Read Kahua SIRAKE 35 Bible Online

SIRAKE 35 - Kahua bible

SIRAKE 35

¹Na enoni i marupegi na ramata ngaia ki manga na ani i vogasi hagarako. Na enoni i arâ surigi na ramata ngaia ki manga na ani i tagarenia na vogasiha ni ngê haku.

²Na enoni i korokoro tanga ta na enoni ngaia ki manga na ani i vogasia na Araha renia na ngêra. Na enoni i tamanira na ani ga matareha ngaia ki manga na ani i vogasia na Araha ki visia koro.

³Na enoni i murisigegi na tasi ngaia ki hagakoro obana na Araha. Manga na enoni ma ki urisi bagaparongana ma ki kasikasi mena renia, na Araha ki bonotenigi na tasi iana.

⁴Siana ko tê rahe, matena go bêbanu i ruma ni rotu iana na Araha,

⁵suria na ramata ki bonasigo vikana.

⁶Manga na enoni koro ma ki vogasi renia na ganiana ma na êbena ki gogogo so igê na bea ni vogasiha, na Araha ki aganaria na vanuhana koro.

⁷Na Araha ki aganarigi na votovoto iata na ani ga tê viteana ma ki asa vige bonotenigi.

⁸Hagarahasia na Araha renigi na mahatanga iana. Siana ko mamakuku renigi na nagoni na mu iamu.

⁹I na ara ni mateni go votovoto, go bâbâ rikiriki. Go ageage, matena go tagarenigi na ara ni tangahuruta tenigi na nahuninga iamu.

¹⁰Go mamahata tanga na Araha God tagenana manga ngaia i mahata tangago igo.

¹¹Go ageagesia ma ko mahata manga ko hanana i ararigo. Na Araha ki biribiri hurikê nikâ bê aporo tangago.

¹²Siana ko mahata tanga God, suria ma vi igo ko obania vi panepane henigo, suria ngaia ki usitenia vikana. Siana ko hagêgurigi na votovoto iamu tanga na Araha ga mareha vi igê na otoha. Ngaia ki usitenigi ngavê, suria na suriha iana na Araha ki oto. Ngaia ki asa vige bâbâ igê vi na anita na enoni ngekana,

¹³Ngaia ki asa vige panepane getea tangara na ani ga matareha. Ngaia ki aganaria na avarasiha iana na ani ga pe suria igê na otoha.

¹⁴Ngaia ki aganarigi na avarasiha iana na kare banogo. Ngaia ki rongogi na hagagegeha iana na gete na nâ.

¹⁵Na tavuni na maana ka gogo ka soso i parina, matena i hagagege renia na ani i hagamamasiaga apena.

¹⁶Go tagara tanga na Araha i mêrihamu hagenani ma na Araha ki aganarigo henigi na avarasiha iamu tanga.

¹⁷Na avarasiha iana na enoni i naka so marena ki akê ki tariha i pasina na Araha God. Ngaia ki ama ni avaravara nga igê na mamasiaganiha iana mataro me na Araha ki aganaria ma ki vatea renia na tarana i oto tanga ma ki hagaitangia na ani i hagamamasiaga.

¹⁸Na Araha ki pe hagarihu. Ngaia ki asa vige takira na enoni era. Ngaia ki page kumukumugira na ani ga pe hetaki Ma ki page hagaitangira na agua ga pe tongesuria. Ngaia ki page mutera ngavê na enoni ga paroparo Ma ki page hagavotarira na ani ga bagatauhata.

¹⁹Na Araha ki page vurira na ara ni enoni ararigi na tauhata ma na takotako iata, matena na Araha ki suria na apanena iata na kariana. Na takiha iana ki page hagakoro obata.

²⁰Na enoni ka vagevagesia na takiha iana igê na mamasiaganiha iata tagenana manga ga vagevagesia na rangi i murina na arito ru raha.