Read Kahua SIRAKE 22 Bible Online

SIRAKE 22 - Kahua bible

SIRAKE 22

¹Na enoni babaga ki manga na hê ga hehega igê. Na enoni ka vonovono erasia renia na makiha iana.

²Na enoni babaga ki manga na ae igê na maniae. Manga na enoni ma ki hataria, ngaia ki gatage renia.

³Manga na mane ma ki nahunia o karena, na mane ngekana ki maki, manga vi o karena ma ki gâga sutaga. Manga vi ka karena ma ki manga ngekana, ngaia ka hagamakaka tanga.

⁴Manga ka karena ma ki nahuni takoha, ngaia ki page auragia na mane i araria. Ma ki manga ka karena ma ki bagapuruga ngaia ki hagarugu obana o vaemana.

⁵Na kere gete i pe tototohesuri, ngaia ki hagamakirerua o vaniana ma o vaemana ma ki asa na hitangiterua vige hagahigasia.

⁶Manga go ramonia na karemu igê na matena i pe arari ngaia ki manga na kiha barebare igê na matena ni akêkuha. Ma na ramusiha ni hagaotonga ki hagabângenia tare na takoha mataha.

⁷Na enoni i hagesuria na ani i bekabekaga, ngaia ki manga i puruigi haku aporo na ameameagani na apira na hê, se i manga i hagaritea na enoni i mêru bore.

⁸Na ramateniana ta na marâ tanga na ani i bekabekaga ki manga na ramateniana ta na marâ tanga na ani i mauruagâga. Matena go ramatenia hato, ngaia ki vivi: “Na ta nga go visia ea?”

⁹Na kare ga tototohesuri ma ka akê me bâkoro igê na ara ni marâ, ngaira ka pe hagabângenia vi na enata ka na enoni purua ma.

¹⁰Na kare ga pe tototohesuri, ka paroparo ma ka ruhira na enoni getera. Ngaira ka hagamakira na apaparaha iata na enoni raha.

¹¹Go angisira nga na ani ga me suria ga oga igê na mengo. Go angisira nga na ani ga bekabekaga, suria na aitangisiha ki pe mavesira rârâ. Go angisira sisite râ ma na ani ga me, suria ga mamaro, ma ko angisira bâraha hete na ani ga bekabekaga, suria na ogaha iata ki erataga ngavê teharia na mera.

¹²Na angisiana iamu tanga na ani i meme ki surigi ma na tangiani gi pi. Ma na angisiana iamu tanga na ani i bekabekaga se tanga na enoni i pe botage renia God, ki goga suria na mêrihamu hagenani.

¹³Siana ko meratamasi bâraha na enoni ga bekabekaga. Siana ko vatugira ma ko hinarura hete, i era ma ka hagatarêngenia na bekabekaganiha tangago ma ki tarahugo nogamu na eraha. Siana ko hakunira, ma hanana go gâga igê na marapeha.

¹⁴Na ta ki higa teharia na poro ni hagakokoro? Na ta ka na atana na marâ i higa bâraha ngekana? Ngaia ka na enoni bekabekaga.

¹⁵Na one, na solo ma na aiani ka mahaha ni toraha teharia na ogaha iana na enoni i bekabekaga.

¹⁶Na nunu ki asa vige ngingia ke atasi na taketarê na ruma ga karu tarana ki nganganihaga. I tagenana ma na enoni i gatagata ngavê na takoha iana ma ki tâtâ nga igê, henaka vi na ta ki akê me tanga.

¹⁷Na enoni i bâbâ maninga hagenago igê na manitarani igê renigi ta na marâ ma hemuri ki kahu akê me igê na marâ i takusia, ngaia ki manga na apê nganganihaga ga hagamahea bâkoro.

¹⁸Na kere guani sisite na hê ga oga haku igê ta na marâ ki asa vige oga gatagata igê, matena i ramoramo na roga. I tagenana ma na enoni i mamagura ma ki hagêguritogo renia na takoha bekabekaga. Ngaia ki asa vige hagagatagata apena so marena pusia na maguha.

¹⁹Manga go husugia na maamu renia ta na marâ, na maamu ki variangiga. Manga go erasia ngavê na aitangihana na enoni, na aitangihana monari ki page vagavaga ma mave.

²⁰Manga go arihatenigi na hê tangara na manu, igo ko tarigenira vê. Manga go guharia maharamu, igo ko erasia na hemanatangeana.

²¹Manga go amuria akê na tatapa tanga maharamu, siana ko bagahagêguri, suria i matora mênga tanga muru hekorokoro aporo.

²²Manga go tamasi ramo raha tanga maharamu, siana ko takotako bâraha, suria muru girara muru hekorokoro aporo. Ma ki manga go guharia, se go ruhia, se manga go tarohenigi na tarani iana ga ararigo vigu unumigi so, se manga go ruguhia re ta na marâ, vikana maharamu ki hatohato ngavê tenigo.

²³Go katoa na enoni matareha ki hagêguritogo renigo, hanana go page vagevagesia na ramana iana. Go tamania igê na mamasiaganiaha iana, hanana i page megotongani na ruruguha i page nahunigi.

²⁴Na asêsuna ma na robona na gi karu arâ me hagenago tarana na vavatana. Na guhata ka arâ me hagenago tarana na hearihatana.

²⁵Inê ki asa vi ve magu, hanana ve anumasia baharaku. Inê ki asa vi ve usi ni tamania baharaku, matena i avarasiê.

²⁶Manga gê mamasiaga suria ngaia, na ani ga rongoa ka page hinarua.

²⁷Ti kani page hagaotoa na haraku? Ti kani page puruirerua na gaviharaku, hanana vi siana ki aharê na tamasinga iaku ma na meaku ki asa vige hagarateku?