Read Kahua SIRAKE 27 Bible Online

SIRAKE 27 - Kahua bible

SIRAKE 27

¹Na enoni rako ka tasi, matena ga hagavarahagi haga. Na enoni ga vanasigi na ruruguha, ngaira ka maongo.

²Tagenana manga na rapurapu i hanga i berarogaterua na hê, na tasi nikâ ki hangahanga i berarogaterua na hagavuringa ma na vuriha.

³Manga go pe nganganihaga igê na hagahigasiana na Araha igo ko hatani hagaratena na ruma iamu.

⁴Manga go gogoa na ve, na momo ka gâga so. I tagenana ma na tamasinga iana na enoni.

⁵Na bababana na gi ki uhungia vi hagakoroa na apira na hê i hahia na mane i bani tagarahia manga hanana i bâ, manga vi ngaia ki koro se i mareha. Tagenana ma na takoha ki hagabângenia vi na ani ta na enoni ngekana.

⁶Na guana na apinige ka hagabângenia vi na avanuna ki bâsuria bâkoro se i mareha. Tagenana ma na tamasinga ka hagabângenia na aitangihana na enoni.

⁷Siana ko hagarahasia na enoni, matena i mamênga vige tamasi, suria na uhungiha kani igê na tamasinga iana.

⁸Manga go gunahia na tarana i oto, igo ko girara go tarahua. Manga go katokato vikana igo ko manga go hagesuru bâkoro.

⁹Na manu haku ka oga haku. Tagenana ma na monariha. Ngaia ki gâga henira na enoni ga gunahia na monariha.

¹⁰Na laione ki gamorahia na ganiana. Tagenana ma na tasi ki gamorahia na enoni tasi.

¹¹Na tamasinga iata na enoni ga tê viteana God ka hagabângenia tare na takoha mataha. Ma na enoni bekabekaga ka riariaga manga na hageha.

¹²Manga go tahetara vi igo ko oga i berarogata na enoni ga bekabekaga go gâga hagagara ma. Ma ki manga go gâga henira na enoni ni takoha siana ko hagatata vigu arâ.

¹³Na tamasinga iata na enoni bekabekaga ka rongo era ma ngaira ka hagatara bera renigi na tarani ga era ngavê.

¹⁴Matena na enoni ngegana ka hearange, na varehumu ka ririhuruga. Matena ga hetuguri so mareta, e, go hereherepusigi na karingamu.

¹⁵Igo ko hataera, matena go rongora ga heguhaguha. Na paraparangasiha ki girara i hagavorea na nahunga ni nuni.

¹⁶Manga ta na enoni ma ki hagapêpugo renia ta na marâ ma igo ko tarohenia, i asa ta na enoni, vige hagêguritogo renigo nikâ se vige manatangenigo.

¹⁷Go takuira na tamamu ma ko tototo surira. Ma ki manga go tarohenia na marâ na tamamu i hagapêpugo renia, igo ko girara nga, vi ngaia ki hato vige manatangenigo.

¹⁸Igo ko bani hagamesia na hemanatangeana. I manga go nahu enoni.

¹⁹Tagenana manga na manu i gaha tenia na rimamu ma ki asa vige aporo me i rimamu, na tamamu ngekana nogana ki arâ ngavê tenigo.

²⁰Siana ko uhungia vigu torea aporo. I bani teha na matena. Ngaia ki bani râ manga na goti i tahi tenia na etu.

²¹Na mara ga girara ga baraigi. Na guhata ga girara ga bonotenigi. Ma ki manga go hagaerasia na hagêguritogoana iana na tamamu renigo, na berarogamurua ki asa vige page koro aporo.

²²Na enoni i rengasi maa, ngaia ki bani varoa na tarana i era ma ki asa ta na enoni vige urapusia tenia.

²³Matena i gâga henigo, na tamasinga iana ka mamaki ngavê. Ngaia ki vivi, vi na ara ni tamasinga iamu ka rongo koro era ma hemuri ngaia ki tamasi erasigo ma ki paririgi na tamasinga iamu maremu ka takego.

²⁴I mareha rârâ ta na marâ i maveta vi ve kitenia ngavê manga na enoni ngekana. Ma na Araha ki kitenia nogana.

²⁵Manga go arihatenia hagaoto na hê, ngaia ki page so me ki hitahita i bêmu. Manga go hagatakea na enoni i pe bani hinarugo, igo ko takego so maremu nogamu.

²⁶Na ani ga tagarahia na kiru na suta tanga ta na enoni, ngaira mareta ka votavota igê. Na ani ga nakanaka na etu tanga ta na enoni, ngaira mareta ka tutu igê.

²⁷Na enoni i katoa na eraha, na eraha ki tarahua bê aporo ma ngaia ki pe girara vi tanu hega ngekana.

²⁸Na enoni ga paroparo, ka guharira ma ka meramarabe na enoni getera ma na siva ki gamorahira manga na laione.

²⁹Na ani ga manavatenira na enoni ga tê viteana God, suria ga vota, ngaira ka tutu igê na etu. Na mamasiaganiha ki page ngêngê hunira ma ka kahu meme.

³⁰Na mangariaganiha ma na bagamangariaganiha karu erataga ngavê ma karu angarira na enoni tasi.