Read Kahua SIRAKE 3 Bible Online

SIRAKE 3 - Kahua bible

SIRAKE 3

¹Kakare, mu karingê, suri inê ka na vaemami. Mu têtê viteaku hanana mu page tahi,

²suria na Araha ki haganahunira o vaema ni kare renia na ramoha hanana ga hagaotora na kareta ma na kare ki tuguhira ga têtê viteata kenata.

³Manga mu hagahigasia o vaemami, igamu kamu tarahua na bonoteniha ni tasi.

⁴Manga mu hagahigasia kenami igamu kamu manga na ani i rurugi na ruruguha.

⁵Manga mu hagahigasia o vaemami igamu kamu page ageagesira nogami na karemi ma na Araha ki page aganarigi na nunginungiha iami.

⁶Manga mu hagahigasia o vaemami igamu kamu page mauri arihu. Manga mu têtê viteana na Araha, igamu kamu page hagahigasia kenami.

⁷Manga mu hagahigasia na Araha igamu kamu page hagahigasia o vaemami ma kamu page têtê viteaterua na enami manga vi igamu ka na kare rakuraku iaterua.

⁸Mu hagahigasia o vaemami igê na tauhami ma na tamasinga iami hanana ngaia ki korokoro tangagamu.

⁹Na korohana na vaema ni kare ki hagagatagatanigi na ruma iata na karena ma na arangeniha iana kenata ki ruhuruhugi.

¹⁰Siana ki akê na ageagemi, suria vigamu hagamakia o vaemami, suria na makiha iana ki kasigamu so.

¹¹Na enoni ka kasigamu akê suria ma mu hagahigasia o vaemami, ma ka hagamakigamu, manga mu pe hagahigasia kenami.

¹²Kakare, go marupea o vaemamu matena i gemêa. Siana ko hagabono obana matena i tahitahi mênga.

¹³Henaka i bonobonoga, go haritagi ma ko korokoro tanga ma. Siana ko makimakitenia, suria ma vi igo ko ramo ma ko apekoro.

¹⁴Na Araha ki asa vige bonotenigi na korohamu tanga o vaemamu. Vikana igo ko hagakorogi aporo na marâ na tasi iamu ga erasigi.

¹⁵Matena i tarahugo na bagabevoana, na Araha ki takusigi aporo na korohamu ma ki page tamanigo. Na tasi iamu ka page magahuru mangagi na kârupu i sinarigi na arito.

¹⁶Na anima na enoni i rumakaka renia o vaemana, ngaia ki manga na enoni i tamasi erasia na Araha, ma na ani i hagamamasiaga kenana, na hagaitangiha tenia na Araha ki bani oga tanga.

¹⁷Kakare, gu haritagi igê na ogaha iamu ma hanana na enoni ka page takuigo teharia na ani i mahata tangara.

¹⁸Go ama ni akê nga, ko ama ni haritagi nga ma na Araha ki page obakoro renigo.

¹⁹Rako na enoni ka oga igê na tagaraha raha ma ki rongo raha na atata, ma na Araha ki hagagirarara na ani ga haritagi renigi na katoha pinihi iana.

²⁰Na ramoha ma na takiha iana na Araha karu raha teha ma ngaia ki hagagirarara na ani ga haritagi renigi na katoha pinihi iana.

²¹Siana ko uhungia vigu aitangisigi na marâ ga bara bâraha tangago se na marâ go arisigi vigu aitangisigi.

²²Go tâtâ nga igê na ramata tangago. Siana ko takoha bâraha renigi na marâ na Araha ki pe ranganigi tangara na enoni.

²³Siana ko aruma renigi na marâ go arisigi, suria na marâ ga bani hagesurigo igo renigi na enoni getera ka arisigi vige aitangisigi.

²⁴Rako na enoni ga râ tasi surigi na takotako iata mareta. Suria ngaira ka nahunigi na takoha bekabekaga, tahema ki bara ngavê tangara vige tako mataha.

²⁵Manga gu pe tonga re maamu, ki asa ma vigu bâbâ. Manga go pe girara, siana ko vivi, vi igo ko girara.

²⁶Manga go togeaga, igo ko page hagaratemu maremu. Manga na ogaha iamu ma ki perengaga igo ko page meme renia.

²⁷Na enoni i togeaga, ngaia ki page hagamamasiaga so marena. Na enoni i togeaga ki tasitasi, ngaia ki pagegi na tasi.

²⁸I bara vige hagaotora na enoni ga paroparo, suria na vagani na eraha ka so ngavê igê na aitangihata.

²⁹Na enoni ni aitangisiha ka hagesuringenigi na maramarêrava ma na maramaraveta. Ngaira ka karinga maninga suria ga obania viga girara.

³⁰Na ve ki hunuia na bagagi raha. Na mahatangana na enoni ki ahunigi vê na tasi.

³¹Na enoni i barua na tauhana na enoni getea renigi na korohana tanga, ngaia ki takusia na matena i muri me, suria matena i votavota ngaia ki page tarahua na hetamaniha.