Read Kahua SIRAKE 36 Bible Online

SIRAKE 36 - Kahua bible

SIRAKE 36

¹Araha, God, gu takigami ma ku takuigami, suria go marungira na ara ni marâ hato ga oga. Gu katora na ara ni agua getera hato ke magutenigo.

²Gu hagagirarara ma ku hagaitangira renia na raramohamu.

³Renigami igami igo ko bani hagabângenia tangara ngaira, vi igo ko apuna teha ngavê. Hoi, i ngekê renira ngaira gu hagabângenia tangagami igami, vi igo ko bâ hahanetaga ngavê.

⁴Araha, gu hagagirarara ngaira manga igami, vi igo getego ma ko God, mareha vi tani râ nikâ.

⁵Gu katogi na tagaraha haoru ma na mena haoru, hanana gami tahetara renia na raramohamu raha ma ke rongo raha na atamu.

⁶Ge akê me na mangariaganiha iamu ma ke raboa. Gu mutera ngavê na merongamu ma ngaira hato ga hagamamasiagagami.

⁷Ge hatani akê me na tangiana ni suriha. Gu hagamonaria na tohenga iamu, hanana na enoni hato ke tamasigi na tagaraha raha iamu.

⁸Na ani ga uhungia viga gavagava tenigo ke ngêra na gi na mangariaganiha iamu ma ke me na ani ga hagamamasiagagami na kariamu.

⁹Gu rumurumugigi na bêta na maneraha ga merongasigami ma ka vi: “Igami nga kanigami teha! Mareha vi o ti nikâ!”

¹⁰Gu hagahakura aporo na raraha iana o Isiraele ma ku haganahunira aporo renia na agua, go bani haganahunira renia kere vê noga.

¹¹Araha, gu takira na Isiraelita, na enoni na marahumu, gu kasira akê ke bêbê ni kare iamu.

¹²Gu takia i Jerusaleme na hinua apuna iamu go bani atea hanana vigo gâga igê.

¹³I Sione ge rongo raha renigi na mena iamu ma na bâbâhamu raha ke raro i ruma ni rotu iamu.

¹⁴Gu pane henira na ani go hagavorara hagenago tatare. Gu hagamonarigi na tamasinga iata na poropete iamu.

¹⁵Go vurira na ani ga tongesurigo ma ku hagatanga monari, vi na poropete iamu ka tamasi igê na monariha.

¹⁶Araha, gu aganarigi na avarasiha iamami na kariamu manga bani hanamu.

¹⁷Vikana na enoni hato i maveta ka page tahetara, vi igo nga kanigo Araha, ko God go bani oga hagahu me tare ki bê ki arâ.

¹⁸Na ara ni ngêra ka soso i manavaka ma tani na ngêra ka koro teharigi tani.

¹⁹Na meana na enoni ki girara i namigi anaki na ganiani. I tagenana ma na enoni i karinga hahutogo. Ngaia ki tarahugi na hagaparunga.

²⁰Na enoni ni siruguhinga ki hagamamasiagara na enoni getera. Ma na enoni i aitangisia na tarana ngekana ngaia ki girara i vatea bê aporo.

²¹Na gete ki tâ tanga na anima na mane vi auragia ma na mane ki atea nga na ani ta na gete kani auragia.

²²Na bâkorohana na gete ki hagavagevagesia na mane. Ngaia ki pasi bâsia teharigi na ani getigi na marâ.

²³Na mane ki babarisi ngavê manga vi na gete ki arâ manâhi na tamasinga iana.

²⁴Na mane i auragi, ngaia ki nahunia na hunana na ogaha iana hanana i tavoraha bâkoro, suria kaniana ki na tamana i araria ma ki gatagata renia.

²⁵Manga na nahuninga ma ka pe parapararihia na mane hanago ka page hanagoa. Manga na mane ma ki pe auragi, ngaia ki ata ni arârâ mavê ma ki obaera.

²⁶Ti ki hagêguritogo renira na manero ga totora hanago surigi na hinua? I tagenana ma tanga na mane i pe nahuni ruma ma ki bagamamêruha rârâ, matena i bungisia.