Read Kahua SIRAKE 47 Bible Online

SIRAKE 47 - Kahua bible

SIRAKE 47

¹I murina i me o Samuele, o Natane ki poropete igê na matena iana o Tavite.

²I tagenana ma manga ga nakagi vê na êbeni na vogasiha ni ngêhaku tanga na Araha, ka atea nikâ o Tavite i berarogata na Isiraelita.

³Ngaia ki merabare na laione ma na o vasiga manga vi ngaira ka na kareta na sipi se na kere goti.

⁴Matena i karekare mênga, ngaia ki nahuia ki me na mane ni me i borahu ma ki ramo ngavê. Ngaia ki hêsigogoa, ma ki hatungia na paroparoha iana o Goliate.

⁵Ngaia ki avarasia na Araha raramohaga hunia ma na Araha ki haganahunia renia na ramoha, hanana i nahuia ki me na mane ni me ramo ngekana, hanana na apaneni nuni hato getigi ka magutenigi na raramohata na kariana na Araha.

⁶Na enoni ka hagarahasia, suria i nahuira ka me na mani bera na mane ni me ma na matena ga kasia ki maneraha, ngaira ka hagarahasia, suria na Araha kani atea.

⁷Ngaia ki sinora na merongana hato henira na Pilisitina, hanana ngaira hato ki hato vige page hagamakukura nikâ.

⁸O Tavite ki visia koro ma ki hagarahasia na Araha raramohaga hunia i apuna ngavê igê na ara ni tarani hato i katogi. Ngaia ki takuia na Araha i hagavora ma ki kiki hagarahasia i mêrihana hagenani.

⁹Ngaia ki nakara na mane ni kiha hagarangia na bea ni vogasiha, hanana na hagarahenga ki akê me bâkoro ngavê.

¹⁰Ngaia ki nakagi na mateni tangagi na tangiani raha ni rotu i rarona na harisi ma ki katogi ka bâ hihigaga. Na ruma ni rotu ki tagitagi surigi na ara ni tangiani hagenani, suria na enoni ka hagarahasia igê na Araha.

¹¹Na Araha ki bonotenia na tasi iana o Tavite ma ki katoa na arahanga iana o Tavite ki oga hagahu. Ngaia ki naka na suruheri henia, hanana ngaia ma na raraha iana ka hahanetaga ka marungira na Isiraelita.

¹²O Tavite ki hagarêgi maninga na ara ni marâ tanga o Solomo o karena. O Solomo ki maneraha urusia ma ki tako mataha ngavê.

¹³Na hearihatana ki mareha rârâ igê na matena i maneraha suria o Solomo. God ki haganahunia renia na marapeha suria na agua hagenani i marungia. Vikana ngaia ki girara i tagarahia tanga na Araha na ruma ni rotu i gâga hagahu.

¹⁴O Solomo, matena go karekare mênga, igo ko takotako mataha ngavê. Na aitangisiha iamu ki manga na ve i Nile i maganu.

¹⁵Na aitangisiha iamu ki anuia na maveta hagenani. Na maramarêrava ma na hagahinga iamu ka râhigi na ara ni agua hato.

¹⁶Na tarohamu ki râhigi nogana. Na enoni ka takuigo, suria go hagavorea na marapeha.

¹⁷Na apaneni nuni hato getigi i maveta ka konetenigi na vivita, na maramarêrava ma na maramaraveta iamu ma na ramateniha iamu ga rongo mataha.

¹⁸Igê na raramohana na Araha God iata na Isiraelita igo ko rurugi haku na siliva ma na golo tanu manga vi ngaigi ka na kapa ma na poro ma.

¹⁹Henaka, ma igo ko vota, suria go meramêru na gete.

²⁰Igo ko hagaerasigi na atami igo ma na raraha iamu. Tahema na hagaitangiha ki tarahura renia na bekabekaniha iamu i hagamamasiagara ngavê.

²¹Na tarana ngekana ki voasia na agua go marungia, suria ta na maneraha i ura akê me i na apanena iana o Eparaimi. Vikana i Juta ma i Isiraele karu hepara tare.

²²Henaka, ma na Araha ki hetaki tare ma ki hagamonarigi tare na ara ni suruha hato iana. Ngaia ki asa vige mutera na raraha iana o Tavite, suria ngaia ki atea ma ki takuia. Hanana i hagatahia na varo ninuni iana o Isiraele, tahema ngaia ki pe nakara na raraha iana o Tavite ke anu râ.

²³O Solomo ki me ma ta na hitangita o karena ki maneraha urusia. Ngaia ka no Regabeama. Na aitangisiha iana ki kere hagarari ma na bekabekaniha iana ki raha ngavê. Na tarana na marungiha iana ki voasira na enoni. I na apanena iana o Eparaimi ki ura akê igê o Jerobeama. Ngaia ka no karena o Nebata. Ngaia ki hagatasira na enoni i na apanena i Eparaimi.

²⁴Na kariana ka bagatauhata ngavê. Tahema ga tarigenira hura tenia na apanena iata.

²⁵Ngaira ka katogi na ani mavê na eraha. Rârâ ma na Araha ki hagaitangira renigi.