Read Kahua SIRAKE 46 Bible Online

SIRAKE 46 - Kahua bible

SIRAKE 46

¹O Josua karena o Nune ki na mane ni me ramo ma ki poropete urusia o Moise. Na girarana na atana ki vi: ‘Na Araha ni tahinga’. Ngaia ki hagamonaria na girarana na atana, suria i hagatahira na enoni God i atera. Tahema ki rongo raha na atana. Ngaia ki teharira na merongata na Isiraelita. Vikana ngaira ka girara ga ogasia na apanena iata.

²Ngaia ki hahanetaga, matena i tagarenigi akê na rimana ma ki bêngenira na mane ni me iana ka taharigi na hinua raha.

³I bara tani vige ura pusia, suria i râ igê na hearihatani igê na raramohana na Araha.

⁴Takusia aporo na matena i katoa na arito ki oga tonge ma na tangiana gi tage ki borahu manga vi na tangiani gi rua.

⁵Matena na merongana ka ogarihia ma ka taharia, ngaia ki avarasia na Araha raramohaga hunia. Na Araha raha hunia ki aganaria na avarasiha iana ma ki kasigi na hêni na rangi hurira.

⁶Na Araha ki hagarangisira renigi na hêni na rangi ma ki mutera igê na teha i Bete Gorone, hanana na apaneni nuni hato getigi ka tahetara, vi o Josua ki ramo teha ngavê, suria i mane ni me i toto suria na Araha.

⁷Matena o Moise ki tahitahi mênga, o Josua ki toto suria na Araha tare nogana. Ngaia mo Kalebe karena o Jepune karu ura pusia na haku hagenani iata na Isiraelita, karu hagamunira, vi siana ka bagahagagege, ma karu hagabarasira hanana siana ka tasitasi.

⁸Ngairerua getererua ma i berarogata na 600.000 na Isiraelita ga aharêvoro igê na bagamasusu raha kani garu tahitahi ma karu banu igê na agua na mako ango na Araha i bani surua vi haganahunira renia.

⁹Na Araha ki haganahunia o Kalebe renia na apekoroha ki ramo. Ma na matena i gemêa, ngaia ki ramoramo mênga, hanana i tagere igê na agua i huhunganiga ma ki henahuraua tangara ngaia ma na raraha iana.

¹⁰Vikana na Isiraelita hato ka girara ga tahetara, vi na tarana koro kaniga amake suria na Araha.

¹¹Hoi, ga oga nikâ na mane ni hagaotonga. Na ara ni hitangita ki rongo raha na atana igê na anina marena na tarana. Ngaira ka pe vogasira rârâ na ataro ma ka pe haritohea rârâ na Araha.

¹²Ge takusira ma ke hagahigasira tare. Ge mêri aporo tanga na mêriha haoru igê na ogaha iata na raraha iata ga hagahigasira.

¹³Na Araha ki takuia o Samuele. Ngaia ka na poropete iana na Araha. Ngaia kani monea na ani hagenago na maneraha renira na maneraha hato ga marungira na enoni.

¹⁴Ngaia ki surira na Isiraelita surigi na ramata iana na Araha ma na Araha ki anumasira.

¹⁵Suria o Samuele ki tamasi monari tare, tahema na enoni ka aganaria, vi ngaia ka na poropete monari. Na enoni ka tako togo renia, suria na tamasinga iana ka hagabângenia, vi ngaia ka na poropete monari.

¹⁶Matena na merongana ka ogarihia ka taharia, ngaia ki avarasia na Araha raramohaga hunia ma ki vogasia renia na karena sipi.

¹⁷Na Araha ki aganaria na avarasiha iana ma na gugusuhia raha tenia na vavearo ka mutera hato

¹⁸na merongana ngaira ma na maneraha ni Pilisitia.

¹⁹Matena o Samuele ki sugia ma vige meme, ngaia ki tamasi igê na monariha i materua na Araha ma na maneraha, ki vi, vi ngaia ki pe hanagoa rârâ ta na nahuninga iana ta na enoni, naka ma vi na santele iana ta na enoni. Ma ki mareha rârâ ta na enoni, vige visia, vi ngaia ki hagaparu.

²⁰I murina i me, ngaia ki tamasi poropete renia na tarana i page meme igê o Saulo na maneraha. Tenia na anoanona ngaia ki tamasi poropete, hanana i taruhigi râ na bagatauhata na enoni.