata iana.

¹³Ngaira ka bâsia na hahanetagana raha ma ka rongoa na ringena i rongo hagamamagutaga.

¹⁴Ngaia ki vi tangara, ki vi: “Siana kamu katogi na tarani ga pe oto.” Ngaia ki ramatenia na ara ni enoni vi i manga i he ka na tauhana tangara na enoni getera.

¹⁵Na Araha ki giraragi tare na tauhata na enoni. I asa vige pinihi tenia.

¹⁶Haganega me tenia na matena ga sisite, ki bâ manga vi na eraha ki okera nga. Ngaira ki asa vige urusia na aitangihata ni guguruganiha renia na aitangihata ni tê viteana God.

¹⁷Ngaia ki votora na apaneni nuni suria na maveta hagenani ma ki atera na ani ga marungira hegitigi. Ma tanga i Isiraele kani ngaia na Araha.

¹⁸Isiraele ka na bêbê ni kare iana. Ngaia ki bâsuria ma ki hagaotoa. Ngaia ki takuia ma ki katoa ki ape mahaha hanana i asa vige rumakaka renia.

¹⁹Na Araha ki hahutugigi tare na tauhata na enoni. Na tauhata hato ka oga tatara mave tanga.

²⁰I mareha rârâ ta na tasi iata vige pinihi tenia. Ngaia ki giraragi ngaigi hato.

²¹Ma na Araha ki koro. Ngaia ki girarara na enoni i hagavorara. Ngaia ki pe rumakaka renira se vige mutera ma ki takira hete.

²²Na mahatanga iaka tangara na enoni matareha ngaigi ki manga na ringi i kakêna i raha na mena ma ki oga igê na girarana. Ngaia ki katogi renia na rokona.

²³Ki arârâ, ma na Araha ki page surira na enoni era ma ki page vatera renia na hagaitangiha i ararira.

²⁴Ma tangara na ani ga urisi parongata, ngaia ki aganarira aporo. Ma tangara na ani ga bagahagêguri, ngaia ki kanukanura, siana ka rumakaka.

²⁵Mu aharia aporo na Araha. Mu murisigegi na bagatauhami. Mu nungia maninga, hanana i tamanigamu, hanana siana kamu tasitasi.

²⁶Mu aharia aporo God raramohaga hunia. Mu kasigi râ na tasi iami. Mu kikitenigi ngavê na eraha.

²⁷Na ani ga tahitahi mêngara ka girara ga visia koro na Araha. Ti i na agua iata na enoni ga me kani girara i hagarahasia na Araha God raramohaga hunia?

²⁸Na enoni i tahitahi mênga ma ki komaga ngaia nga kani girara i kiki hagarahasia na Araha, ma na enoni i me ma ki magahuru ngaia ki asa hagetage vige hagarahasia.

²⁹Na takiha iana na Araha ki raha teha ngavê tangara na ani ga aharia. Ngaia ki bonotenigi na tasi iata.

³⁰Ma na enoni ki pe tonga renigi na ara ni marâ hato, suria na ara ni enoni ki tâ tanga i meme.

³¹Na ta ki mave teharia na arito? Henaka, ma ngaia ki pe mave, matena i meme. Na eraha kani okea na enoni i makumakusiga.

³²Na Araha ki bâ bê vato renigi na higu hato i vavearo. Ma igia na enoni, igia ka na kere momo ma na rahu.