Read Kahua SIRAKE 21 Bible Online

SIRAKE 21 - Kahua bible

SIRAKE 21

¹Kakare, igo ko tasi? Siana ko katoa akê nikâ. Nungia na bonoteniha ni bani tasi iamu.

²Go hariri tenia na tasi manga vi ngaia ka na ma. Manga go karikari hagarangia, ngaia ki page garego. Na rivona ka mangagi na rivona na laione ma ka ngasingasi hunigo.

³Na ara ni aharêngiani na ramata ki manga na tatapa borahu i masi heri. Na maara i katogi ki asa vige page mavo.

⁴Na têtê paroparoana ma na pe totohesuriana karu hagamagahurugi na ruruguha ma ki kahu baguru na ruma iana na enoni paroparo.

⁵Matena na enoni matareha ka avarasia God, ngaia ki hatani rongora ma ki aganarigi na avarasiha iata.

⁶Manga go usisitenigi na hagaotonga igo ko râ surigi na tauhana na enoni tasi. Ma ki manga go magutenia na Araha igo ki urisi parongamu maninga.

⁷Vari ta na enoni ki rongo raha na atana suria vi ngaia ki na enoni ni tamasinga ma na ani i nahuni takoha ki hagakitagi na tamasinga iana.

⁸Manga go tagarahia na ruma renigi na haga iana ta na enoni, igo ko rurugi na hê tanga na ririhêana na anonanomu maremu.

⁹Na enoni ga aharê igê na ramata ka manga na page na go maria. Ngaigi ki page makaka igê na gi.

¹⁰Na tara ga arâ igê na enoni tasi ki manamanaga ma ki mave ma ki râ tanga na agua iata na enoni ga me.

¹¹Go aitangisigi na ramata ma ko kahu girara go marupegi. Manga go hagahigasia maninga na Araha, hoi, igo ko nahunia na takoha mataha monari.

¹²Na enoni i pe nahuni takoha ngaia ki pe girara vi ge hagesuringenia ta na marâ. Ma tani na enoni ga nahuni takoha ka hagaera obata ma na enoni.

¹³Na aitangisiha iana na enoni ni takoha mataha ki manga na ve oto i asa vige page mamata, se manga na ve banga ni hagaotonga koro.

¹⁴Na aitangihana na enoni bekabekaga ki manga na apira i makuru. Na giraraha ki bara vige oga tonge so igê.

¹⁵Manga na enoni i nahuni takoha ma ki rongoa na tamasinga ni takoha mataha, ngaia ki ageagesia ma ki hagatongania akê nikâ. Ma ki manga na enoni i pe nahuni takoha ma ki rongoa na tamasinga ni takoha mataha, ngaia ki usisitenia ma ki kasia râ.

¹⁶Na tamasinga iana na enoni bekabekaga ki manga na toraha higa i gaparamu, matena go arâ. Ma na tamasinga iana na enoni i nahuni takoha ki hagakoro obamu hete.

¹⁷Matena na enoni ka hekarigi, ngaira ka karinga hahutugia na tamasinga iana na enoni ni takoha ma ka aganarigi na takoha iana.

¹⁸Na takoha iana na enoni bekabekaga ki manga na ruma i aruhuruhu. Na giraraha iana kani tamasi takutaku.

¹⁹Tanga na enoni bekabekaga na hagesuringa ki manga na tugihênga se i manga na rakuha ni rima.

²⁰Na enoni i bekabekaga ki akenakena ma na enoni ni takoha ki mamanamui.

²¹Tanga na enoni i nahuni takoha na hagesuringa ki manga na mahe na golo se i manga na rabu i otona.

²²Na enoni bekabekaga ki arâ tararu banu i ruma. Ma na enoni i tototohesuri ngaia ki rêra ma noga i metara.

²³Na enoni bekabekaga ki kikirihi banu i ruma ma na enoni i tototohesuri ngaia ki rêra ma noga i metara.

²⁴Na enoni i pe tototohesuri ngaia ki kakaringa banu igê na maani ruma i purupuru. Ma tanga na enoni ni takoha ngaia ki na tarana ni makiha.

²⁵Na enoni ga tabotabohara ka tamasigi na ani mavê na marâ, henaka na marâ ga pe ararira vige tamasigi. Ma na enoni ni takoha ki tamasi takotako.

²⁶Na enoni bekabekaga ki matanga na meana ma na enoni ni takoha ki tamasi takotako.

²⁷Manga na enoni era ma ki arangenia na merongana ngaia ki arangenia so marena.

²⁸Na enoni ni hagatorainga ki erasia so marena ma na enoni i pasina ka kikitenia.