Read Kahua SIRAKE 26 Bible Online

SIRAKE 26 - Kahua bible

SIRAKE 26

¹Ki babarisi na mane i nahunia na gete koro. Ngaia ki page mauri arihu ngavê.

²Na gete koro ki hagakoro obana o vaniana ma ki katoa na ogaha hagenani iana o vaniana ki gâga igê na marapeha.

³Na gete koro ka na mahatanga koro ngavê iana na Araha tangara na ani ga hagahigasia.

⁴Henaka vi ngaira ka ruruguha se ga matareha, ma ngaira ka vagevage ma ka obakoro tare suria ngaia.

⁵Na tarani ge he ga hagamagusiê, suria ga erataga ngavê teharia na mera: na hagatorainga iata na enoni i hinua, na hakuta ninuni ga oga sutaga, na tuguriana hagaparu,

⁶ma na gete i ngaria na gete getea, suria vi hagavoregi na mamasiaganiha raha igê na aitangihata na enoni, suria na tamasinga iana ki hagamamasiagara na enoni hato.

⁷Na gete era ki manga na totora i baturia na gaparamu. Manga go uhungia vigo hagaotoa, igo ko manga go têa na garagara pinihi.

⁸Na gete i ruguhia na tonoha ki girara i hagamangarigo. Ngaia ki asa vige pinihia na bagatauhana.

⁹Na gete i rongo era igo ko bâbâ hagagara re na maana, suria na maana ki pe bâbâ ni makiha hete ma ki hagamura ma na mane.

¹⁰Manga ka karemu ma ki haritohego, go bâbâ renia tare. Manga i mareha, ngaia ki page hagasirasirego ki amane.

¹¹Manga i bagapuruga, go hahutugia nga. Siana ko konekone, matena na bagatauhana ki hagamakigo.

¹²Ngaia ki manga na enoni i mamata na riona igê na râha iana ma ki manganga ki totono na ani mavê na ve i tarahua. Ngaia ki page gâga akaka tanga na ani mavê na mane. Ngaia ki page gâga so i maana na ara ni ruma na gahu ma ki page venasia tanga na mage.

¹³Na gete koro ki hagakoro obana o vaniana. Ngaia ki girara i hagangêa o vaniana ki bâkoro na apena.

¹⁴Na gete i pe tamasi bâraha, ngaia ki na mahatanga tenia na Araha. Na totosuriha vikana ki manga na marâ i akê era na mena.

¹⁵Na gete i haritagi ka obania bâraha. I mareha rârâ ta na marâ vige maratorana na totosuriha iana.

¹⁶Na bâkorohana na gete koro i ruma iana i maningaia maninga, ngaia ki manga na arito i mave igê na ritovagana igê na vavearo iana na Araha.

¹⁷Na maana bâkoro igê na apena bâkoro ki manga na laiti mave igê na atohana i ruma ni rotu.

¹⁸Na apenêgana bâkoro igê na êgana nganganihaga karu manga na gatana na golo igê na hunana na siliva.

¹⁹Kakare, go gâga igê na apekoroha, matena go karekare. Siana ko tagara tangara na mahuara.

²⁰Go bâbâ i na agua renia na agua i ango. Go hasia renigi na ngêra iamu maremu. Go hagêgurigi na ani ni hasinga iamu maremu.

²¹Vikana na karemu ka page mauri, ka page raharaha ma ka page hagêguritogo renia na ahemata iata.

²²Na êrâ ki manga na marâ i araria vi ga pusuria. Na gete êragi i gamogamo ki hagarateta na mane i merarongo era.

²³Na mane i pe botage renigi na ramata ngaia ki page nahunia na gete ni tasi ma ki araria vikana. Ma na mane i hagahigasia na Araha, ngaia ki page nahunia na gete koro.

²⁴Na gete i bagapuruga, ngaia ki ageagesigi na tarani ni makiha. Ma na gete i haritagi ki haritagi na tauhana, henaka vi ngairerua getererua o vaniana ma ngaia.

²⁵Na gete i bagapuruga ki manga na o i borogogo ma na gete i totohesuri ki hagahigasia na Araha.

²⁶Na gete i hagahigasia o vaniana, na enoni ka visia vi na gete i nahuni takoha mataha. Ma na gete i paroparo ma ki ruhia o vaniana na enoni ka visia vi erataga. I babarisi na mane i nahunia na gete koro, suria i girara i mauri arihu.

²⁷Na enoni i raharaha na harana ma ki bagatabotabohara ngaia ki manga na ahuri tanga na hearihatana. Ma na mane i nahunia na gete vikana, ngaia ki gâga tare igê na hearihatana mataro me ki meme.

²⁸Na tarani gi rua garu hagaera obaku: na mane ruruguha i arârâ ma ki matareha ma na mane ni aitangisiha na enoni getera ka pe hagahigasira. Na oruta na tarana i katoê kê mangariaga: ngaia ka na enoni koro i voravora re na enoni era. Na Araha ki page hagaitangia ki meme na enoni ngekana.

²⁹I bara tanga na enoni ni hagavaraha haga vige pe tasi, henaka i hagavuringenigi tani ma na marâ.