Read Kahua SIRAKE 29 Bible Online

SIRAKE 29 - Kahua bible

SIRAKE 29

¹Manga go mane ni takiha, go naka na tamamu ki kaune tenigo. Manga go tamania, igo ko marupegi na ramata iana na Araha.

²Matena i barabara tanga na tamamu, go naka ki kaune tenigo. Matena i gâga i pasimu na kaune, go hatani barua aporo rêrê.

³Go hagamonaria na tamasinga iamu, hanana na enoni ka hagêguritogo renigo. Vikana igo ko girara go kaune nikâ, matena i barabara tangago.

⁴Na enoni rako ka takusia, vi na kaune ki manga na marâ ga tarahua i tagua ma ka nahunia. Vikana ngaira ka hagamarâ apeta na ani ga tamanira.

⁵Ta na enoni ki mamaki na tamasinga iana ma ki nakanaka bêna, hanana vi kaune tenigo. Ma na matena i araria vi barua aporo, ngaia ki hagababe ma ki tamasi bêrahaga, ma ki vi: “I pe arariê vi ve barua nga i ngekê.”

⁶Henaka i girara ma vi barua aporo na kaune hagenani iana, ma ngaia ki barua aporo ma vari ta apanena, manga vi go tuguria. Manga go pe tuguria, ngaia ki asa vige barua aporo. Ngaia ki hanago ma tenigo. Ngaia ki katogo ko merongasia. Ngaia ki asa vige visigo koro. Ngaia ki arangenigo, ki guharigo ma ki pe hagahigasigo hete.

⁷Na enoni rako ka usi ngavê vige hagamarumungenia na kaune, mareha vi suria ngaira ka maongo ma suria hete ga pe obania na enoni i kaune vige hagaparura.

⁸Henaka vikana, go takira na ani ga matareha. Go hatani nakanaka tangara. Siana ko hagababera.

⁹Na Araha ki bonasigia, viga tamanira na ani ga matareha. Go tamanira, matena i barabara tangara.

¹⁰Go tamania na goamu se na tamamu renia na haga iamu, henaka i arâ su, i era ma ki kakaga igê na vaba i bemu.

¹¹Go hasigi na ruruguha iamu manga i bonasigia na Araha God renigi. Vikana ngaigi ki tamanigo teharia vigu nakagi râ tangago maremu.

¹²Go takusia vi na mahatanga iamu tangara na enoni matareha ki na tarana i raha i berarogani na ruruguha iamu

¹³ma ki roherohe pusigo tenira na merongamu teharia na bêata nganganihaga se na ora na bagora.

¹⁴Na mane koro ki hagamonaria na suruha iana, vi barua aporo na kaune iana na tamana, manga vi ngaia ma ki pe barua ngaia marena. Ma na mane i pe girara vige maki, ki mareha.

¹⁵Manga ta na enoni ma ki tamanigo vikana, siana ko bonotenia na korohana tangago, suria ngaia ki kasi manavana renigo.

¹⁶Manga go pe maki vigu kasigi purua ma na nahuninga iana na ani i vuripusigo ma ko pe obakoro tanga, igo ko tasi, suria go pe botage renia na ani i ura i murimu.

¹⁷Rako na enoni ruruguha ka vora re na enoni matareha, suria ga vurivuri pusigi na kaune iata na ani getera. Ngaira ka tarahugi na bagabevoani ga ahegenira rârâ mangagi na navo igê na asi ramo.

¹⁸Henaka vi na mane ni ramoha, ngaira ka tarigenira hura tenigi na ruma iata. Tahema ngaira ka ataka mavê re ogaha i pasita na mahuara.

¹⁹Na mane erataga i hatani surusuru vi vurivuri pusigi na kaune iata na enoni getera, suria i vanasigi ma na haga, ngaia ki hatani katogi ka arigurigu rako na tamasinga.

²⁰Hoi, go tamania na tamamu manga go girara vi go tamania ma ko hinarugi na bagabevoani ngegana.

²¹Na tarani ga raha ngavê tanga na ogaha ka na ve, na ngêra, na gahu, ma na ruma go gâga purunguni igê.

²²Henaka go matareha ma ko gâga igê na ruma i pe koro bâkoro, ngaia ki koro teharigi na magotoha ni ngêra mora i ruma iata na enoni getera.

²³Henaka go nahuni rako se mareha, i togotogo na aitangihamu renigi, i era ma na enoni ka visigo vigo oga hagêgurira.

²⁴Na hotonga suri ruma ki na tarana i pe koro, suria ngaigi ka mareha vi na ruma iamu. Tahema i bara tangago vigu tamasi purunguni.

²⁵Suria igo ko hotohoto tare, tahema na enoni ka tamasi erasigo. Henaka go hagangêra se go hagatonomira, ma ngaira ki asa vige visigo koro.

²⁶Ngaira ka vivi: “Sihoto, râ me! Hagarêgi na ngêra! Me na ngêra! Mi pasi ngê!”

²⁷Se ngaira ka vivi: “Sihoto, gu hura tarata na enoni raha. Veogaku ki arâ me i pasiku, gu hura tarana.”

²⁸Manga go takotako bâkoro, e, na tarana vikana ki hagamakigo ngavê, suria ga pe nakago ku oga ma ma ka hagamakigo manga vi igo ko ravarava haga.