Read Kahua SIRAKE 23 Bible Online

SIRAKE 23 - Kahua bible

SIRAKE 23

¹Araha, Vaemaku, na mêrihaku ki oga i na ababani i rimamu. Siana ko tagareniê tangarerua na gaviharaku, suria ngairerua karu atani ataka mavê. Siana ko nakarerua karu hagavotariê.

²Ti kani page ramusiê meni na takoha iaku, hanana vi na takoha mataha ke hagaotoa na aitangihaku? Vikana inê ki asa be hita râ matena gê tasitasi ma kê totongo hete renigi na tasi iaterua na gaviharaku.

³Vikana inê ki asa vive ama ni tasitasi nga se vive ama ni hagarakonigi kê nga na tasi iaku. Vikana inê ki asa vive votavota i maata na merongaku, hanana siana ke manavateniê.

⁴Araha God, Vaemaku, igo ko haganahuniê renia na mêrihaku. Gu hagatahiê tenia na paroparoha.

⁵Gu anumasiê tenigi na teniha era.

⁶Siana na hagatageha ma na vanasiha era karu aharêsiê. Siana ko tagareniê tangagi na vanasiha era ngegana.

⁷Kakare, mu karinga na hagesuringa iaku renia na tarana koro hanana ga tamasi. Manga mu arâ suria vikana, igamu ki asa vigamu tutu igê na tamasinga iami maremi.

⁸Na gaviharata na enoni tasi ka tura so ngaira mareta. Na ani ga guhaguha ma ka paroparo ka hagarateta mareta.

⁹Siana kamu tohetohe tare. Siana kamu mebare na atana apuna God.

¹⁰Na kare vurivuri ga ramusia tare ki barobaro apaparoroga na apena. Na enoni i tohetohe tare renia na atana apuna God, ngaia ki tasi.

¹¹Na enoni i tohetohe tare ki erataga ngavê ma na hagaitangiha ki oga ma me tanga na ruma iana. Manga i pe hagamonaria na tohenga iana, ngaia ki tasi. Manga i hagamamahasia na tohenga iana, ngaia ki tasi bâraha. Manga i tohe vero, na hagaitangiha ki page tarahua ma na bagabevoani ka page tarahua na ruma iana.

¹²Ta na tarana igê na tamasinga matena ga tamasi ki manga na mera. Siana hagetage ki gâga i berarogata na Isiraelita. Na enoni ga toto suria God siana hagetage ka bagatauhata vikana. Siana ka hurihuri igê na tasi ngekana.

¹³Siana kamu tamasi bera se mu hagatara bera. Na tarani ngegana ka na tasi.

¹⁴Takusirerua na enamu, matena go gâga henira na enoni ni ramoha, i era ma ka hagatarego ko bekabekaga renigi na tamasinga bera. Vikana igo ko page hagahunu, vi siana ku vora me ma ku arangenigo so maremu tanga na mera.

¹⁵Manga na tauhana na enoni kani tamasi ki rongo era, ngaia ki asa hagetage vige page naka vê i keta.

¹⁶Tani na enoni ka ama ni tasitasi nga bâraha ma ka hagamangaria ngavê na Araha. Na teniha era ramo ki manga na bagagi raha. I asa vige hunuia ma ngaia ki makaka marena. Na enoni i oga tanga ma na rongoeraniha ngaia ki asa vige kasia vê na tauhana mataro me na gi ngekana ki ngaua hagamakaka.

¹⁷Tanga na mane i oga era vikana na gete ka na gete. Ngaia ki asa vige usisi na apena mataro me ki meme.

¹⁸Na mane i gamogamo, ngaia ki takotako, ki vivi: “Ti kani girarê? I roto ikê! Na apê ka pinihiê. Ngaira ki asa vige bâsiê! Magu tanga na ta? Na Araha God ki pe tako renigi na tasi iaku.”

¹⁹Ngaia ki magutenigi ma na maata na enoni ma ki pe takusia hete vi na maana na Araha karu bâsigi na ara ni tauhata hato na enoni, henaka viga oga pinihi ngavê.

²⁰Ngaia ki bani giraragi na ara ni marâ hato hagenago tarana i hagavora na maveta ma nikâ i murina i hagavora ngaia ki giraragi mênga.

²¹Na mane ngekana ka page gasuga ni ranguia ma ka page hagaitangia igê na mahera i maata na enoni.

²²I tagenana ma tanga na gete i gamogamo ma ki apara na karena na mane getea tanga o vaniana.

²³Ngaia ki tasi bâraha. Hagenago ngaia ki aharêngia na ramata iana na Araha God. Na ruata me: ngaia ki oga erasia o vaniana. Na oruta me: ngaia ki katoa marena ki êrâ, suria i gamogamo ma ki apara na karena na mane i mareha vi o vaniana.

²⁴Na gete vikana ka page hagatamasia ma na karena ka page mamasiaga renia na bagatauhana.

²⁵Ngaira ka manga na apinige i pe kanu na vagana ma ka pe hungu na arani.

²⁶Na gete ngekana ki page rongo era tare na atana, henaka i murina i meme. Na makiha iana ki asa vige page taruhi kasia.

²⁷I murina i bani magahuru, na enoni ka page tahetara, vi i mareha rârâ ta na marâ vige teharia na hagahigasiana na Araha, se ta na marâ vige mamaki ngavê teharia na marupeani na ramata iana na Araha.