Read Kahua SIRAKE 30 Bible Online

SIRAKE 30 - Kahua bible

SIRAKE 30

¹Na mane i takuia o karena, ngaia ki ramusia hagarako, hanana i ageagesia i muri me.

²Na mane i hagaotoa maninga o karena, ngaia ki page bâsia na mena na hagaotonga iana tanga, ma ki page tamasi ageage renia tangara o vaema ni kare getera.

³Na mane i hagesuria maninga o karena, ngaia ki ageagesia i berarogata na mane na tamana ma ki katora na mane ga merongasia ka hengaria.

⁴Matena o vaema ni kare ki meme, ngaia ki pe me monari, suria na nununa o karena kani urusia o vaemana.

⁵Matena i tahitahi mênga, ngaia ki vagevage renia ma na matena i meme, ngaia ki asa vige rugu na obana renia o karena,

⁶suria o karena ki urusia ki naka na siva tangara na merongana o vaemana ma ki korokoro bê aporo tangara na tamana o vaemana.

⁷Na enoni i apeape suria o karena, ngaia ki page baraigi na maara iana marena ma na bunaniana ki page hepehepe i na ara ni mateni i rongoa na ngereha.

⁸Manga go pe hagamanata na hosi, igo ki asa vigu katoa bâ hega. O karemu go apeape suria ki tagenana ma.

⁹Manga go apeape suria na karemu, igo ko page raruni baguru. Manga go mebare, ngaia ki page hagamamasiagago.

¹⁰Manga go mêru, ngaia ki page katogo ko angiangi ma ko page hagahunu ma ko page kurukuru rivo.

¹¹Matena i sisite, siana ko naka ma vê suri parongana. Siana ko ata ni bâbâ mavê renia matena i aharê.

¹²Go ramusia ma ko hitabaria matena i sisite mênga. Manga i mareha, igo ki asa vigu page katoa bâ hega ma ngaia ki page guguruga ngavê tangago.

¹³Go hagaotoa maninga o karemu ma ko hagatagarahia, i era ma ki page hagamakigo.

¹⁴Manga go matareha ma igo ko ramoramo ma ko apekoro, i koro ma. Ma ki manga go ruruguha ma ki mareha vigu apekoro, e, i era ngavê.

¹⁵Na apekoroha ma na bârikitaganiha karu koro teharia na golo. Na obakoroha ki koro teharigi na hê bâkoro i raha na meni.

¹⁶Na apekoroha ki raha teharigi na ara ni ruruguha. I asa ta na marâ vige katogo ku vagevage manga na obakoroha.

¹⁷Na mera ki koro teharia na obamaha maheaga. Na mamaroha i na anoano ki koro teharia na maeha hagahu.

¹⁸Henaka vi na ngêra mora, ma na matena go maeha igo ko usisitenigi. Ngaigi ki manga na ngêra go vogasia na nununa na ataro renigi.

¹⁹Na vogasiha ni ngêra tanga na ataro ki tanga na ta? Ngaia ki asa vige ngêgi se vige siginigi. I tagenana ma tanga na enoni na Araha i hagamamasiaga.

²⁰Ngaia ki bâsigi na ngêra ma ki manava so raha ki hagamarusi. Ngaia ki manga na voemavo i ruia na kere gete i bâkoro.

²¹Siana ko tagarenigo maremu tanga na obaruguana. Siana ko hagamamasiagago maremu renigi na anumanumaha.

²²Na obakoroha ki katogo ko mauri arihu ma ko vagevagesia na ogaha iamu.

²³Go vagevage ma ko obâbakoro. Siana ko anumanuma tare. I pe koro tangago. Go nakagi râ na anumanumaha, i era ma ko hagaratemu maremu renigi mangara rako na enoni.

²⁴I era ma ko me bumu. Na hengariha ma na mangariaganiha karu hagabubua na ogaha iamu.

²⁵Na enoni i obakoro ma ki togotogo na aitangihana, ngaia ki marotanigi na ngêra ma ki vagevagesigi.