Read Kahua SIRAKE 24 Bible Online

SIRAKE 24 - Kahua bible

SIRAKE 24

¹Na takoha mataha ki ageagesia so marena. Ngaia ki tamasi ageagesia so marena i berarogata na kariana marena.

²I maata na kariana na Araha God ma i maata na angero iana ngaia ki tamasi ageagesia so marena, ki vi:

³“Inênga ka na tamasinga gê hura me tenia na harana na Araha God raramohaga hunia. Inê kê gahuia na maveta manga na vaha i susu.

⁴I pasiku kani avorana na vavearo ma na atohaku ki oga igê na u na vaha.

⁵Inê geteê ma kê rihia na vavearo i rihu ma kê arârâ surigi na rutuni na maveta.

⁶Inê kê marungira na maveta hagenani ma na navo i avoa ma na ara ni marê ma na enoni hato igê.

⁷Inê kê bâbâ i na ara ni agua renia na agua vigê gâga igê i tagua i maveta, hanana vi gê gâga hagahu igê.

⁸Hemuri God, i hagavorê ma ki hagavorara na arâ ni marâ hato, ngaia ki hagatorê vi i he kanigê gâga igê. Ngaia ki vi: ‘I pasimu kani i Isiraele. Na raraha iana o Jakobo ka na kariamu.’

⁹Ngaia ki bani hagavorê me i nago tarana na maveta, i nago tarana i nago noga kerevê noga ma inê kê page gâga hagahu tare ki bê ki arâ.

¹⁰Inê kê tagara tanga igê na ruma na gahu apuna iana ma hemuri i pasiku kani igê na hungana i Sione.

¹¹Ngaia ki kasiê kê gâga tare i hinua raha manimani iana ma kê marungia i Jerusaleme.

¹²Inê kê vagavagaraga i berarogana na hagosi ninuni i rongo raha na atata. Na Araha ki bani atera ka vora re na kariana marena.

¹³Inê kê raharaha manga na apinige oto i Libanone, manga na apinige bâkoro igê na hungani i Heremone,

¹⁴manga na ni i Engeti, manga na mahe bâkoro i Jeriko, manga na apinige ni olive igê na bena, manga na apinige i akê bâkoro hagarangia na ve.

¹⁵Na vanuhaku ki sigini koro manga na ago, se manga na tavona na gatoga, se manga na oile i sigini koro ngavê, se manga na marâ i sigini koro ga sungia i ruma na gahu apuna.

¹⁶Na araku ka arubebe, ka bâkoro ma ka bâhagavagevage.

¹⁷Inê kê hisihisi manga na varona na vaini. Inê kê takataka ma kê rasirasi renigi na guaku koro ngavê.

¹⁸Inê kê hagavoregi na morani na hetakuiha, na hagahigasiana, na aitangisiha ma na naasiha, suria inê kê bani oga me i nago tarana i nago kerevê noga. Na ani i hagavorê ki haganahunira na kareku hato reniê inê.

¹⁹Mu râ me igamu hato mu barigiê ma kamu ngê masu renigi na guaku.

²⁰Na takusiha aporo reniê inê ki mamaki teharia na pirui. Na nahuniana reniê inê ki mamaki teharia na pirui taranina.

²¹Mu ngauê ma kamu page magêsiê tare. Mu tunumiê ma kamu page pasi tonomiê tare.

²²Mu têtê viteaku ma igamu ki asa vigamu page maki. Mu rongoê ma igamu ki asa vigamu page tasitasi.

²³Na takoha mataha ka na ramata, o Moise i bonasigia hanana viga marupegi. Na takoha mataha ka na Suruheri iana na Araha God, i naka henigia, hanana i gâga henigia tare.

²⁴Mu tototo suria tare nga na Araha. Mu taua gatagata, hanana i hagaramonigamu. Na Araha raramohaga hunia ngaia getea ma ki God. I mareha vi tani râ nikâ.

²⁵Na ramata ka vunu ahaharê renia na takoha mataha mangarerua na ve i Pisone me Tigirisi, matena garu tata berabera igê na matena ni hunguta.

²⁶Na ramata ka vunu ahaharê renia na aitangisiha mangarerua na ve i Uparatesi ma i Jotano igê na matena ni opaha.

²⁷Na ramata ka marora renigi na hagesuringa koro mangarerua na ve i Nile ma i Gihone garu marora igê na matena ni husinga ni vaini.

²⁸I mareha rârâ ta na enoni, henaka i nago se i hemuri me, vige aitangisia maninga na takoha mataha hagenani,

²⁹suria na takotako iana ka raha teharia na asi ma ka kokoro ngavê teharigi na rutuni i asi.

³⁰Inê, inê kê manga na âpavoro i gogo igê na ve tenia na ve oto tanga na mu.

³¹Inê kê tako, kê vi: Inê be torea na ve tanga na pariki ni apinige ni ngauha iaku ma tangagi na ukumako ni mahe. Ma ke bâ, na âpavoro iaku ki vora re na ve oto ma na ve oto ki vora re na asi.

³²Inê kê obania vi na hagesuringa iaku ke mave manga na arito i raboa ma ke râ hagatê ngavê na taketakena.

³³Inê be nganga renia na hagesuringa iaku manga vigê tamasi poropete, hanana gê haganahunira na enoni i hemuri me renia.

³⁴Hoita, mu tahetara nga, vi inê kê pe tagara raha tangê so mareku ma tangara hete na ani ga gunahia na takoha mataha.