Read Kahua SIRAKE 43 Bible Online

SIRAKE 43 - Kahua bible

SIRAKE 43

¹E, na vavearo i bagora se i tarapa, ki bâkoro ngavê! Ngaia ki bâ hagavagevage ngavê na bâkorohana!

²Na arito, matena i raboa, ki bâkoro ngavê. Ngaia ki na tagaraha bâkoro iana na Araha God ma ki hagakonegia matena i raboa me.

³Igê na ritovagana ngaia ki sinaria na mako. Ti ki girara i rêra tanga na singihana?

⁴Na gi ki singia na enoni i hihisia ma na arito ki singigi ngavê na hungani. Na arito ki uhia na singihana ma na togatogana ki guruha re na maaka.

⁵Na Araha raramohaga hunia ki hagavora na arito i tê viteana ma ki tangotango suria na tarana.

⁶Na hageha nikâ ki mave surigi na mateni iana. Ngaia ki gâga hagahu, hanana i hagagirarara na enoni renigi na mateni.

⁷Ngaia ki hagagirarara renigi na mateni ni tangiani raha. Ngaia ki hagenani ma ki apapa.

⁸Na hageha ki torea na atana ngaia. Ngaia ki koro tanga viga bâsia i rikiriki me mataro me ki hagenani. Ngaia ki bêngenigi na marâ i vavearo matena i mave i bevoa.

⁹Na mavetani na higu ka katoa na vavearo ki bâkoro ngavê. Ngaigi ka na rêni iana na Araha ga marora i vavearo.

¹⁰Ngaigi ki oga igê na atohani na Araha God ki nakagi tangagi ma ki asa vige oga siape igê.

¹¹Bâsia na rorovagaro! Hagarahasia na ani i hagavora. Na bâkorohana ki mave ma ki bâ hagatage.

¹²Ngaia ki manga na epage na Araha God i roroa. Ngaia ki na aroroha na bâkoroha i ura i ngekana.

¹³Na Araha God ki bonasia na rangi anumaga ki rangirangi. Ngaia ki bonasia na marangeia ni suriha iana ki sisiki.

¹⁴Ngaia ki tangahigi na ruma ni vaha ma na vaha ka gaha hura manga na manu.

¹⁵Igê na raramohana ngaia ki hagavoregi na vaha puru ga ususu na êsusuni na hê ni rangi.

¹⁶Na ringena na akuruha raha ki ngingia na ano. Igê na raramohana God ngaia ki katogi na hungani ka gisigisi. Matena God ki obania, na târagina ki rêra, na maguara ka aripo ma na totomanihê ka rêra. Ngaia ki katogi na hê ni rangi ka hagavato mangara na manu se na totoha ni pê.

¹⁸Igia ka konetenigi na mahuigani ma na bâkorohani. Igia ka konekone, matena ga bâsigi i votavota.

¹⁹Ngaia ki kamusia gahuia na ano renia na korupu i rate i anumaga ngavê manga na aisi, ki bâ manga na solo ma ki masi manga na tone.

²⁰Na roga i anumaga ngavê ki rêra ma ki katoa na ve ki voravora re na aisi. Na ve ma na rano ka voravora re na aisi. Na basini ki rate manga na mane ni me i tuguni renia na kapa.

²¹Na roga mahana ma na arito ru karu katogi na hungani ma na bena ki avagavaga ma na go ka marama renia na bababaterua.

²²Ma ki page arihu ma na ara ni marâ ka mauri aporo renigi na vaha ma na korupu, ga hatungia na mahananiha.

²³God ki hagamanata na asi suria na katoha iana ma ki nakagi na marê igê.

²⁴Na mane tagara igê na haka ka tamasigi na perenga i asi ma igia ka konekone, matena ga rongogi na sihonga iata.

²⁵I asi ka oga igê na marâ ni hagakoneha igia ka pe bani bâsira: na ataka mavê na ega ma na bagaega raha hunira.

²⁶Na Araha ki katoa na ara ni hitangita na ani i hagatorangenira ki akê me bâkoro igê na tagaraha iana ma na ara ni marâ hato ka tagara suria na tamasinga iana.

²⁷Henaka vi hagehita igia ka tamasi, igia ki asa vige tamasigi ngaigi hato. Ma na tarana i rongo mataha hete kani manga ikê: Na Araha ka na ara ni marâ hato.

²⁸Manga i he kaniga girara ga hagarahasia manga ko hanana nogana i marisina? Ngaia ki raha teharira ngavê na ara ni marâ i hagavorara.

²⁹Na Araha ki bâ mamagutaga, suria i raha teha ngavê. Na raramohana ki hahanetaga ngavê.

³⁰Mu ama ni uhungia nga kamu hagarahasia na Araha, suria i bara vigamu hagarahasia manga ko hanana nogana i marisina. Mu ama ni hagahigasia nga i mêrihami hagenani, suria i bara vigamu hagahigasia manga ko hanana nogana i marisina.

³¹Ti ki bâsia? Ti ki girara i ramatenia maninga? Ti ki girara i hagarahasia manga ko hanana nogana i marisina?

³²Igia ka girara sisite râ ma. Rako na tarani raha renia igia ka pe hagaregi. Igia ka bâsigi tani ma na tagaraha iana.

³³Na Araha ki hagavoregi na ara ni marâ hato ma ki haganahunira na enoni ga toto suria renia na takoha mataha.