Read Kahua SIRAKE 50 Bible Online

SIRAKE 50 - Kahua bible

SIRAKE 50

¹O Simone karena o Oniasi ka na mane ni vogasiha i teha. Igê na matena iana ngaira ka surungia na ruma ni rotu ma ka hagagatagatania aporo na apena na ruma ni rotu.

²Ngaira ka tagarahia aporo na para i rihia na ruma ni rotu henigi na bebetehe igê hagarangia na ruma raha iana na maneraha.

³Igê na matena iana ngaira ka karua na agua tanga i nonganonga igê na ve. Ngaia ki raha manga na bagamaraguhu raha na kapa higa.

⁴Ngaia ki pararihia gatagata na hinua. Ngaia ki kato vikana hanana i anumasira na kariana tenira na merongata matena ga gâga rihia.

⁵Ngaia ki bâ hahanetaga ngavê, matena i hura me tenia na kiboru i apuna teha ngavê.

⁶Ngaia ki manga na higu ni tangi i take me i berarogani na vaha, se i manga na hageha i hagenani igê na tangiana raha,

⁷se i manga na arito i takiria na ruma raha iana na maneraha, se i manga na rorovagaro i mave igê na vaha,

⁸se i mangagi na takataka memera igê na matena ni hagahisi, se i mangagi na takataka siki hagarangia na ve, se i mangagi na hata i Lebanone igê na matena ni arito,

⁹se i manga na marâ ni sungiha i sigini koro, se i manga na kâkâ na golo na mane ni manisingenia i tagarahia ma ki hagamahea renigi na hê hehegitigi ga raha na meni,

¹⁰se i manga na apinige ni olive i rasirasi ngavê, se i manga na apinige i borahu ngavê ki tarahugi akê na vaha.

¹¹Matena o Simone ki tuguni renia na tuguni bâkoro ngavê ma ki akê tanga na bea apuna ni vogasiha henia na tuguni ni bâbâhana raha ngavê, ngaia ki katoa na beraro i ruma ni rotu ki bâ hahanetaga ngavê.

¹²Matena na mane ni vogasiha ka tagarenigi na ganiani ni vogasiha tanga o Simone i ura hagarangia na gi igê na bea henira na tamana ga ura mangagi na mahe rihia, ngaia ki bâ manga na apena koro era na hata i Libanone henigi na geara rihia.

¹³Ngaira ngegana ka na raraha iana o Arone ga tuguni bâkoro ngavê, ma ka ura i maata na hakuta hagenani na Isiraelita ma ka têgi i rimata na ganiani, i susu renigi tanga na Araha.

¹⁴Matena i hagarêa hato na bea ni vogasiha ma ki bani nakagi igê na ganiani, i susu tanga na Araha raha ma raramohaga hunia renigi,

¹⁵ngaia ki tagara râ ki têa na kâkâ i vunu renia na vaini mamaki ma ki karangia igê na hunana na bea ni vogasiha manga na vogasiha tanga na Araha raha teha i marungigi na ara ni marâ hato.

¹⁶Hemuri na mane ni vogasiha ka ngere ma ka uhigi na ahuri na siliva. Ngaira ka ngerengere raha, hanana vi rongorongo na Araha raramohaga hunia.

¹⁷Na enoni hato ka parama ma ka susure ma ka tubê so ka puru i ano na raeta, hanana ga rahesia na Araha raha teha ma raramohaga hunia.

¹⁸Hemuri na enoni ni kiha ka haganega ka ki ka hagarahasia na Araha ma na kiha iata ki rongo koro ngavê.

¹⁹Na enoni ka ama ni avarasia nga na Araha raramohaga hunia ni takiha mataro me ki hato na hagarahenga.

²⁰Hemuri o Simone ki so me pania na bea ni vogasiha, ki gasigi na rimana huria na hakuta hagenani na Isiraelita ma ki hagapura urusia na Araha.

²¹Matena na enoni ka susure ka tubê so nikâ i ano, hanana vi ga rahesia na Araha raramohaga hunia, ma na korohana ki aharêsira.

²²Hoi, ge hagarahasia God na Araha iata na ara ni marâ hato, i katogi na tagaraha raha i na ara ni agua hato, ki marupegi tare tenia na matena ga vora me igê ma ki hagatogo surigia suria i hetaki.

²³Ngaia ke haganahunigia igia na Isiraelita renigi na vagevageha, na marapeha ma na ramana.

²⁴Ngaia ke ama ni takuigia nga ma ke hagatahigia igê na mateni ga barabara tangagia.

²⁵Na apaneni nuni gi rua gê kitenira ngavê ma na oruta ki erataga ngavê ma ki pe araria vige visia na apaneni nuni.

²⁶Ngaira ka na ai ni Etome, na Pilisitina ma na ai ni Samaria ga bono bê ngavê.

²⁷Inê, o Jesu karena o Siraga Eleasare i Jerusaleme, inê kê segegi so igê na buka ikê na takoha mataha ma na aitangisiha iaku, hanana gê hagesurira na enoni getera.

²⁸God ke koro tangara na ani mavê na enoni ga hagesuringenigi. Na ani ga arâ surigi maninga ka page nahunia takoha mataha.

²⁹Na ani ga marupegi ka page tehateha henaka vi na ta ka tarahura, suria ga hagahigasia na Araha, i mavesigi na aitangihata ma ki bêngenira.