Read Kahua SIRAKE 51 Bible Online

SIRAKE 51 - Kahua bible

SIRAKE 51

¹Inê be visigo koro, igo na Araha ma na maneraha iaku. Inê be hagarahasigo, igo na God ma na Hagamauri iaku. Inê be visia raha na atamu,

²suria igo ko tamaniê ma ko anumasiê. Igo ko hagatahiê tenia na mera tenigi na etu iata na enoni ga hagaparu reniê ma ka hagatoraiê.

³Matena na enoni ka merongasiê, igo ko ngahisiê. Suria i raha teha na hetakiha iamu tahema igo ko hagatahiê tenira na ani ga gamorahiê manga na laione tenigi na rimata na ani ga merongasiê vigê meme, tenigi na manibagabevoani ga tarahuê,

⁴tenia na robona na gi i hagaboeê, tenia na gupuna na gi gê pe tanga inê,

⁵tenia na agua iata na ani ga bani me, tenigi na hagatorainga reniê tanga na maneraha.

⁶Ta na tangiana gê haga ni me ma kê aporo i maana na kiru.

⁷Na merongaku ka rihuiê. I mareha rârâ ta na enoni vige tamaniê. Inê kê bâbâ ma ki mareha.

⁸Hoi, Araha, ma inê kê takusigi na hetakiha iamu ma na tauhamu koro ga bani oga me kerevê noga. Inê kê takusigo, go tamanira na ani ga hagêguritogo renigo ma ko hagatahira tenigi na rimata na merongata.

⁹Tahema, matena gê haga ni me, inê kê avarasigo, hanana vi go hagatahiê tenia na mera.

¹⁰Inê kê avarasigo, Araha, kê vi: “Igo ka no vaemaku. Siana ko rumakaka reniê igê na bagabevoani ngegê, matena na merongaku paroparo ka hagamamasiagê ngavê. Inê gitageku ma, ma ki bara tangê.

¹¹Inê be hagarahasigo tare ma be ki be visigo koro.” Igo ko aganaria na avarasiha iaku,

¹²ma ko hagatahiê tenia na perenga ni mera, tenia na matena ni eraha. Tahema inê kê visigo koro ma kê hagarahasigo. Araha, inê kê visia raha na atamu.

¹³Matena gê karekare mênga ma kê mamênga vi ve arâhigi na agua getigi, inê kê nungia ototo râ nga God renia na takoha mataha.

¹⁴I ruma ni rotu inê kê nungia God renia ma kê ama ni rapasia nga na takoha mataha igê na ogaha iaku hagenani.

¹⁵Inê kê vagevagesia na takoha mataha, matena i raharaha manga na guana na apinige, i haganega tenia na takana mataro me ki matamata. Inê kê harisuria tare, haganega me tenia na matena gê karekare mênga.

¹⁶Haganega tenia na matena gê karinga na takoha mataha, ngaia ki hagesuriê ma ki haganahuniê renia na aitangisiha raha.

¹⁷Suria ngaia tahema na aitangisiha iaku ki ama ni akê me nga. Inê be hagarahasia nga na ani i hagesuriê.

¹⁸Inê kê togeaga kê hagaotoa nga tare na ogaha iaku suria na takoha mataha. Inê kê uhungia tare kê katogi na tarani ga koro ma ki asa vi ve page maki renia.

¹⁹Inê kê rapasia nga na takoha mataha ma kê marupegi maninga na ramata. Matena gê nunginungi, inê kê tangahuriê, suria gê pe nahuni takoha mataha maninga.

²⁰Henaka, ma inê kê ama ni rapasia nga ma kê tarahua, suria gê hinarugi na tasi. Haganega me tenia na matena gê tarahua moramora igê, na aitangisiha iaku ki ama ni raharaha nga. Tahema inê ki asa vi ve rumakaka renia.

²¹Suria gê tangasia ngavê, tahema inê kê garia. Vikana inê kê babarisi ngavê renia.

²²Tahema na Araha ki vuriê bâkoro, suria i katoê kê girara bâkoro manga ko hanana gê tamasi. Tahema inê kê page hagarahasia tare renia ngaia na meaku.

²³Igamu hato mu bono bê, mu râ me i pasiku ma kamu banu igê na ruma ni hagesuri iaku.

²⁴Tanu hega kanigamu hagagege vi igamu kamu bono bê ma kamu nakagi na aitangihami ka ama ni magê nga?

²⁵Inê kê vi vikê: Rapasia nga na takoha mataha. I mareha vigamu garigari haga tanga ngekana.

²⁶Mu totora gapara renia na takoha mataha ma kamu aganaria nga na hagesuringa iana. Ngaia ki hagarangi so ma. I mareha vigamu arisia.

²⁷Mu girara mu bâsiê re maami maremi, vi inê kê pe hagesuri bâraha ngavê ma na aitangihaku ki togo.

²⁸Henaka i kere bara vari tangagamu, mu banu igê na hagesuri, hanana mu page nahunia na marâ koro teha ngavê mangani rako na siliva ma na golo.

²⁹Mu ageagesia na takiha iana na Araha ma kamu visia koro renia. Siana kamu maki vigamu hagarahasia.

³⁰Mu tanugi na tagaraha iami igê na matena tange ma na Araha ki page vurigamu igê na matena ngaia i takusia.