Read Kahua SIRAKE 38 Bible Online

SIRAKE 38 - Kahua bible

SIRAKE 38

¹I ararigo go hagahigasira na enoni ni hagakomaganiha, suria na Araha ki hagavorara tanga na tagaraha iata.

²Na giraraha iata renia na hagakomaganiha ki râ me tenia na Araha God ma na maneraha ka vurira renigi na tagaraha iata.

³Na manisingeniha iata ki kasira akê ma na enoni ni ramoha ka hagahigasira ngavê.

⁴Na Araha ki katogi na rauga ni hagakomaganiha ka akê i maveta ma na enoni ni takoha ka pe usitenigi.

⁵I hega, na apinige ki pe hagamamakia vari na ve i mahe, hanana i hagabângenia na raramohana na Araha?

⁶Na Araha nga kani haganahunira na enoni renia na giraraha renigi na rauga ni hagakomaganiha, hanana igia ka hagarahasia renigi na mena iana.

⁷Na ani ga aitangisigi na rauga ngegana ngaira ka tagarahigi tanga na hagakomaganiha ma ka hatungigi na haraniha ma na maeha renigi. Na tagaraha iana na Araha ka ama ni arâ nga, suria i haganahunira na enoni i maveta renia na apekoroha.

⁹Kakare, matena go maeha, siana ko hetora huri ma ko avarasia hete na Araha ma ngaia ki page hagakomagago aporo.

¹⁰Go murisigegi na bagatauhamu ma ko kasigi râ na eraha tenia na aitangihamu ma ko togeaga ko hagakoro obana God igê na ogaha iamu.

¹¹Go sungigi na marâ i sigini koro tanga na Araha. Ma ko tagarenia na votovoto na ngêra mora tanga. Go mahata ngavê manga i ararigo.

¹²Hemuri ko unia na enoni ni hagakomaganiha, suria na Araha kani hagavora. Go têtê ngania, suria go obania nogana.

¹³I ta na mateni na apekoroha aporo iamu ki hagêguria ngaia,

¹⁴suria na enoni ni hagakomaganiha ngaia ki avarasia nikâ na Araha, hanana i girara i hatungia na haraniha ma ki hagakomagara aporo na enoni ka mauri arihu.

¹⁵Tanga na enoni i haritohea God i hagavora, ki araria i maeha, hanana i bâsia na enoni ni hagakomaganiha.

¹⁶Kakare, go angisia na enoni i meme. Go angiangi maramara, suria i rugu na obamu. Go bagia maninga ma ko hagahigasia na anoanona.

¹⁷Go angiangi raha, ke hura mave na hetakiha iamu. Go arâ suria na matena na hagahunu bungi ma ko angiangi maramara suria na tangiana gi tage se gi rua, hanana siana na enoni ka tamasigo. Hemuri ko nakara na enoni ka haganaku parongamu ma ki manava na obamu.

¹⁸Manga i mareha, igo ko page maeha renia ma ki pe bara vigu me nogamu.

¹⁹Matena i meme na ani go takuia bâraha na hetakiha iamu ki asa vige hato rêrê. Na ogaha igê na hetakiha ki manga na ogaha igê na matarehana, suria na matarehana ki hagavoregi rako na mamasiaganiha.

²⁰Siana ki aharêsigo bâraha na hetakiha. Go naka vê, i era ma ki hagamesigo.

²¹Go girara, na enoni i meme, ki asa iana vige page aporo me. Na hetakiha iamu ki asa vige tamania ngaia ma ki hagaratemu igo hete.

²²Go girara, igo ko page me nogamu. Ngaia i nanora ma igo i gomaha.

²³Matena na enoni i meme ki mamaro, na takoha iamu renia ki mamaro nga nogana. Matena i bani magahuru, go bonotenia vê.

²⁴Manga na enoni ma ki hagesuringenia na buka ni ramata ma ki obania vi aitangisia, ngaia ki araria vi nahunia na matena tanga i hagesuringenia igê. Manga vi ngaia ma ki obania na takoha mataha, siana ki aruma surigi na ani getegi na tagaraha.

²⁵Manga i he na mane i tagara i mu ki girara i voravora re na mane ni takoha mataha? Ngaia ki ageagesia ma vi sukusukurira na puruka ni tagaraniha, hanana viga tagara i mu. Na tagaraha ngekana ma kani raha i bêna. Na togoha ma kani tamasira.

²⁶Matena i hagatagarahira na puruka ka horoa na mako, na takoha iana ki tâtâ nga igê viga ototo na vutuvutu. Ngaia ki tagara bungisi ni hagangêra na togoha iana.

²⁷I tagenana ma henira na enoni tagara se na ani ga manisingenigi na tagaraha iata. Ngaira ka aruma surigi na tangiani ma na bungiani. Takusira na ani ga taritarigi na hê bâkoro i raha na meni. Ngaira ki pe meme na apeta vige taritarigi igê na nununi haoru na marâ. Ngaira ki tâtâ nga i bêta viga taritarigi na nununi na nununi ga bâbâ manga hanana. Ngaira ka tagara bungisi, hanana viga hatungigi ka bâbâ manga ngaigi.

²⁸I tagenana ma tanga na mane i putagia na aiani igê na bea ni putaha. Ngaia ki takusia vi na marâ ta kani tagarahia renia na aiani. Na bababana na gi ki singia na gavona na apena. Ngaia ki mavamava, suria na gi ki bangia. Na putaha ki hagabono karingana. Na maana karu hahutugia na nununa na marâ i tagarahia. Ngaia ki uhungia nga, hanana vi tagarahia bâkoro. Ngaia ki tagara bungisi hanana vi hatungia bâkoro.

²⁹I tagenana ma tanga na mane i tagarahia na marâ renia na mako. Ngaia ki gâga ngahisia na bea ahorohoro iana. Ngaia ki horoa renigi na êgana. Ngaia ki hahutugia na tagaraha iana. Na ara ni tarani na rimana karu katogi ngaia ki bani takusigi ki oga.

³⁰Ngaia ki pupuria na mako i marumu. Hemuri na rimana karu tagarahia manga hanana i obania. Ngaia ki hahutugia ki taruhia maninga ki togatoga. Ngaia ki tagara bungisi ki hagamatarotaroa na rarona na agua i hagabangia.

³¹Na enoni hato ngegana ka hagêgurigi na rimata ma ka manisingenigi hehegitigi na tagaraha iata.

³²Manga ge mareha, na hinua ke baguru. Vikana ki asa ta na enoni vige oga i ngekana se vige vatugia.

³³Na enoni ngegana ki asa iata vige tagara igê na gavumane se vige tê tagaraha raha. Ngaira ki asa vige enoni ni suriha, suria ga hitenigi na ramata ma vi manga i he kani arâ na kotiha. Ngaira ka pe hagesuri ma ki pe rongo raha na atata renigi na takoha mataha iata. Ngaira ka pe tamasigi na maramarêrava.

³⁴Ma na tagaraha iata ka katoa na maveta ki tavoraha bâkoro. Na marâ ma ga obania ka na tagaraha iata.