Read Kahua SIRAKE 33 Bible Online

SIRAKE 33 - Kahua bible

SIRAKE 33

¹I asa na eraha vige tarahua na enoni i hagahigasia na Araha. I na ara ni mateni na eraha ki hagarangi me tanga, na Araha ki hagatahia tenia.

²Na enoni i usisitenigi na ramata, ngaia ki pe takotako maninga. Na enoni i pe botage renigi na ramata ngaia ki manga na haka na asi ramo i arihatenia rârâ.

³Manga go nahuni takoha mataha, igo ko hagêguritogo renigi na ramata. Igo ko hagêguritogo renigi na ramata manga go hagêguritogo renia God manga vi tamasi ototo me tangago.

⁴Go hagarêa hagenago na tamasinga iamu, hanana na enoni ka agana ka karingago. Go hakugi na giraraha iamu ma ko kahu tamasi.

⁵Na takoha iana na enoni i pe nahuni takoha ki arigurigu manga na marâ i arige.

⁶Na enoni i memarabe na tamana ngaia ki manga na hosi mane i siginia na ani i borogogo ma ki angiangi, henaka vi ta na enoni ki tagiria.

⁷Na mavetana na arito ki mave i na ara ni tangiani igê na harisi. Tanu hega ta na tangiana ki koro teharia ta na tangiana?

⁸Ngaigi ki hehegitigi, suria na Araha ki katogi vigana suria na katoha iana. Tani ka na tangiani ni mamaroha ma tani ka na tangiani raha.

⁹Tani ngaia ki nakagi ka tangiani raha ni rotu ma tani ka na tangiani purua ma.

¹⁰Na ara ni enoni hato ka vora me tenia na mako manga o Atama.

¹¹Ma na Araha i tako mataha ngavê ki katora ka pe tagenata ma ka nahunigi na tagaraha ga tora hegitigi.

¹²Tani ngaia ki koro tangara ma ki kasira akê. Tani ngaia ki katora ka tê viteana ma ka ngahisia. Tani ngaia ki arangenira ma ki kasira so ka hato tenigi na tagaraha iata.

¹³Na mako ki oga i ruguhana na raramohana na mane i tagarahia manga hanana i obania. Igia ki tagenana ma nikâ. Igia ka oga i rimana God i hagavoragia, hanana i haganahunia na ara ni hitangika renia na ta ki takusia.

¹⁴Na koroha ki tora getea ngavê tenia na eraha. Na mêriha ki tora getea ngavê tenia na mera. Na tê vitana na Araha ki tora getea ngavê tenia na tasi.

¹⁵Bâsia, na Araha God ki katogi na ara ni marâ ka tonga ma tani ki tora getea ngavê tenia tani.

¹⁶Tangê, inê, henaka gê akê hemuri me, inê kê pe makumakusiga igê na tagaraha iaku. Inê kê manga na mane i husigi na vaini ga hagahitagi so na enoni ni husinga ni vaini. Ma na Araha ki koro tangê ma inê kê huhu rako teharira ngaira. Inê kê manga na mane ni husinga ni vaini i vunuvunu na agua i rusirusi igê.

¹⁷Ma kamu girara nga, vi inê ki mareha vive tagara bâraha tangê so inê mareku ma ma tangara hete na enoni hato, ga gunahia na hagesuringa.

¹⁸Mu karingê, igamu mu nahuni ramoha i pasita na enoni ma igamu nikâ mu hagesurira na kariami i ruma ni sukuru.

¹⁹Matena go tahitahi mêngago, siana hagetage ko naka o karemu, se kaniamu, se o goamu, se na tamamu ke raharaha tangago. Siana ko haganahunia ta na enoni renigi na nahuninga iamu, i era ma ko hagahunu renia ma ko gunahigi aporo.

²⁰Matena go manavaso mêngago, siana hagetage ko naka ta na enoni vige raharaha tanga na ogaha iamu.

²¹I koro hete vi na karemu ka goga hagêgurigo igo teharia vi igo ko goga hagêgurira ngaira.

²²Go raharaha tangagi na ara ni marâ, i era ma ki rongo era na atamu.

²³Igê nga na tangiana i arâ tanga vigo meme igê, ma siana vi hagenago tarana, igo ko votogi na nahuninga iamu tonganira na ani i oto tangara viga nahunigi hegitigi.

²⁴Na ngêra, na mata ma na toraha ka tanga na tonki. Na ngêra, na tagaraha ma na ramoniha ka tanga na kare rakuraku.

²⁵Manga go hagatagarahia na kare rakuraku iamu igo ko apeape haritagi. Ma ki manga go pe hagatagarahia, ngaia ki obania vi arâ suri parongana marena.

²⁶Na toraha ma na baroha karu hagamanata na puruka ni tagaraha. Na ramusiha ma na hagatavatavaniha karu tanga na kare rakuraku i guguruga.

²⁷Go hagatagarahia nga ma siana ko hagabare suria, i era ma ki gâga sutaga.

²⁸Na tagaraha kani araria. Ma ki manga i guguruga tangago, go hagahunagi na êgana.

²⁹Siana ko hagatutunguhia. Siana ko katoa igê na tarana i pe oto.

³⁰Manga go nahunia na ani gi tage na kare vurivuri, go katoa igê na tarani go obanira na enoni viga katogi tangago igo, suria igo ko vuria renigi na haga go mava renigi

³¹Go katoa manga vi ngaia ka na goamu, suria go obania tanga na mêrihamu maremu. Manga go katoa bera ma ki gavagava, i he kanigo page tavoa igê? I bara!