Read Kahua SIRAKE 41 Bible Online

SIRAKE 41 - Kahua bible

SIRAKE 41

¹Mera, na takoha renigo ki mahe tanga na enoni i gâga igê na ramana, ki vagevagesigi na nahuninga iana, ki ape haritagi, suria i akê me bâkoro, ma ki ageagesigi mênga na ngêra.

²Mera, na râha me iamu ki hagakoro obana na enoni i matareha ngavê, ki ama ni soso nga na ramoha iana, ki gemêa ngavê ma ka aharêsia na anumanumaha, i guru na maana ma ki pe takotako togo.

³Siana ko magutenia na mera igê na matena tanga. Takusira na ani ga hagenago me taramu ma na ani ga hagemurigo me.

⁴Na Araha ki bani surira na marâ hato ga nahuni rogaroga ni mêriha, hanana ga meme. Tanu hega ko hagagege renia na Araha i obania vikana? Henaka go gâga na tangahuri harisi se na tangarê se na rehagaro, igê na agua iata na enoni ga bani me i asa vigu hagagege vi abubu se i arihu na ogaha iamu.

⁵Ga kikitenira na kareta na enoni tasi, suria ga oga i pasita na enoni ga pe botage renia God.

⁶Ngaira ka page tê tara renigi na nahuninga ga nahunigi tenira na enata ma na makiha ki gâga hagahu henira.

⁷Na kare ka page visira bera na enata renia na makiha i tarahura, suria na enata ka pe botage renia God.

⁸I page era ngavê tangagamu, igamu na mane mu aharê, suria mu pe râ surigi na ramata iana na Araha God.

⁹Manga ga rakorako na karemi, na bagabevoani ka page tarahura. Manga mu apara kare, na mamasiaganiha ma kaniga page aharêsigamu. Manga mu tapasu kamu votavota, na enoni ka page manavatenigamu ngavê. Ma na matena mu meme, na enoni ka page ama ni arangenigamu nga.

¹⁰Na ara ni marâ ga vora me tenia na mako ngaigi hato ka page aporo tanga na mako. Tagenana ma na enoni erataga ki tâ tangara na mera ma ki magahuru ngavê.

¹¹Na apena na enoni ki manga na kere manavaso ma ma ki magahuru râ. Matena na atana na enoni i tê viteana God ki rongo koro ma na atana i rongo koro ki asa vige page magahuru.

¹²Go metanu na atamu, suria ngaia ki gâga arihu teharigo igo, teharigi rako na ruma ni ruruguha ga vunu renigi na golo.

¹³Na ogaha koro iamu ki gâga hagarari râ ma ma na atamu i rongo koro ki gâga hagahu.

¹⁴Kakare, mu arâ suria na hagesuringa iaku tangagamu, hanana mu gâga igê na marapeha. Na takoha mataha i pe vagavaga me mave ngaia ki manga na ruruguha i pinihi i ano. Ngairerua tagenaterua karu oga hagâbo ma.

¹⁵Na enoni i pipinihia na bekabekaganiha iana ngaia ki teharia na ani i pinihia na takoha mataha iana.

¹⁶Kakare, mu karingê. Inê be hagesurigamu renigi na mateni i ararigamu vigamu maki igê, suria i ta na matena ki pe ararigamu vigamu maki.

¹⁷Mu maki i maata na enami renigi na rongoeraniha. Mu maki i maata na enoni raha ma na ani ga nahuni ramoha renigi na hagaparunga.

¹⁸Mu maki i maata na mane ni suriha renigi na ogasutaganiha. Mu maki i maata na enoni ga hekarigi renigi na aharêngiani na ramata. Mu maki i maata na tamami se na ngahisimi renigi na hagahagaparunga.

¹⁹Mu maki i maata na enoni i hinua iami renigi na hanagoha. Mu maki i maana God, matena mu pe hagamonarigi na suruha iami tanga. Mu maki, matena mu gâga nunuhigi na ngêra. Mu maki, matena mu votovoto ma makuku.

²⁰Mu maki, matena mu pe heari bê aporo. Mu maki, matena mu boretenia na êrâ.

²¹Mu maki, matena mu sirabare tenia na enoni. Mu maki, matena mu pe vatea na enoni na marâ i oto tanga. Mu maki, matena mu boretenia kaniana na mane getea.

²²Mu maki, matena mu rapasia na kere gete vurivuri iami. Siana kamu arâ i bea iana. Mu maki, matena mu guharira na tamami. Mu maki, matena mu tamasi surigi na mahatanga iami.

²³Mu maki, matena mu toratora tamasinga, se mu tarohenigi na marâ ga arari vigamu pinihigi so. Nga na mateni ga ararigamu vigamu maki renigi ngegana. Manga ngekana, na enoni ka page hagahigasigamu.