Read Kahua SIRAKE 34 Bible Online

SIRAKE 34 - Kahua bible

SIRAKE 34

¹Na naasiha baguru ka hagaparura na enoni bekabekaga ma na maruteha ka hagabekasira.

²Na enoni i tongesurigi na maruteha, ngaia ki manga na ani i uhungia vi taua na mamarugana ta na marâ, se i uhungia vi ranguia na roga.

³Na maruteha ki manga na kilasi ni surasura bê. Na nunumu igê ki taketake me tenia na maamu monari.

⁴I hega, na marâ i pe matarotaro ki girara i hagavorea vari na marâ i matarotaro? I hega, na hagaparunga ki girara i hagavorea vari na monariha?

⁵Na maruteha, na girarasiha ma na matuha ngaigi ka na hagaparuana ma. Na aitangihamu kani katogo kê ma ko bâsigi na marâ go obania vigo bâsigi.

⁶Manga vi na Araha God ma ki pe hagamarutego, siana ko tongesuria na maruteha iamu.

⁷Na maruteha ka hagaharora rako na enoni. Ngaira ka tongesurigi râ ma hemuri ka raruni era renigi.

⁸Ngaigi mareni na ramata ka uhu ma ka pe obanigi na hagaparuani ngegana. Na takoha mataha i râ me tenia na enoni ni monariha ngaia nikâ ki uhu.

⁹Na enoni i râha rârâ hagarako ngaia ki giraragi na manimarâ. Ngaia ki nahuni giraraha ma ki tamasi igê na aitangisiha.

¹⁰Na enoni i tahetara renigi na manimarâ ngaia ki aitangisigi na manimarâ. Manga go râha rârâ hagarako, igo ko page manisingenigi rako na marâ.

¹¹Igê na râha rârâ iaku mareku inê kê bâsigi rako na marâ. I asa vi ve visigi hato.

¹²Hagarako inê kê haga ni meme nga ma God ki hagatahiê.

¹³Na enoni ga hagahigasia na Araha, ngaira ka page tahitahi, suria ngaira ka hagêguritogo renia na Araha i girara i hagatahira.

¹⁴Go hagahigasia na Araha hanana i asa ta na marâ vige hagamagusigo. Manga go hagêguritogo renia na Araha, igo ki asa vigu mamaguraga.

¹⁵Ga babarisi na enoni ga hagahigasia na Araha, suria ngaira ka girara, vi i he kaniga page tarahua igê na hetamaniha.

¹⁶Na Araha ki bâbâsurira na ani ga takuia. Ngaia ki manga na bêata nganganihaga tangara ma ki hagaramonira. Ngaia ki hagarukuhira tenigi na roga mahana ma ki hagamamarusira tenia na bababana na ritovagana ma ki tamanira, hanana siana ka tapasu ma ka votavota.

¹⁷Ngaia ki katora ka mamêriga ma ka bâbâ rikiriki. Ngaia ki katora ka apekoro ma ka mauri bâkoro.

¹⁸Manga go vogasia na Araha renia na marâ i mareha vi igê na otoha, na vogasiha iamu ki era ma na Araha ki usitenia.

¹⁹Na Araha God ki pe vagevagesigi na vogasiha iata na enoni ga pe tê viteana. Henaka vi hagehita ka vogasi, ma na Araha ki asa vige bonotenigi na tasi iata.

²⁰Na enoni i hanagoa na ganiana tenia na enoni matareha hanana vi vogasi renia, ngaia ki manga na ani i nahuhunia na kere mane i maana o vaemana.

²¹Na enoni matareha ka magê tare, suria i asa vige ngê masu. Na ngêra ki na mêrihata. Manga go hanagoa na ngêra tenira, igo ko nahuhunira.

²²Manga go hanagoa tenia ta na enoni na marâ i obania vi mauri renia, igo ko nahu hunia. Manga go pe vuria na enoni tagara iamu, hanana vige mauri renia, igo ko nahu hunia.

²³Manga ta na enoni ma ki tagarahia na ruma ma ta na enoni getea ki hogea, na ta ka na mena na tagaraha iaterua? Na eraha ma!

²⁴Tani ki nungia God tanga i korokoro tanga ta na enoni ma tani ki arangenia na tamana. Ti na hitangiterua na Araha ki aganaria?

²⁵Manga go hataria na gahuana na enoni ma hemuri ko mamanu, hanana go matarotaro aporo ma hemuri ko hataria aporo nikâ, na mamanuha tanga na ta?

²⁶Manga go hari ma ko kasi meni na tasi iamu ma hemuri ko arâ ko katogi akê nikâ, na hariharinga tanga na ta? Ti ki obania vi aganaria na nungi ni bonoteniha ni tasi iamu?