Read Kahua SIRAKE 48 Bible Online

SIRAKE 48 - Kahua bible

SIRAKE 48

¹Hemuri ki ura kê o Elia. Ngaia ki na poropete ramo manga na anguruna na gi. Na tamasinga iana ka manga na taketakena na mangate.

²Ngaia ki katoa na magêha ki tarahura na enoni ma ka rako na enoni ga me, suria i ama ni ramoramo nga.

³Ngaia ki tamasi urusia na Araha ma ki mareha rârâ vige rangirangi suria kani ngaia. Hageoru ngaia ki unia vato na gi.

⁴O Elia, na mena go katogi ka hagakone teha ngavê. I mareha rârâ ta na enoni, vige ageagesigi na mena ngegana. O ti kani maratoramu?

⁵Igê na raramohana na Araha raramohaga hunia igo ko hagamêria aporo na mane i me.

⁶Igo ko hatungira na maneraha, suria go hagamaehagara ka me igê na banata.

⁷I Sinai igo ko rongogi na ramoniha iana na Araha i togeaga ki hagaitangira na merongana.

⁸Igo ko monera na mane ka maneraha, hanana ga hagaitangira na merongana. Igo ko monea ta na mane ki poropete urusigo.

⁹Igo ko akê i vavearo igê na bagamaguara raha igê na kati ga okea na hosi na gi.

¹⁰Na buka apuna ki visia, vi igo ko nanê, hanana go aporo me igê na matena tanga, hanana go hagamauga na mangariaganiha iana God, i era ma ki raboa manga na anguruna na gi; hanana go katora o vahemata hegitigi ka hekorokoro aporo ma na varo ninuni iana o Isiraele ka aporo me manga i nago.

¹¹Ga babarisi na enoni ga mauri togâna na aporoha me iamu. I tagenana ma tangara na ani ga bani me. Ma igo ko babarisi teharira, suria go mauri.

¹²Matena o Elia ki magahuru igê na maguara, na raramohana ki angaria o Elisa. Matena i gâga mênga, ngaia ki pe magutenira rârâ na enoni ga nahuni ramoha, ma ki bara tangara vige tuguria, ke katogi na tarani ga obanigi.

¹³I pe bara rârâ ta na marâ tanga. Henaka i me, ma na apena ki tamasi poropete mênga.

¹⁴Henaka i mauri mênga se i me ma ngaia ki katogi na mena ni hagakoneha.

¹⁵Ma ki henaka vikana, ma na enoni ka pe kasigi râ na bagatauhata mataro me ka henahuraura tenia i pasita ma ka tokorenira suria na maveta hagenani. Na kere haku sisite ma kani hita so. Henaka vikana, ma na raraha iana o Tavite ka marungira mênga na ani ga hita so.

¹⁶Tani ka hagakoro obana na Araha ma tani ka ama ni tasitasi nga.

¹⁷O Hisikia ki hagagatagatania na hinua raha i Jerusaleme. Ngaia ki taregi me na ve tanga na hinua. Renigi na vato na aiani ngaia ki karua na tarâto tanga na ve igê na hêmeo ma ki tagarahigi na agua ga nonganonga igê na ve.

¹⁸Matena o Senageribi ki maneraha, ngaia ki taharia na hinua. Ngaia ki hagatorangenia na ruata me tanga tenia i Lakisi. Na mane ngekana ki hagaramo tanga i Jerusaleme ma ki tamasi paroparo ki erasia God.

¹⁹Na enoni ka bagahagêguri, ka tata ma ka bubununuga. Ngaira ka mamasiaga manga na gete i harate kare.

²⁰Ngaira ka avarasia na Araha ni hetakiha ma na Araha apuna ki hatani aganaria na avarasiha iata. Ngaia ki hagatorangenia o Isaia ki hagatahira.

²¹Na Araha ki taharia na tênga iata na me ni Asiria ma na angero iana ki sinora.

²²O Hisikia ki hagakoro obana na Araha ma ki togeaga ki amake suria o Tavite na êvarina. Nga na tarana na poropete raha o Isaia i bonasia re ngekana,

²³Ngaia ki katoa na arito ki guru ki aporo ma ki hagaborahusia na mêrihana na maneraha.

²⁴Ngaia ki hagamanapura na enoni i Jerusaleme suria ga angiangi maramara. Igê na mangatana ramo ngaia ki bani bâsigi râ na marâ ga page akê me mave i hemuri.

²⁵Ngaia ki bani visigi mataha na marâ ga page akê me, naka ma i hemuri agana, na marâ pinihi ga mamênga vige akê me.