Read Kahua SIRAKE 49 Bible Online

SIRAKE 49 - Kahua bible

SIRAKE 49

¹Na takoha aporo renia o Josia ki mamaki manga na marâ ni sungiha i sigini koro i toraria na ani i manisingenia; ki mamaki manga na pirui i harana na enoni se ki manga na kiha henigi na vaini igê na magotoha.

²Ngaia ki katogi na tarani koro, suria i hagakorogi aporo na tauhata na enoni ma ki hatungia na vogasiha ni ataro.

³Ngaia ki toto suria ngavê na Araha ma ki hagagatagatania na rotu monari igê na mateni ni aeraha ngegana.

⁴Na ara ni maneraha hato ka bagatauhata ngavê, suria ga aharêngigi na ramata iana na Araha raramohaga hunia mataro me na muritagana na maneraha, nga noga ma o Tavite, o Hisikia mo Josia.

⁵Na mamahuara ka nahunigi tenira na ramoha ma na bâhahanetaganiha iata

⁶ma ka sungia na hinua apuna, ma na tara i hinua ka bagubaguruga, manga o Jeremia i bani visia.

⁷Na ai ni Jerusaleme ka katoa bera o Jeremia, henaka vi God ki bani atea ki poropete i nago tarana i vora me, ‘hanana i pirigi akê ma ki okegi vato, hanana i hogegi ma ki horogi, hanana i hagêrasigi aporo ma ki hasihasi.’

⁸Na Araha ki hagamarutea o Esekiele renia na bâbâhana raha igê na kati iata na angero.

⁹O Esekiele ki hagatakusira na enoni renia na poropete o Jobe, i katogi tare na tarani ga oto i maana God.

¹⁰Na surita na poropete tangahuru matarerua ke mêri aporo, suria na mane ngegana ka nganganihaga igê na tongesuriha, ka kanukanura na Isiraelita ma ka hagatahira.

¹¹Manga i he kaniga girara viga hagarahasia o Serubabele? Ngaia ki manga na ringi na ata igê na otona rimana na Araha.

¹²O Josua karena o Josataka ki manga ngekana nogana. Ngairerua karu tagarahia aporo na ruma ni rotu apuna iana na Araha, hanana na ruma ni rotu ki rongo raha hagahu na atana.

¹³Na takusiha aporo renia o Nehemia ki tagenana vikana nikâ. Ngaia ki tagarahigi aporo na para ni hinua i Jerusaleme ga ahogehoge henigi na maani para henigi na raburini ma henigi na ruma iata na enoni.

¹⁴I mareha rârâ ta na enoni i maveta vige maratorana o Enoke, suria God ki torea akê tenia na maveta.

¹⁵I mareha rârâ ta na enoni i vora me i maveta vige maratorana o Josepo. Ngaia ki raha tangara o veogana ma ki tamanira na kariana ga hagahigasigi na surina. Na enoni ka hagahigasira ngavê o Seme, o Seti mo Enosi.

¹⁶Ma na ani ga hagahigasia teha ngavê ngaia ka no Atama.