Read Kahua SIRAKE 39 Bible Online

SIRAKE 39 - Kahua bible

SIRAKE 39

¹Ma na mane i raha i bêna na hagesuringeniani na ramata iana na Araha God, ngaia ki tora getea. Ngaia ki hagesuringenigi na buka na takoha mataha iata na enoni i nago ma ka tâtâ igê na aitangihana na tamasinga iata na poropete.

²Ngaia ki nakagi igê na aitangihana na tamasinga iata na mane i rongo raha na atata ma ki manisingenia i ramatenigi na tamasinga maramaraveta.

³Ngaia ki hagesuringenigi na girarani na maramarêrava ma ki aitangisigi na hagahinga.

⁴Ngaia ki tagara tangara na maneraha ma ki gâga henira na ani ga nahuni ramoha. Ngaia ki râhigi na agua getigi, hanana i hagakitakitagi na marâ i berarogata na enoni vi na ta ki koro se i era.

⁵Ngaia ki bani riterite ma ki nunginungi i mêrihana hagenani tanga na Araha i hagavora. Ngaia ki avarasia na Araha God ki bonotenigi na tasi iana.

⁶Manga vi na Araha raramohaga hunia ma ki agana, ngaia ki haganahunia renia na aitangisiha. Na tamasinga ni takoha mataha ka tehe hura tenia na harana ma na matena i nunginungi ngaia ki visia koro na Araha.

⁷Ngaia ki nahunigi na giraraha ma na hagaotonga koro ma na aitangisiha renigi na takoha pinihi iana na Araha.

⁸Ngaia ki hagabângenia na hagesuringa i tavoa ma ki ageagesigi na ramata na suruheri iana na Araha.

⁹Rako na enoni ka hagarahasia renigi na takoha mataha iana. Ki page rongo raha na atana tare ki bê ki arâ, suria na apaparaha i muri me ki asa vige page bonotenia.

¹⁰Na enoni i na agua getigi ka page tamasigi na takoha mataha iana ma na enoni i ruma ni sukuru ka page hagarahasia.

¹¹Manga i mauri arihu, na atana ki page rongo raha teha ngavê, matena i meme. Manga i meme, matena i mamênga vige rongo raha na atana, ngaia ki togotogo ma na aitangihana.

¹²Inê be visigi tani nikâ na takoha iaku, suria inê kê vunu manga na hageha i hagenani.

¹³Kakare, mu tê viteana God, mu karingê. Mu takataka mangagi na mahe i na akerena na ve.

¹⁴Mu sigini koro renigi na vanuhani koro, manga na marâ i sigini koro matena ga sungia. Mu takataka mangagi na mahe siki. Mu kiki haku kamu hagarahasia na Araha. Mu visia koro renigi na tagaraha hato iana.

¹⁵Mu tarohenia na atana ke rongo raha. Mu ki henigi na kita kamu hagarahasia vikê:

¹⁶Na tagaraha hato iana na Araha ka koro ngavê. Na bonasiha iana ka vagavaga me mave igê na mateni tange.

¹⁷Siana kamu hagate, kamu vivi: “Na ta ikê? Tanga na ta?” Na aramiha ka page vagavaga me mave igê na mateni tange. Ngaia ki haribona ma na ve ki hato vige gogogo ma ki manga hete ki akê. Ngaia ki marungigi na roto ni rangi.

¹⁸Matena i haribona, na marâ i obanigi ka vagavaga me mave ototo râ nga. I asa ta na marâ ge girara vige hagabarasia na raramohana ni hagatahinga.

¹⁹Ngaia ki bâsigi na tauhata hato na enoni. I mareha rârâ ta na marâ vige girara ge pinihi tenia.

²⁰Ngaia ki bâsigi haku na ara ni marâ hato, haganega me tenia na haganegahana ma tare ki bê ki arâ ma ki mareha rârâ ta na marâ vige girara ge hagagasugania.

²¹Siana kamu hagate, kamu vivi: “Na ta ikê? Tanga na ta?” Suria ngaia ki hagavoragi na ara ni marâ hato tangagi na marâ i takusigi.

²²Na korohana ki manga na ve i maganu ma ki anuia ki ango na mako i beratega.

²³Tagenana ma i horoa na ve oto ki marasiga ngavê, ngaia ki horoa na mangariaganiha iana tangara na enoni igê na agua ga pe tê viteana.

²⁴Tangara na enoni ga tê viteana na tara iana na Araha ka manamanaga. Ma tangara na enoni era ngaigi ka sutasutaga.

²⁵Tenia na haganegahana na marâ ga koro ka tâ tangara na enoni koro ma na marâ era ka tâ tangara na enoni era.

²⁶Na marâ na enoni ga obanigi bâraha tanga na mêriha teharigi na ara ni marâ getigi, kani igê: na ve, na gi, na aiani, na asi, na ngêra, na pirui, na tavoni na susu, na vaini, na gahu ma na oile ni olive.

²⁷Na marâ hato ngegana ka tamanira na enoni koro ma ka hagarateta na enoni era.

²⁸God ki hagavoragi tani na roga raha tanga ga hagaitangira na enoni. Na raramohana ka girara ga hitahita raramohaga ngavê. Igê na mateni ni hagaitangiha na raramohana ka rarata ma ka hatungia na mangariaganiha iana na Araha i hagavoregi.

²⁹Na gi, na rangi na hê, na magêha ma na mera God ki hagavoragi tanga na hagaitangiha.

³⁰Na rivota na marâ vasiga, na rorogahua ma na ma, na tatapa borahu i nahu hunira na enoni era, na Araha ki hagavoragi tanga na hagaitangiha.

³¹Ngaigi hato ka ageagesia na bonasiha iana na Araha ma ka nanê ka tagara tanga igê na mateni i obanigi.

³²Na marâ gê bani girara me i nago vê ma kê takoha renia ma kê kahu segea so, ki manga ikê:

³³Na marâ na Araha i hagavoragi, ngaigi hato ka koro ma igê na mateni tange ngaia ki votogi na marâ na enoni ga obanigi.

³⁴Siana kamu vivi: “Na ani ikê ki era teharia na ani ikana.” Suria na ara ni marâ ka koro igê na mateni tange.

³⁵Hoita, mu hagarahasia na Araha i mêrihami hagenani ma kamu kasia akê, ki rongo raha na atana.