Read Kahua SIRAKE 31 Bible Online

SIRAKE 31 - Kahua bible

SIRAKE 31

¹Na takoha bâraha renigi na ruruguha ki katogo ko kakasi ma ko pe mauru bâkoro.

²Na anumanumaha renia na ogaha ki manga na maeha raha ma ki hagabarasigo vigu mauru.

³Na enoni ruruguha ki tagara raha ma na ruruguha ka ama ni akê me nga. Rârâ ma ngaira ka gâga haha renigi ma ka vagevagesigi.

⁴Na enoni matareha ki tagara raha ma ki araria so ma vi ngêngê sisite. Ma na matena i hatohato tenia na tagaraha, ngaia ki ama ni matareha mênga nga.

⁵Na enoni i barigigi na ruruguha hagarako ngaia ki tasitasi. Na vanasiha ni haga ki hagatasia.

⁶Na ruruguha ki hagavotarira rako na enoni ma ki hagagasuga ni hagarateta.

⁷Na haga ki manga na etu. Na enoni i barabara i bêta, ngaira ka tutu igê. Na ara ni enoni ga pe takotako bâkoro ka tutu igê.

⁸I babarisi na enoni ruruguha i pe tasitasi, matena i tangasigi na ruruguha.

⁹Igo ko girara vari na enoni vikana? Manga vige manga ngekana, e, i ararigia ma vige hagarahasia, suria i katoa na mena, i mareha rârâ ta na enoni vige bani katoa me.

¹⁰Manga vi ta na enoni ma ke kato vikana, ngaia ki araria ge akê na ageagena renia. Ti kani nahunia na teha hanana vige aharê ma ki mareha?

¹¹Na enoni i katokato vikana, ki araria ma vi ruruguha nga ma na enoni hato ka page hagarahasia renia na korohana.

¹²Kakare, matena go gâga igê na ngêra raha ma ko bâsigi rako na ngêra koro, siana ko unumi na musumu renigi, ko vivi: “E, na ngêra noga!”

¹³Siana ko hagabângenia, vi igo ka na enoni ni ngê heparaniha. Igo ko bani girara vi na tarana ngekana ki erataga ngavê teharigi na ara ni tarani hato getigi. Na tarana ngekana ki katogi rako na matoaniha.

¹⁴Siana ko ngêngê hepara. Siana ko sukurira na enoni, hanana vi go tavotavo na ngêra hagenago tarata.

¹⁵Go takusira na enoni getera. Go katora igê na tarana go obanira viga katogo nogamu renia.

¹⁶Matena go ngêngê, go ngêngê manga ko hanana nogana na enoni i ngêngê. Siana ko mamatamu raha se vigo banuhebêmu. Na enoni ka kitenia na tarana ngekana.

¹⁷Na tarana i koro hete kanigo hagenago ko ngêngê kasigi na ngêra. Siana ko ama ni banuhebêmu nga renigi, i era ma ko katora na enoni ka hataera.

¹⁸Manga ga rakorako na enoni igê na ngêra, siana ko hagenago ko tavotavo na ngêra.

¹⁹Manga na enoni i tototohesuri, ngaia ki pe hagatage ngêra, i era ma ki boeboe matena i tâtâ i bea iana.

²⁰Na enoni i masumasu aharêngia, ki hasigi na obana ki bara vige mauru ma ki mâmâga na obana. Ma ki manga go pe masumasu aharêngigo, igo ko girara go mauru bâkoro igê na bungiana ma ko riterite apekoro.

²¹Manga ga tugurigo ko masumasu aharêngigo ma ki hasigi na obamu, go arâ ko momoa hanana go kahu korokoro aporo.

²²Kakare, go karingê ma ko têtê viteaku ma i ta na tangiana igo ko page visiê koro renigi na hagaotonga iaku tangago. Igê na ara ni marâ siana ko hagateha renigi, i era ma na maeha ki tarahugo.

²³Na enoni ka ageagesia na avanu ni ngêra i mahata ma ka hagarahasia, suria i araria vikana.

²⁴Ma na enoni hato i hinua ka page hagagege renia na avanu ni ngêra i migimaongo na ngêra ma ki ararira nga viga hagagegege.

²⁵Siana ko paroparo renia na tonoha, suria na vaini ki tanumira ma ki erasira rako na enoni.

²⁶Manga go anumia i ve na aiani i karekare ni sivi, igo ko hagatanga monari renia vi ngaia ki rate. Tagenana na tonoha ni vaini ki hagabângenigi na aitangihata na enoni paroparo, matena ga totono ma ka hetuguri.

²⁷Na vaini ki katogo ko mamêriga, manga vi go pe hagateha renia. I hega, vigo mamêriga vari manga vi marehasigo na vaini? God ki hagavora na vaini tanga ga mamêriga renia.

²⁸Manga go totono na vaini igê na matena tanga ma ko pe hagateha renia, ngaia ki hagakoro obamu ko bâbâ rikitaga.

²⁹Manga go hagateha renia na tonoha ni vaini, ngaia ki katogo ko mangariaga, ko tamasi ramo, ko obaera ma i hemuri igo ko page maki.

³⁰Manga na enoni bekabekaga ma ki ruguhia na tonoha, ngaia ki bagamangamangariaga, i marusi na apena ma ki votavota. Ngaia ki haganega na hearihatana ma ki mamari.

³¹Manga igo ma ta na enoni ma kamuru totono, siana ko hagamangaria. Siana ko memarabe matena i tono ki vagevage. Siana ko hagagegege renia, se vigo nungia ki barua aporo na kaune iana tenigo.