Read Kahua SIRAKE 20 Bible Online

SIRAKE 20 - Kahua bible

SIRAKE 20

¹Go ramonia ma na enoni igê na matena i araria. Manga i mareha, go munimuni so ma. Vikana igo ko hagabângenia na aitangisiha.

²Go hagaotoa ma na enoni. Siana ko mangariaga ngavê tanga.

³Manga go aharê, siana ko hagaiga pusigo, i era ma ko hagaratemu maremu.

⁴Manga go rekoa ta na enoni igo ko manga na mane na vâmavo i tuguria vi merongo era na kare viru.

⁵Tani na enoni ka bâ manga ga nahuni takoha mataha, suria ga pe manitavaragi. Tani na enoni ka manitavaragi. Tahema na enoni getera ka usitenira ngavê.

⁶Tani na enoni ka gâga munimuni, suria i mareha ta na marâ vige tamasia. Tani na enoni ka gâga munimuni, suria ga takusia vi mamênga na matena iata vige tamasi igê.

⁷Na enoni i nahuni takoha mataha, ki girara na matena i araria vi tamasi igê. Ma na ani i pe nahuni takoha ma ki manitavaragi, ngaia ki pe girara.

⁸Na enoni ka usitenia ngavê na ani i tamasi bâraha ma ki parêrahaga re tamasinga.

⁹Na marâ i korokoro tangago ki girara i hagavorea na marâ i aera tangago. Na marâ i aera tangago ki girara i hagavorea na marâ i korokoro tangago.

¹⁰I ta na mateni na mahatanga iamu ki pe tamanigo bê aporo ma i ta na mateni ngaia ki tamanigo kê nga nikâ.

¹¹Na enoni raha ngaira ka girara ga votavota ma ka maki ma na enoni purua ngaira ka girara ga akê me.

¹²I ta na mateni na marâ ga bâhihigaga ka tunumigo re na haga.

¹³Na enoni ka obania na ani i tamasi takotako maninga. Ma na enoni i pe nahuni takoha ki mareha, henaka i rongorongo mamaki ngavê na tamasinga iana.

¹⁴Na mahatanga iana na ani i pe nahuni takoha tangago ki asa vige tamanigo, suria ngaia ki obania vigo barua akê nikâ.

¹⁵Na mahatanga iana ka pe rako ma na gegeha iana ka akê me bâraha, ma ki tarohenigi raha rârâ. Manga go torea noga ta na marâ tenia i ngekê, i gomaha ngaia ki obania aporo nga nikâ. I hega, igo ko pe kitenia vari na enoni i manga ngekana?

¹⁶Na enoni i pe nahuni takoha, ki vi: “Inê ka usiteniê. Ngaira ka pe visiê koro renigi na hetamaniha iaku tangara. Na ani gê tamanira ka tamasi erasiê.”

¹⁷I monari, na enoni ka tamasi hagaru renia.

¹⁸Na tatavaruana ki era teharia na atoberaniha. Na enoni erataga ka gasuga ni hagarateta mareta manga na enoni i atobera ki votavota.

¹⁹Na enoni i pe haneta tare ngaia ki tamasi usuusu ma. Na enoni ga pe nahuni takoha ka katokato vikana tare.

²⁰Manga na enoni bekabekaga ma ki tamasi maramarêrava, na enoni ka pe pasi rongoa, suria i mareha vi na matena ge araria vige visia igê.

²¹Hagarako na matarehana ki hagabarasira na enoni hanana vige tasitasi. Tahema na obaerana ki pe erasia na mamaroha iata.

²²Tani ka erasira mareta, suria ngaira ka maki purua ma ma ka magutenigi na tamasinga iata na enoni.

²³Manga go surusuru tanga na tamamu, suria go maki vigu hagaiga, vikana igo ko katoa purupuru na tamamu ki merongasigo.

²⁴Na hagaparunga ka na tongo igê na tauhana na enoni ma na enoni ga pe hagatogo surira mareta ka katokato vikana tare.

²⁵Na enoni hanago ki koro teharia na enoni ni hagaparunga. Henaka, ma ngairerua hato karu hagarateterua so mareterua.

²⁶Na tauhana na enoni ni hagaparunga ki erataga. Na makiha ki gâga tare henia.

²⁷Manga go tamasi takotako, igo ko akê me bâkoro. Na enoni ni ramoha ka ageagesia na enoni ni takoha.

²⁸Manga vi ngaira ma ka obanigo, ngaira ki asa vige botage renigi na tarani go aharê igê. Vikana igo ko maratorana nga na enoni i tagara raha i mu ma ki page nahunigi rako na ngêra.

²⁹Na mahatanga ma na vatevateha ka girara ga hagagurura na enoni ni takoha mataha nikâ, hanana ga buhia so na monariha. Na marâ ngegana ka pagora, hanana siana ka tamasigi na ramoniha.

³⁰Na takoha mataha i pe vagavaga me mave ngaia ki manga na ruruguha i pinihi i ano. Ngairerua tagenaterua karu oga hagâbo.

³¹Na enoni i pinihia na bekabekaganiha iana, ngaia ki koro teharia na ani i pinihia na takoha mataha iana.