Read Kahua SIRAKE 6 Bible Online

SIRAKE 6 - Kahua bible

SIRAKE 6

¹Siana ko voravora re na merongana na tamamu koro. Na enoni tasi i matanga na meana ki rongo era na atana ki hagamakia marena ki apeaperuruhi.

²Siana ka angarigo na teniha iamu, suria ngaigi ka girara ga heoke tenia na aitangihamu manga na puruka mane.

³Igo ko page manga na apinige i maria, i mareha na ahani ma na guani.

⁴Na teniha era ki page hagaratemu ma ki page nakara na merongamu ka megomarabe.

⁵Manga go tamasi haritagi ma ko pe tamasi bêrahaga, na enoni ka agana, hanana ga manatangenigo ma igo ko page ageagesira.

⁶Go nakara rako na enoni ka manatangenigo ma ko atea na veretage togo i berarogata na rehagaro hanana i hagaotogo.

⁷Manga go obania vigo hemanatange, ki tuguhigo vigo uhungia hagenago. Siana ko hatani hagêguritogo renia.

⁸Tani na enoni ka manatangenigo, suria ma ga obania ta na marâ tenigo, ma na matena i tarahugo na mamasiaganiha, hoi, ngaira ki asa vige tamanigo igo.

⁹Ma tani nikâ na tamamu koro ka voravora re ne merongamu renia ta na hetuguriha, ma ka hagamakigo, suria ga tarohenia mave.

¹⁰Tani ka manatangenigo ma ka megobêrihu ma na matena i tarahugo na mamasiaganiha, ngaira ka kasikasi renigo.

¹¹Matena ga arâ bâkoro na ara ni marâ tangago, ngaira ka ngahisigo manga na nunumu ma ka bonasira na kariamu.

¹²Ma na matena i tarahugo na mamasiaganiha, ngaira ka kasikasi renigo, ka masesi tenigo ma ka merongasigo.

¹³Go masesi tenira na merongamu ma ko hinarura na ani ga manatangenigo.

¹⁴Na enoni i manatangenigo monari, ki manga na bêata nganganihaga tangago. Manga go nahunia tani, e, igo ko nahunia na ruruguha monari.

¹⁵I mareha rârâ ta na marâ vige maratorana. Na mena ki bara vige hagararingenia.

¹⁶Na enoni i manatangenigo monari ki na marâ i haganahunigo renigi na apekoroha ma na mêriha mora. Na enoni ga hagahigasia na Araha ngaira ma kaniga page tarahua.

¹⁷Na enoni i hagahigasia na Araha ki girara i manatangenia monari na tamana, suria na tamana ki maratorana ngaia.

¹⁸Kakare, haganega tenia na matena go sisite mênga go aganaria na takoha mataha. Vikana igo ko ama ni tarahua nga matena go gohogohoraga.

¹⁹Go maratorana nga na enoni i hikiru ma ki hasihasi hanana i page nahunigi na ngêra. Vikana go tagara raha nga, hanana go tarahua na takoha mataha. Igo nogamu ko tagara hagenago ma hemuri ko kahu ageagesigi na guani na takoha mataha.

²⁰Na enoni ga usitenigi na hagaotonga, na takoha mataha ki bara tangara, suria ga marusi vige râ surigi na ramata iana.

²¹Ngaigi ki higera manga na hê i higa. Ki page arihu ma na enoni bonobonoga ngegana ka kasigi râ, suria ga usitenigi.

²²Na takoha mataha ka na takoha mataha ma ki hagatêrira rako na enoni, suria ga usi vige hagaotora so mareta.

²³Kakare, go karingê ma ko aganarigi na hagaotonga iaku tangago. Siana ko usitenigi na aitangisiha iaku.

²⁴Go barorerua na êgamu renigi na varo ni takoha mataha. Go tarasia na riomu igê na varo iana.

²⁵Go totora gapararenia. Siana ko usisi tenigi na varo iana.

²⁶Go gunahia na takoha mataha i mêrihamu hagenani ma ko togeaga ko arâ surigi nga na tauhana.

²⁷Go garia ma ko page tarahua. Go ranguia gatagata ma siana ko herehere kasia.

²⁸Vikana ki page togotogo na aitangihamu i pasina ma ngaia ki page hagakoro obamu.

²⁹Vikana na varo iana igê na êgamu ka voravora re na engahi nganganihaga iamu ma na varo iana i riomu ka voravora re na mahemu bâkoro.

³⁰Na totora i riomu ki manga na mahe na golo. Na varo iana ka mangagi na mahe rotorotoaga memera tangago.

³¹Na takoha mataha ki manga na tuguni bâkoro iamu, manga na tarepuri na vegevageha i bêmu.

³²Kakare, manga go obania, igo ko girara go hagesuri. Manga go gunahia, igo ko page vora re na enoni ni takoha mataha.

³³Manga go agana ko karinga, igo ko hagesuri ma ko page nahuni aitangisiha.

³⁴Go hakunira na bani nuni. Manga go tarahua i berarogata na ani i tako mataha monari, go gâga nga henia.

³⁵Go karingagi maninga na tamasinga renia na rotu. Siana ko tihigi na tamasinga ni aitangisiha.

³⁶Manga go tarahua na enoni ni aitangisiha, go riteritehia ko vatugia. Go maoa na maani ruma iana.

³⁷Go takotako renigi tare na ramata iana na Araha ma ko barisurigi. Ngaia ki page mavesia na aitangihamu renigi na aitangisiha ma na takoha mataha go gunahigi.