Read Kahua SIRAKE 42 Bible Online

SIRAKE 42 - Kahua bible

SIRAKE 42

¹Ikê na tarani ga pe ararigamu, vigamu maki rinigi. Siana kamu gahesurira na enoni i era ma kamu tasi.

²Siana kamu migimaki na ramata ma na suruheri iana God. Siana kamu maki, matena ga surira na enoni era igê na otoha.

³Siana kamu maki, matena mu tamanira na tamami renigi na haga igê na râha iami se igê na tagaraha ni haga iami. Siana kamu maki, matena mu tonganigi na nahuninga ga meme tenigi.

⁴Siana kamu maki, matena mu pe ravarava haga ma kamu hagararingenigi maninga ma na higahigani.

⁵Siana kamu maki, matena mu hagavarahagi na haga, henaka ga sisite se ga raharaha. Siana kamu maki, matena mu mehekarigi na enoni i hagavuri, hanana vi gurua so na mena na marâ. Siana kamu maki, matena mu hagaotora ramo na karemi. Siana kamu maki, matena mu ramusia ki mamari na kare rakuraku iamu i pe koro.

⁶Manga go pe girara vi gu hagêguritogo renia kaniamu se renia vi ga rako na enoni, siana ko maki vigu nakanaka bâkoro na marâ, hanana siana ka hanagogi.

⁷Siana ko maki vigu tomanigi na marâ ga hagavuringenigi se vigu hagararingenigi na hagahigani. Siana ko maki, vigu segegi so na marâ ga bêbanu me se ga huhura.

⁸Siana ko maki, vigu ramonia na ani i têtê bekabekaga se na meraha i rongo era henira na kere gete. Manga go katokato vigana, igo ko hagatogo surigo maremu maninga ma na enoni hato ka page hagahigasigo.

⁹Tanga na mane ka karena ki manga na ruruguha raha, i katoa o vaemana ki pe mauru bore renia, suria ngaia ki anumasia. Matena ka karena ki kare viru mênga, o vaemana ki takoha bâraha renia vi ngaia vari ki auragi. Ma na matena ka karena ki auragi hato, o vaemana ki takoha bâraha, vi i era ma o vaniana ki kitenia.

¹⁰Matena ka karena ki kere gete tatara mênga, o vaemana ki takoha bâraha vi i era ma ta na mane ki hagaerasia ka karena ki obara, matena i gâga so mênga i ruma iana. Matena ka karena i auragi hato, o vaemana ki takoha bâraha renia vi i era ma ki oga erasia o vaniana, se i era ma ki gomara.

¹¹Manga ka karemu ma ki togeaga ki arâ suri parongana marena, hoi, go hahutugia maninga, i era ma na merongamu ka megomarabe renia, ma ki era ma na enoni i pasimu ka rurusigo, ka tamasi erasigo ma ka hagamakigo. Go girara, siana ka karemu ki kikirihi hura igê na mabaha se vi i maani ruma.

¹²Siana ki rêra haha i maata na mane se i barisuri tamasinga ma henira na gete.

¹³Na hasikoko ki arâ me tenia na gahu. I tagenana ma na eraha iana ta na gete ki arâ me tenia na gete getea.

¹⁴Na mane i suraga ki koro teharia na gete i haritagi, suria na gete ka hagavoregi ma na makiha ma na tamasinga ni hataerana.

¹⁵Hoi, inê be hagatakusigamu renigi na tagaraha iana na Araha ma be tamasigi na marâ gê bani bâsigi. Na Araha ki tamasi ma, ma na tagaraha ka vora me ma na marâ hato i hagavorara ka tê viteana.

¹⁶Na arito ki mavesira so na marâ hato ma ngaigi ka hagabângenia na hanetagana na Araha.

¹⁷Na Araha ki pe haganahunira na angero iana renia na giraraha, hanana vige tamasigi na tagaraha rako hato iana, na tagaraha God raramohaga hunia i nakagi ka tâtâ hagahu renia na raramohana raha.

¹⁸Ngaia ki aitangisigi na rutuni na asi ma na aitangihata na enoni ma ki giraragi na marâ ga pinihi igê, suria na Araha God ki giraragi na ara ni marâ hato ma nikâ na marâ hato ga page akê me i muri me, henaka vi i na keta.

¹⁹Ngaia ki giraragi na marâ ga bani vora me ma na marâ ga page voravora i hemuri me. Ngaia ki hagahurasigi na marâ ga pinihi ngavê.

²⁰Ngaia ki giraragi na ara ni takotakoha hato iaka ma ki rongogi na ara ni tamasinga iaka.

²¹Igê na takoha mataha iana ngaia ki maningaigi na ara ni tagaraha hato iana. Ngaia ki bani oga me tare ma ki page gâga tare ki bê ki arâ. Ngaia ki asa vige riariaga. I asa iaka vige naka akê nikâ henia ta na marâ se vige tavoa râ tenia ngaia. Ngaia ki girara erasigi ngavê na ara ni marâ hato. Tahema ngaia ki pe obania na hagaotonga.

²²Na tagaraha hato iana ka bâkoro ngavê ma igia ka bâbâ marangani râ ma.

²³Ngaigi hato ka mauri ma ka gâga hagahu ma ka têtê viteana tare suria na katoha iana.

²⁴Na ara ni marâ ki oga na tongana i tora getea tenia ma ngairerua karu hearari. Henaka vikana, ma na ara ni marâ hato na Araha ki hagavoragi ka hagenani.

²⁵Na ara ni marâ ki hagabângenia na girarana na tongana. Ti ki bâsia makira na hanetagana God?