Read Kahua SIRAKE 2 Bible Online

SIRAKE 2 - Kahua bible

SIRAKE 2

¹Kakare, manga go obania vigo tototo suria na Araha, go nanê hanana go teharigi na bagabevoani ga page uhungigo.

²Go tâtâ nga i na agua gi tage ma ko togeaga. Go apeape haritagi, matena ga tarahugo na bagabevoani.

³Go tarisuria nga na Araha ma siana ko rumakaka renia. Vikana igo ko page tehateha matena go meme.

⁴Go aganarigi na ani mavê na tarani ga tarahugo. Go piringiape, henaka na hagamakiha hanana i tarahugo.

⁵Na golo ka uhungia igê na gi ki taranina. Na enoni i tototo suria God ka uhungia igê na gi ni hagamakiha.

⁶Go hagêguritogo renia na Araha ma ngaia ki page tamanigo. Go arâ nga surigi na tara oto iana ma ko hagêguritogo renia.

⁷Igamu hato mu hagahigasia na Araha mu naasia na takiha iana. Siana kamu murisigea, i era ma kamu vota.

⁸Igamu hato mu hagahigasia na Araha mu hagêguritogo renia ma kamu page nahunigi na meni.

⁹Igamu hato mu hagahigasia na Araha mu naasigi na mahatanga iana ni takiha ma ni vagevageha hagahu.

¹⁰Mu takusira na enoni ga oga i nago noga. I hega, ta na enoni i hagêguritogo renia na Araha, ki hagêguri baguru vari? I hega, ta na enoni i ama ni hagahigasia nga na Araha na Araha ki rumakaka renia vari? I hega, ta na enoni i avarasia na Araha na Araha ki pe aganaria vari?

¹¹Na Araha ki takigia ma ki koro tangagia. Ngaia ki bonotenigi na tasi iaka ma ki hagatahigia matena ga tarahugia na bagabevoani.

¹²Ma ki era ngavê tangara na ani ga makumakusiga ma ka mameaga ma tangara na enoni tasi ga obania viga arâ surirerua na tara gi rua, henaka na tara monari ki gi tage togo ma.

¹³I era ngavê tangara na ani ga rumakaka, suria ga pe hagêguritogo renia na Araha. Tahema na Araha ki pe anumasira.

¹⁴I era ngavê tangara na ani ga mameaga vige hagêguritogo renia na Araha. Na ta ka page katoa, matena i arâ me na Araha ki surira?

¹⁵Na enoni ga hagahigasia na Araha ngaira ka marupegi na ramata iana. Na ani ga takuia ngaira ka mauri surigi na obaniha iana tangara.

¹⁶Na ani ga hagahigasia na Araha ngaira ka uhungia viga hagakoro obana. Na ani ga takuia ngaira ka ageagesigi na ramata.

¹⁷Na ani ga hagahigasia na Araha ngaira ka nananê tare ka têtê viteana. Ngaira ka nakara so mareta i maana ma ka vivi:

¹⁸“Igami kami nakagami maremami i na ababani rimana na Araha, mareha vi i na ababani rimata na enoni, suria na takiha iana ki raha teha ngavê manga na hahanetagana.”