Read Kahua SIRAKE 45 Bible Online

SIRAKE 45 - Kahua bible

SIRAKE 45

¹Tenira na raraha iana o Jakobo na Araha ki katoa ki ura akê ta na mane koro i hagakoro obana God. Na mane ngekê ka no Moise. Na enoni hato ka hagahigasia. God ma na enoni hato ka ageagesia. Na takusiana aporo o Moise ngaia ki hagavorea na koroha.

²Na Araha ki katoa ki hahaneaga mangara na angero, hanana na merongana ka magutenia.

³I ngekana i Esipito renigi na tamasinga iana o Moise na Araha ki katogi râ nga na mena. Na Araha ki katora na maneraha ka hagahigasia o Moise. Na Araha ki vatea o Moise renigi na ramata tangara na kariana ma ki hagabângenia tanga na togatogana na bâbâhana raha hunia.

⁴Na Araha ki atea o Moise i berarogata na enoni hato ma ki hagapunaria tanga ngaia marena, suria o Moise ki toto suria ma ki haritagi.

⁵Na Araha ki metamasi ma ki unia banu igê na vaha puru ma i ngekana ngaia ki memato hetanga ma ki vatea renigi na ramata ni mêriha ma ni aitangisiha, hanana o Moise ki girara i hagesurira na Isiraelita renia na suruhuri henigi na ramata.

⁶Na Araha ki katoa o Arone ki ura akê. Ngaia kani tenia na varo ninuni iana o Levi ma ki hagakoro obana God manga o Moise o vesina.

⁷Ngaia ki naka na suruheri hagahu henia ma ki atea ki mane ni vogasiha iata na kariana na Araha. Ngaia ki hagarahasia, suria i hagatugunia renigi na tuguni bâkoro henigi na girarana vi ngaia ka na mane ni vogasiha.

⁸Na Araha ki katoa ki bâ hahanetaga ngavê. Ngaia ki hagatarêngenigi tanga na girarani ni ramoha. Ngaigi ka na gahu siki abubu, na tuguni siki borahu ma na aruha i oga igê na anga ni girarasiha. Igê na taretarena so na tuguni borahu ka kuku harahara rihu igê na marâ kukuruta

⁹henigi na kere belo na golo, hanana matena i arâ, na enoni i ruma ni rotu ka rongogi na belo ga hetagitagi: na girarana vi na Araha ki takusira na kariana.

¹⁰Na Araha ki vatea o Arone renia na tuguni apuna, ga hagamahea renigi na marâ ga hereherega, ka maravarava ma ka rotorotoaga memera. Ngaia ki vatea na anga ni matona garu oga na hê ni girarasiha gi rua i rarona: na Urimi ma na Tumimi.

¹¹Na Araha ki vatea renia na hogotekâ memera i tagarahia na enoni ni manisingeniha, renigi na hê tangahuru matarerua ga raha na meni ma ka hanga igê na golo. Ta na mane ni manisingeniha kani tagarahigi vikana. Na hê ngegana ka oga i metara na anga ni girarasiha ma ka tarigi igê na atata na varo ninuni tangahuru matarerua iana o Isiraele, hanana na Araha ki takusira.

¹²Ngaia ki vatea renia na bubuhibê ga tura igê na sigani na golo na tamasinga ga vi: “Hagapunaria tanga na Araha.” Na enoni ni manisingeniha kani tagarahia ki bâkoro ngavê. Na ani i naka i bêna ki mebâ hahanetaga.

¹³I nago tarana na matena iana o Arone ka pe bâsigi noga na marâ ga bâkoro ma hahanetaga vigana. Mareha rârâ ta na enoni, nga noga ma o Arone ma na raraha iana kaniga tuguni renigi nga ki bê ki arâ.

¹⁴I tuguhira viga vogasia na Araha renigi na vogasiha ni palaua hagerua i na ara ni tangiani ma ka susu hagamakakagi.

¹⁵O Moise ki ringia na oile ni moneha i bêna o Arone ma ki hagapunaria ki mane ni vogasiha. Vikana na Araha ki naka na suruheri henira o Arona ma na raraha iana, hanana vi ngaira ka tagara tanga na Araha mangara na mane ni vogasiha ma ka nungia na Araha, ki korokoro tangara na enoni.

¹⁶Na Araha ki atea o Arone i berarogata na enoni hato, hanana i vogasia ma ki susu tanga renigi na marâ ga sigini koro, hanana na Araha ki takusira na kariana ma ki bonotenigi na tasi iata.

¹⁷Na Araha ki hagatarêngenigi na ramata tanga o Arone ma ki haganahunia renia na ramoha, hanana i hagaotogi na berarogata na Isiraelita ma ki hagesurira renigi na ramata.

¹⁸Ta na tangiana, matena na Isiraelita ka oga igê na bagamasusu raha, tani na enoni purua ka mangariaga tanga o Moise ma ka harikato renia. Ngaira ka no Tatane, o Abirama mo Koraga henira na kariata.

¹⁹Na Araha ki bâsigi na bagatauhata ma ki mangariaga teha ngavê tangara. Tahema ngaia ki katoa na mena ma ki mutera igê na mangariaganiha iana renia na anguruna na bagagi raha.

²⁰Hemuri na Araha ki kasia akê o Arone teharia i nago. Ngaia ki vatea renigi na nagoni na mu, hanana na mane ni vogasiha ka nahunigi rako na ngêra.

²¹Na ngêra iata ka na ngêra na enoni ga vogasia na Araha renigi, suria i vatera o Arone ma na raraha iana renigi.

²²O Arone marena ki pe tonga renia na mako mangara hete na enoni getera, suria ma apanena iana ngaia, ngaia nga ka na Araha.

²³O Pinegasi karena o Eleasare ki rongo raha na atana, suria i toto suria na Araha, ma ki pe rongo raha na atana mangarerua o Moise mo Arone. Matena na Isiraelita hato ka murisigea na Araha, o Pinegasi ki pe magu vige pane henia na Araha. Tahema na Araha ki bonotenigi na bagatauhata na Isiraelita.

²⁴Vikana na Araha ki naka na suruheri hagahu henia ma ki kasia ki bâsuria na agua apuna i ruma ni rotu ma ki raha tangara na kariana, hanana vi ngaia ma na raraha iana ka mane ni vogasiha teha tare ki bê ki arâ.

²⁵Suria na suruheri henia o Tavite karena o Isai tenia na varo ninuni iana o Juta, na kare mane gi tage togo ma ki urusia o vaemana ki maneraha, ma suria na suruheri henia o Arone ngaira hato na raraha iana ka mane ni vogasiha.

²⁶Gu hagarahasia na Araha, suria ngaia ki koro ma ki kasigo akê ngavê. Ngaia ki haganahunigo renia na takoha mataha, hanana go surira na kariana igê na otoha, hanana ngaira ka akê me maninga tare igê na ramana ma ke rongo raha na atata tare ki bê ki arâ.