Read Kahua SIRAKE 25 Bible Online

SIRAKE 25 - Kahua bible

SIRAKE 25

¹Na tarani gi oru gê obakoro ngavê renigi, na tarani ga hagakoro obata God ma na enoni: o vahegoata ga hekomaniheri maninga, na enoni i hinua ga hemanatange, ma na arua garu gâga igê na vagevageha.

²Na enoni gê usitenira, suria ga hagamangariê renigi na ogaha iata: na mane i baganunungi ma ki paroparo, na mane i ruruguha ma ki hagahagaparu, na meraha i bekabekaga ma ki gamogamo.

³I hega, na marâ go pe hagesuringenigi, matena go karekare, igo ko page giraragi, matena go gemêa?

⁴I koro ngavê, manga vi na mane ga gohogohoraga, ka surira na enoni igê na otoha ma ka haganahunira renigi na hagaotonga koro.

⁵I koro ngavê, manga vi na meraha ma ka nahuni takoha mataha ma na enoni raha ka nahuni aitangisiha ma na hagaotonga koro.

⁶Na tahetarana iata na gemêa ki manga na tarepuri i bêta. Na ageagesiha iata ka na hagahigasiana na Araha.

⁷Inê kê giraragi na tarani tangahuru gi tage gê ageagesigi ngavê, ma ngaia nga ka na tangahuruta: na enoni i ageagesira na karena, na enoni i tahitahi mênga ki bâsira na merongana ga votavota,

⁸na mane i êragia na gete i nahuni aitangisiha, na arua garu hearari bâkoro, na enoni i pe rongo era rârâ na harana, na enoni i pe tagara tanga na ani i pe girara manga ngaia,

⁹na enoni i nahunia na morana na aitangisiha, na ani na enoni ga pasi rongoa,

¹⁰na ani i nahuni takoha mataha, ngaia ki teharira. Ma na ani i teharira ngaira hato ka na enoni i hagahigasia na Araha.

¹¹I mareha rârâ tani vige maratorana, suria na hagahigasiana na Araha ki na tarana i raha teha ngavê i maveta.

¹²Manga go hagahigasia na Araha igo ko kahu takuia. Manga go tongesuria, igo ko kahu tototo suria.

¹³Henaka na ani mavê na mamasiaganiha ki koro ma, nga noga ma na mamasiaganiha igê na aitangihamu renia na hetakuiha. Henaka na ani mavê na eraha ki koro ma, nga noga ma na eraha na ani na gete ga hagavoregi.

¹⁴Henaka ma na ani mavê na bagabevoani ki koro ma, nga noga ma na bagabevoani na ani na merongamu ga hagavoregi. Henaka ma na ani mavê na siva ki koro ma, nga noga ma na siva na merongamu ka katoa.

¹⁵I mareha rârâ ta na marâ ge meme renia vige maratorana na ma ni garahunu. I mareha rârâ ta na mangariaganiha vige maratorana na mangariaganiha iana na gete.

¹⁶Manga ve oga i ruma gi tage henia na laione se na hua ngaia ki koro teharia vi ve oga henia na gete i hehehe.

¹⁷Manga na gete i bagamangamangariaga, na maana ki haganega ki arisuga mataro me ki bâbâ manga na o vasiga i mangariaga.

¹⁸Henaka o vaniana ki huhura ki arâ ki ngêngê henira na ani i ruma i mebasigu hetanga, ma ngaia ki mamavaso mênga, suria i obaera.

¹⁹Manga gu hagakitakitagi na eraha ngaigi hato ki kere sisite me, nga noga ma na eraha na ani na gete i hagavoregi. Na hagaitangiha tanga na enoni tasi ke tarahua nga na gete ngekana!

²⁰Na mane haritagi ki gâga henia na gete i hehehe, ngaia ki manga na meraha i tagere igê na hungana na one.

²¹Siana ki tasitasi na bêmu suria na bâkorohana na gete. Siana ko gunahia vigo torea na gete suria ma vi ngaia ki ruruguha.

²²Manga na mane ma ki oga hagêguria kaniana, na mangariaganiha, na guhaguha ma na makiha ka akê me nga.

²³Na gete i hehehe tare ki katoa o vaniana, ki bâbâ ruruhi, ki babau ma ki mamasiaga na aitangihana. Manga na gete ma ki pe hagakoro obana o vaniana, ngaia ki hagatavigi na rimana ma na êgana o vaniana.

²⁴Na tasi ki haganega i pasina na gete. Tahema igia hato ka meme suria ngaia.

²⁵Siana ko naka mavê na ve ki gogo hura tenia na marâ ni ve iamu. Siana ko naka mavê nikâ na gete i hehehe ki manitavaragi.

²⁶Manga i guguruga ngavê tangago, hoi, go kasia.