Read Kahua SIRAKE 37 Bible Online

SIRAKE 37 - Kahua bible

SIRAKE 37

¹Na ara ni tamamu ka vivi: “Inê na tamamu.” Ma tani ka na tamamu hagaparu ma.

²Manga go nahunia na tamamu i koro ngavê ma ngaia ki apariri me ki merongasigo, na tarana ngekana ki hagavorea na mamasiaganiha go haga ni meme nga renia.

³Na teniha, na hagareketarana ki oga igê na aitangihaka igia hato. Ngaia ki râ me tenia i he hanana i gahuia na maveta renia na hagaparunga?

⁴Tani na enoni ka na tamamu matena ma go tavoraha bâkoro ma ka rumakaka renigo, matena ga tarahugo na bagabevoani.

⁵Ma na tamamu monari ki panepane henigo pusira na merongamu ma ki ngahingahi pusigo manga na bêata igê na hearihatana.

⁶Na tamamu monari vikana ki tâtâ tare nga igê na aitangihamu. Siana ko rumakaka renia, matena go bani akê me bâkoro.

⁷Na ara ni enoni ni hagaotonga ki vivi, vi na hagaotonga iana ki koro. Ma tani ka takusira mareta ma, mareha vi igo.

⁸Go hinaru, matena ta na enoni ki obania i hagaotogo. Go tarahua hagenago, vi na ta ka na morana na obaniha iana, suria i pe asa vi ngaia ke takusia ta na marâ tanga so ma marena. Vikana ngaia ki katogo ma vigu tamania.

⁹Ngaia ki vi tangago, ki vivi “Ngaia ngekana! Siana ko takotako hega!” Ma ngaia ki oga ki bâbâ renia na ta kani page tarahugo.

¹⁰Siana ko hagate taramu i pasina na enoni i pe hagêguritogo renigo. Go pinihia so na takoha iamu tenia na ani i hengarigo.

¹¹Siana ko hagate taramu i pasina na gete renia na ani i meheparapara, i pasina na ani i mamaguraga renia na hearihatana, i pasina na ani i hagavuri renigi na meni na marâ, i pasina na ani i vuri renia na hagavuringa, i pasina na ani i maongo renia na mahatanga, i pasina na ani i varovaro me renia na haritagiha, i pasina na ani i babaga renia na tagaraha, i pasina na ani i tagara barebare râ ma renia na hatungiana na tagaraha, i pasina na kare rakuraku i marusi renia na tagaraha raha. Siana ko hagate taramu i pasita na enoni ngegana.

¹²Ma ko hagêguritogo hete renia na ani i hagahigasia na Araha ma ki marupegi na ramata iana, hanana i obâbahaku henigo, ma ki rugurugu na obana renigi, igê na matena go votavota.

¹³Go tâtâ nga igê na hagakitakitana iamu maremu, suria ngaia ki teharigi na ani getigi na hagaotonga tangago.

¹⁴I ta na matena na akekiraga iamu ki hagagirarago teharira rako na mane ni me igê na bebetehe ga bâbâ rârâ.

¹⁵Na tarana i raha teha ngavê kanigo avarasia na Araha God, ki bêngenigo igê na monariha.

¹⁶Na takoha ki hagenago tarana na tagaraha. Go takotako ma ko kahu tagara.

¹⁷Na ara ni katoha ka vagavagaraga igê na aitangihana na enoni. Ma na aitangihana ki tâtâ nga igê na marâ ge he: na koroha ma na eraha, na mêriha ma na mera.

¹⁸Ngaigi ki akê me tenia na aitangihana ma na meana ki raha tangagi.

¹⁹Tani na enoni ka manisingenia viga hagesurira na enoni getera ma tangara so mareta ki mareha.

²⁰Tani na enoni ka manisingenia na ateateha ki arârâ ma ngaira ka mesi magêha, suria na enoni ka kikitenira surigi na tamasinga iata.

²¹Na tarana ngekana ki tarahura, suria ngaira ka pe hagakoro obana God ma ka pe nahuni takoha mataha.

²²Tani na enoni ka hagêguri vi ngaira ka tako mataha ma ka vivi, vi na takoha iata ka monari ma ngaira ka tamanira so ma mareta.

²³Na ani i tako mataha monari ngaia ki hagesurira koro na kariana ma ngaira ka girara ga hagêguritogo renia na hagesuringa iana, suria i monari.

²⁴Na enoni hato ka hagarahasia na enoni vikana ma ka vivi, vi ngaira ka babarisi, suria ga girara.

²⁵Igo ko girara go tomanigi na tangiani na enoni i mauri surigi, ma na tangiani i mauri surigi i Isiraele ki bara.

²⁶Na atana na enoni ni takoha mataha ki rongorongo raha i pasita na kariana. Ma ngaira ki asa vige page bonotenia.

²⁷Kakare, go hagatogo suria na mêriha iamu, hanana go girara na ta ki koro tanga na mêrihamu. Siana ko ngaugi na marâ ga pe koro tanga na apemu.

²⁸Mareha vi na ara ni ngêra kanige koro tangara na enoni hato. Nikâ na marotaniha iata na enoni hato ka tora hegitigi.

²⁹Siana ko ngêngê papasi na ngêra go obanigi bâraha, se vi go masumasu aharêngigo renigi.

³⁰Manga go masumasu aharêngigo, igo ko page maeha. Manga go katokato tare vikana, igo ko page maehasia na obamu.

³¹Na enoni rako ka me, suria ga masu aharêngira. Go naka vê, hanana go mauri arihu.