Read Kahua SIRAKE 18 Bible Online

SIRAKE 18 - Kahua bible

SIRAKE 18

¹Na Araha i gâga hagahu ki hagavorara na ara ni marâ hato ga oga.

²Ngaia getea ma kani oto. I mareha rârâ vi tani me nikâ.

³Na maveta ki tâ i na ababani rimana ma na ara ni marâ ka tê viteana. Ngaia ki marungira na ara ni marâ hato ga oga. Na raramohana ki voasigi na marâ koro tenigi na marâ era.

⁴Ngaia ki pe haganahunia ta na enoni renia na ramoha, hanana i ramatenigi susurigi na tagaraha raha iana. Ti ki girara i aitangisigi hagenani?

⁵Ti ki girara i hagararingenia na raramohana i hahanetaga? Ti ki girara i tomanigi hato na tauhana ni hetakiha?

⁶Igia ki bara vige hagatonganigi kê nikâ se vige hagasibagi. I asa vige aitangisigi na tagaraha raha iana na Araha.

⁷Matena na enoni i hatungigi na ara ni takoha hato iana, ngaia ki mareha nga vige haganega. Matena i takotako hato, ngaia ki ama ni tugupu nga.

⁸Na ta ka na enoni? Tanga na ta kani ngaia? Na tauhana koro ma na bagatauhana ki tanu hega?

⁹Manga na enoni ma ki mauri ki tarahua akê na tangarê na harisi, ngaia ki mêri borahu. Ma ta kere ani ma ka tarahua vikana.

¹⁰Manga vige hagararingenigi na harisi ngegana henia na mêriha i bani goga me ma ki gâga hagahu, ngaigi ke manga na kere êsusu gitage na ve i asi, se manga na kere maana gitage na one.

¹¹Tahema na Araha ki haritagi henigia. Tahema na hetakiha iana ki aharêsigia.

¹²Ngaia ki bâhagagara renigia vi igia ka page meme nga. Tahema ngaia ki agana ki bonotenigi na tasi iaka.

¹³Na enoni ki takira ma na goana ma na Araha ki takira na ara ni enoni hato. Ngaia ki hagaotogia, ki ramonigia ma ki hagesurigia. Ngaia ki manga na enoni i bâsuri sipi. Ngaia ki toregia aporo i pasina.

¹⁴Ngaia ki takigia, manga vi igia ma ka aganarigi na hagaotonga iana ma ka gunahigi na suriha iana.

¹⁵Kakare, matena go tamania na enoni, siana ko ramonia vê nikâ. Matena go mahata tanga, siana ko tamasi hagamamasiaga vê nikâ.

¹⁶Na tamasinga iamu ka raha teharia na mahatanga iamu. Ngaigi ki manga na kârupu i hatungia na bababana na arito ru.

¹⁷Hoi, na tamasinga i rongo koro ki teharia na mahatanga koro ngavê. Manga igo ma ko haritagi monari, igo ko mahatangenirerua ngairerua hato.

¹⁸Na enoni bekabekaga ki guhaguha, suria i pe haritagi. I asa vige riki na maana na enoni, manga vigo mahata tanga ma ko bâbâ marababaga.

¹⁹Go tamasi takotako. Go bâbâsuria nga na apekoroha iamu, i era ma ko maeha.

²⁰Go bâbâ maninga igê na aitangihamu, i era ma na Araha ki hagaitangigo. Vikana, matena i surigo, ngaia ki page takigo.

²¹Gu tangahurigo, i era ma ki tarahugo na maeha meni na tasi iamu. Matena go tasitasi hato, go urisi parongamu.

²²Manga go surusuru tanga na Araha, siana ko hagababea vigu hagamonaria. Siana ko hagababea vigu hagaotogi na marâ, matena go sugi meme.

²³Go takotako maninga hagenago ma ko kahu surusuru. Siana ko uhungia na Araha, suria vigo pe hagamonaria.

²⁴Takusia na mangariaganiha iana na Araha, i page tarahugo igê na matena go meme igê. Matena i surigo, ngaia ki page hagaitangigo.

²⁵Matena go nahunigi na ara ni marâ go obanigi, go takusia nga na matena ni magêha. Matena go ruruguha, go takusia nga na matena ni matarehana.

²⁶Na ogaha iamu i mavoraro ki girara i totora getea ngavê tenia na ogaha iamu i manurahi, suria i maana na Araha na ara ni marâ ka rêrête ma.

²⁷Manga go nahuni takoha mataha, igo ko tototo surigo maremu tare. Matena na eraha ki ramoramo i pasita na enoni, go hinahinaru, siana ko aharê nogamu.

²⁸Na ara ni enoni i nahuni takoha, ngaia ki bâbâgirara na takoha mataha ma ki hagahigasia na anima na enoni ni takoha mataha.

²⁹Na enoni ga rongogiraragi na tamasinga ni takoha mataha ngaira ka hagabângenia na takoha mataha ma ka nganga renia tangara na enoni getera.

³⁰Siana ka angarigo na teniha era ma siana ko aganarigi.

³¹Manga go aganarigi na ara ni teniha igê na aitangihamu, na merongamu ka page megomarabe.

³²Siana ko aganaria na ogaha ni ruruguha raha. Siana ko katokato vikana, suria i page katogo ko matareha.

³³Manga go pe nahuni haga tangagi na magotoha raha, siana ko kauni, i era ma ko page matareha ma ko baganunungi.