Read Kahua SIRAKE 19 Bible Online

SIRAKE 19 - Kahua bible

SIRAKE 19

¹Manga go totono papasi tare, i asa vigu page ruruguha. Manga go vi, vigo maramiki, ki arârâ ma igo ko page hagaratemu maremu.

²Henaka na mane ga nahuni takoha, na vaini ma na gete ka katora ka bekabeka surira. Na mane i tarisurira na êrâ ngaia ki ama ni tabaga nga.

³Na tabaganiha ngekana ki page hagamesia. Na mama ka page ngaua na kakagana na gahuana.

⁴Manga go hatani hagêguritogo renira na enoni, igo ko beka. Manga go tasitasi vikana, igo ko erasigo maremu.

⁵Manga go vagevagesia na eraha, na suriha ki page hagaitangigo.

⁶Siana ko bagatabotabohara, i era ma ko erasigo maremu.

⁷Siana ko toratora tamasinga i era ma ko tangahurigo.

⁸Siana ko hagatarêngenia tangara na tamamu se na merongamu nga noga ma go tasitasi manga vigo pe tamasia mave.

⁹Na ani go hagarongoa renia, ngaia ki hinarugo. Ki arârâ ma ngaia ki page ruhigo renia.

¹⁰Manga go rongoa ta na marâ, hoi, go naka so i na aitangihamu ma ko meme henia. Siana ko magu. Ngaia ki asa vige katogo ku raboa!

¹¹Na enoni bekabekaga i uhungia vi pinihia na marâ i rongoa, ngaia ki harate tamasinga manga na gete i harate kare.

¹²I na ara ni matena i rongoa na marâ tanga i pinihi, na marâ ki susu igê na aitangihana manga na mage i susu igê na tangana.

¹³Matena go rongoa na tamamu i aharê igê ta na marâ, go hagatea renia. Vari i pe monari. Ma ki manga i monari, go girara, hanana vi siana ngaia ki katoa akê nikâ.

¹⁴Manga go rongoa na tamamu i tamasia na marâ i pe araria vige tamasia, go hagatea renia. Vari ngaia ki pe tamasia. Ma ki manga i monari, go girara, hanana vi siana ngaia ki tamasia akê nikâ.

¹⁵Manga go rongoa na tarana i pe oto renia na tamamu, go hagatea renia. Vari na hagaparuana ma. Hagarako na enoni ka tamasi erasira na enoni getera. Tahema siana ko gahesurigi na ara ni marâ go rongogi.

¹⁶Ta na enoni vari ki bagatatamasi purupuru. Ti na hitangika kani pe tasi noga vikana?

¹⁷Manga go rongoa ta na marâ go mangariaga renia tanga na tamamu, go hagatea renia, i era ma ko ramonia purua. Go naka vê ma tanga na ramata iana God raramohaga hunia.

¹⁸Go hagahigasia na Araha ma ngaia ki kahu takigo. Manga go nahuni takoha mataha, ngaia ki page takuigo.

¹⁹Na aitangisiha renigi na ramata iana na Araha ka na hagaotonga ni mêriha. Na ani ga hagakoro obana, ka ngaugi na guani na apinige ni mêriha hagahu.

²⁰Na hagahigasiana na Araha ngaia ka na takoha mataha. Na takoha mataha ki vi na marupeani na ramata ma na giraraha renia na raramohana raha hunia.

²¹Manga na enoni tagara ma ki pe tê viteana na ani i raha tanga ma hemuri ki tê viteana, na ani i raha tanga ki mangariaga mênga tanga.

²²Manga go giraragi ngavê na eraha, ki pe vi, vi igo ko nahuni takoha mataha. Igê na hagaotonga iata na enoni tasi ki mareha ngavê igê na takoha mataha.

²³Na giraraha tanga na eraha ki era ngavê. Tani na enoni bekabekaga ka pe nahuni giraraha rârâ.

²⁴Na enoni i tê viteana God, henaka i pe nahuni aitangisiha ma ngaia ki teharia na enoni tasi i nahuni aitangisiha.

²⁵Tani na enoni ka aharê, henaka ga nahuni aitangisiha ngavê. Tani na enoni ka nahunigi na marâ ga tenigi, suria ga hagamemesi ringeta.

²⁶Tani na enoni era ka bâbâ hemarisi ma ka bâbâ ruruhi, hanana ga hagaparugo ma.

²⁷Ngaira ka pipinihi maata ma ka pe karingago. Manga go pe hinarura, ngaira ka hagagasuga ni hagabekasigo.

²⁸Manga i barabara tangara hanana vige bagatauhata râ nga, ngaira ka page katoa râ nga igê na kere matena i ararira.

²⁹Igo ko bâbâ hagagara renia na enoni renia maana. Na maana ki hagagirara vi ngaia ki nahuni takoha se mareha.

³⁰Na gahunga iana, na mamananiha ma na râha iana ka hagabângenia na tauhana.