Read Kahua SIRAKE 4 Bible Online

SIRAKE 4 - Kahua bible

SIRAKE 4

¹Kakare, siana ko usisi vigu vatera na enoni matareha na marâ ga obanigi viga mauri re. Siana ko hagababera, matena i barabara tangara.

²Siana ko hagamamasiaga na ani i magê. Siana ko katoa ki mangariaga tangago se i obaera.

³Siana ko hagepurigi akê na mamasiaganiha iana na ani i bani oga igê na mamasiaganiha raha. Siana ko hagababea na ani i barabara tanga.

⁴Siana ko usisi vigu tamania na ani i avarasigo igê na mamasiaganiha iana. Siana ko murisigea.

⁵Siana ko sirabare tenia na ani i avarasigo, i era ma ko katoa ki arangenigo.

⁶Manga i obaera ngavê ma ki arangenigo, hoi, God na Hagavoraha ki page aganaria.

⁷Go katora na enoni ga megosukuru ka takuigo. Go tubê so tangara na enoni raha.

⁸Go karingara na enoni ga matareha ma ko aramira haritagi.

⁹Go hagatahira na enoni ga mamasiaga tenira na ani ga hagamamasiagara ma ko gatagata ko surira na enoni igê na otoha.

¹⁰Go bâbâsurira na kare banogo manga vi igo ka no vaemata ma ko tamania kenata i nâ renia o vaniana. Vikana igo ko page manga o karena God raramohaga hunia ma ngaia ki page takuigo ngavê teharia kenamu i takuigo.

¹¹Na takoha mataha ki marupera bâkoro o karena ma ki hagaotora bâkoro na ani ga garia.

¹²Na ani i takuia, ki takuia ngaia nga na mêriha. Na ani i riteritehia ki garia ngaia ki page vagevage ngavê.

¹³Na ani i nahunia na takoha mataha ka page hagahigasia ngavê, ma na agua mavê i arâ igê na Araha ki korokoro tanga igê.

¹⁴Na ani ga toto suria na takoha mataha ka toto suria God apuna ngavê. Na Araha ki takuira na ani ga takuia na takoha mataha.

¹⁵Na ani i tê viteana na takoha mataha ki page surira oto na enoni i maveta. Na ani i toto suria ki page asitatara i pasina.

¹⁶Manga go hagêguritogo renia igo ko page nahunia ma ko page hagatarêngenia tangara na apaparaha iamu.

¹⁷Hagenago na takoha mataha ki page bêngenigo surigi na tara ga ahiohio. Ngaia ki page hagamagusigo ma igo ko haga ni rumakaka. Ngaia ki page uhungigo renigi na hagaotonga ma na ramata iana, mataro me ki tahetara ki girara i hagêguritogo renigo ngavê.

¹⁸Ma hemuri ngaia ki page hatani arâ me tangago ki hagagirarago renigi na tauhana pinihi ma ki page hagavagevagesigo.

¹⁹Manga go aharê, ngaia ki page rumakaka renigo ma ki page nakago vê, ko hagaratemu maremu.

²⁰Go naasia na matena koro ma ko hinarugi na eraha. Siana ko hagamakigo maremu se vigo ruhigo maremu.

²¹Na makiha karu vora gi rua: na ani i hagatasigo ma na ani i korokoro tangago ma ki ararira na enoni viga hagahigasigo renia.

²²Siana ko tangatanganigo, i era ma ko maki. Siana ko katoa na makiha ki hagavotarigo.

²³Siana ko munimuni ma igê na matena iamu vigo tamasi. Siana ko pinihia na takoha mataha iamu.

²⁴Na takoha mataha ma na giraraha iamu karu huhura me mave matena go tamasi.

²⁵Siana ko rêra pusia na monariha. Siana ko takusia vi igo ko giraragi na ara ni marâ.

²⁶Siana ko maki vigu ranganigi na tasi iamu. Siana ko uhungia vigo pepea na ve i ogogo.

²⁷Siana ko têtê ringeta na enoni bonobonoga. Siana ko panepane henira na enoni suria ma vi ngaira ka nahuni ramoha.

²⁸Go gâga nga igê na monariha, henaka go meme. Vikana na Araha God ki page roherohe pusigo.

²⁹Siana ko gasuga ni tamasi. Siana ko marusi vigu tagara se vigu tagara hagahe.

³⁰Siana ko manga na laione i pasimu suria ma vigo pe hagêguritogo renia na ruma iamu.

³¹Siana ko gasigi na rimamu tanga ma vige vatego. Siana ko rumigi na rimamu matena i tuguhigo vigo barubaru aporo.