Read Kahua SIRAKE 32 Bible Online

SIRAKE 32 - Kahua bible

SIRAKE 32

¹Manga viga atego ko bâbâsuria na magotoha, siana ko parunigo renia. Go tagenamu ma henira na enoni getera. Go hagagarara hagenago na enoni getera igê na magotoha ma ko kahu gâga so nogamu.

²Matena i hatohato na tagaraha iamu, igo ko girara go kahu gâga so ma ko vagevagesira. Ngaira ka page hagarahasigo renia na tagaraha koro iamu.

³Manga go gemêa, ki ararigo go tamasi ma ko tamasi igê nga na matena tanga. Go tamasigi ma na marâ ga arari vigo tamasigi, i era ma ko hagabarasigi na kiha ma na mâha.

⁴Igê na matena ni kiha, siana ko tamasi bâraha. Siana ko parunigo renigi na tamasinga iamu igê na matena i mareha vi na matena tanga.

⁵Na kiha igê na magotoha ni vaini ki manga na hê memera i raha teha na mena igê na mahe na golo,

⁶se i manga na hê maravarava i raha na mena.

⁷Manga go karekare, siana ko tamasi, nga noga ma i tuguhigo. Go tamasi hagetage se hagerua togo ma, ma ki manga ga hagatorago vigo tamasi.

⁸Go tamasi ma na marâ ga arari vigo tamasigi. Go atata barobaro râ ma. Go hagabângenia, vi igo ko nahuni aitangisiha ma ko obania vigo munimuni so ma.

⁹Manga vigo goga henira na enoni raha, siana ko katokato manga vi igo ko maratorata. Matena go tamasi, siana ko totora voro re tamasinga.

¹⁰Na tarohana koro na enoni i haritagi ki hagenago tarana manga na marangeia i hagenago tarana na akuruha.

¹¹Go arâ tenia na magotoha igê nga na matena i tuguhira na enoni viga herâhi. Siana ko nganingani mataro me ko hagemuri. Siana ko ahorohoro rârâ. Go ototo râ nga hete i pasimu.

¹²I ngekana igo ko girara go vagevage suri parongamu ma siana ko tasitasi renigi na tamasinga ni paroparoha.

¹³Go visia raha hete God i hagavorago ma ki hagavagevagesigo renigi na manimarâ koro.

¹⁴Manga go hagahigasia na Araha, igo ko aganarigi na hagaotonga iana tangago. Ngaia ki korokoro tangara na enoni ga riteritehia na nunginungiha.

¹⁵Gu hagesuringenigi na ramata iana ma ko kahu aitangisigi ma ko katogi. Manga go usisitenigi, igo ko page vota.

¹⁶Manga go hagahigasia na Araha, igo ko page aitangisigi na ramata iana ma ko page hagahurasigi mave na morani na girarani.

¹⁷Na enoni tasi ki pe botage renigi na hagaotonga ma ki horogi na ramata ka bagagirarani tanga so marena.

¹⁸Na enoni ni takoha ka aganarigi na hagaotonga ma na enoni paroparo ma na ani ga pe botage renia God ngaira ka pe mamakuku vige aharê.

¹⁹Go takotako hagenago ma ko kahu katoa ta na marâ, i era ma ko hagahunigo maremu.

²⁰Siana ko arâ suria na tara i sutasutaga, i era ma ko tapasu igê na hê igê.

²¹Siana ko arâ suria na tara iata na enoni tasi,

²²i era ma ko hagahunigo maremu.

²³Go hinahinaru igê na ara ni marâ go katogi. Vikana igo ko marupegi na ramata iana na Araha.

²⁴Na enoni i tongesurigi na ramata, ngaia ki marupegi. Na enoni i hagêguritogo renia na Araha, ngaia ki asa vige raruni baguru renia.