Read Kahua SIRAKE 40 Bible Online

SIRAKE 40 - Kahua bible

SIRAKE 40

¹Rako na mamasiaganiha ka tâ tangagia na enoni. Igia ka tora higa haganega me tenia na matena igia ka hura me tenira kenaka ki râ ki tariha igê na matena igia ka bêbanu aporo igê kenaka na mako.

²Igia ka anumanuma ma ka bubununuga, suria igia ka tako bâraha renia na matena i muri, renia na tangiana ga page meme igê.

³Igia hato, henaka na maneraha igê na atohana bâkoro i tuguni bâkoro ma ki oga na taripuri i bêna, se na enoni i matareha ngavê ma ki tuguni kakaga ma ki gâga hurihuri so ma igê na rahu.

⁵Suria na ogaha hagenani iaka ka tarahugia na mamasiaganiha ma na hengariha, na sutaganiha ma na bagabevoani, na maguteniana na mera, na heparaparaniha ma na hearihatana. Henaka vi igê na bungiana matena ga tâtâ i bea, igia ka bagamamêru, ka nahuigia na takoha raha.

⁶Igia ka mauru sisite ma, se i mareha ngavê. Manga ga mauru, ki meme ngavê na apeka, manga vi ga tagara raha igê na tangiana, suria igia ka bagamamêru. Manga vi igia ka gavatenira na merongaka.

⁷Ma na matena ngaira ka sugi taugia, igia ka gasuga ni riterite ma ka konekone, suria i mareha ta na marâ vige magutenia.

⁸Na marâ ga hagamamasiagagia igia hato, igia na enoni ma na marâ mamauri getera, ma ka hagamamasiagara teha ngavê na enoni tasi,

⁹ka na mera, na hearihatana, na heariha, na nahunga ni nuni, na bagabevoani, na magêha, na maeha ma na ringa.

¹⁰Na marâ hato ngegana ka tâ tangara na enoni ga aharê. Ngaira nga kaniga hagavorea na maganuha raha.

¹¹Na ara ni marâ ga râ me tenia na mako ka aporo tanga na mako, mangagi na ara ni rangi ma na ve ka aporo tanga na asi.

¹²Na marâ, na vatevateha ma na peotoha garu hagavoregi, ka page magahuru, ma na marâ, na totohesuringa ki hagavoregi, ka gâga hagahu.

¹³Na ruruguha ga nahunigi igê na tarana i pe oto ka manga na marave se manga na akurua i raboa râ ma ki hatohato.

¹⁴Manga na enoni i mahata, ka mahata bê aporo tanga. I tagenana ma na enoni tasi i hagaratena marena.

¹⁵Na kareta na enoni tasi ka pe tataka, suria ngaira ka mangagi na rauga i gaga na vagani igê na hê,

¹⁶se ga mangagi na rauga i na akerena na ve ga maria hagenago tarani ani getigi.

¹⁷Na koroha ki hagavorea na koroha hagahu. Na takiha ni hetamaniha ki asa vige page bonotenia.

¹⁸Na enoni ki ageagesia na ogaha iana, manga vi ngaia ma ki gâga haha renigi na nahuninga iana, se i tagara raha ma ki nahunia na ogaha koro. Ma na enoni i tarahua na ruruguha raha hete kani ageagesia ngavê na ogaha iana teharirerua.

¹⁹Na enoni i apara kare ma ki haganega na hinua raha na atana ki page rongo raha hagahu. Ma na enoni i tarahua na takoha mataha, ngaia hete kani teharia. Manga na enoni ma ki nahuni togoha ma na suringa ngaia ki rongo raha na atana. Ma na enoni i auragia na gete koro, ngaia hete kani teharia.

²⁰Na tonoha ma na mâha karu hagakoro obana na enoni. Ma na êragiha koro hete kani teharirerua.

²¹Na êhihi ma na kita ka rongo koro ma na ringe i marava hete kani teharigi.

²²Na manâhiaganiha ma na bâkoroha karu bâ hagavagevage ma na mu haoru i akê bâkoro hete kani teharirerua.

²³Na enoni i nahunia na tamana se na ngahisina ki asa vige tarupe, suria garu hagaotoa bâkoro. Ma na mane i auragia na gete ni takoha mataha, ngaia hete kani teharia.

²⁴I koro tanga na enoni, manga vi tongatonga renira na goana ma na ngahisina, matena i gâga igê na mamasiaganiha, ma na takiha ni hetamaniha hete kani teharira.

²⁵Na enoni ki hagêgurirerua na golo ma na siliva ma na hagaotonga koro hete kani teharirerua.

²⁶Na nahuninga ma na ramoha karu katoa na enoni ki takotako togo. Ma na hagahigasiana na Araha hete kani girara i katoa ki takotako togo ngavê. Na enoni i hagahigasia na Araha, ngaia ki asa vige abubu igê ta na marâ ma ki pe tangasia me vi ta na marâ râ nikâ.

²⁷Na hagahigasiana na Araha ki manga na agua ni koroha hagahu. I anumasia na enoni teharia na ani i nahuni ramoha raha.

²⁸Kakare, siana ko gâga igê na ogaha ni baganunungiha. Na mera ki koro tangago teharia na baganunungiha.

²⁹Manga go gâga hagêgurira tare na enoni getera, na mêriha ta kani iamu? Igo ko hagamakigo maremu, suria go baganunungi ngêra. Na enoni i nahuni takoha ma ki oto suria marena, ngaia ki kitenia ngavê na baganunungiha.

³⁰Na enoni i baganunungi ki girara i hagamemesi ringena ma na makiha ki manga na gi igê na aitangihana.