Read Kahua SIRAKE 7 Bible Online

SIRAKE 7 - Kahua bible

SIRAKE 7

¹Siana ko katogi na eraha ma na eraha ki asa vige page tarahugo.

²Go susu pane tenia na eraha ma na eraha ki susu pane tenigo.

³Siana ko hasihasi na eraha i era ma na harisi ni eraha ke aharêsigo.

⁴Siana ko nungia na Araha renia vigu nahuni ramoha. Siana ko nungia na maneraha renia vigu gâga igê na tagaraha raha.

⁵Siana ko kasigo akê maremu i maana na Araha, vi igo ka na enoni koro, se go kasigo akê maremu i maana na maneraha, vi igo ka na enoni ni aitangisiha.

⁶Siana ko gunahia vigu enoni ni hagatamasinga, suria vari igo ko magu vigu hagaotoa na eraha. Vari igo ko magutenia na enoni i nahuni ramoha, tahema go panepane henia. Vikana igo ko votavota igê na tagaraha iamu.

⁷Siana ko katoa na eraha ki tarêhira na enoni hato. Siana ko hagamakigo maremu i maata.

⁸Na tasi gi tage siana ko katoa hagerua, suria na hagaitangiha i bani tarahugo i nago, ki araria ma vige uhu.

⁹Siana ko vi: ‘God raramohaga hunia ki takusigi na votovoto rako iaku tanga. Vikana ki tuguhia vi aganaria na vogasiha iaku.’

¹⁰Go nunginungi tare ma ko mahata tare tangara na enoni matareha.

¹¹Siana ko rurusia na ani i aperuruhi, suria na Araha ki kasia so na enoni ma ki kasia akê nikâ.

¹²Siana ko hagaparu renira na goamu se na tamamu.

¹³Siana hagetage ko hagaparu. I asa ngavê ta na marâ koro vige vora me tenia.

¹⁴Matena na enoni raha ka hekarigi, siana ko atani tamasi mavê. Matena go nunginungi, siana ko baua akê na agua gi tage.

¹⁵Siana ko makumakusiga renigi na tagaraha raha se na tagaraha i mu, suria God raramohaga hunia ki hagatagarahigia renigi.

¹⁶Siana ko tare surira na enoni tasi, suria na hagaitangiha tenia na Araha ki pe kakaviaga.

¹⁷Go haritagi nga, suria na gi ma na mama ka tangara na enoni tasi.

¹⁸Siana ko rumakaka renia na tamamu, suria ma go nahuni haga i apena. Siana ko rumakaka renia maharamu, henaka viga vatego renigi rako na golo taranini.

¹⁹Go auragia nga na gete kari i nahuni takoha mataha, suria na tauhana ki bâkoro teharia na golo.

²⁰Siana ko katoa bera na kariamu i tagara bâkoro, se na enoni tagara i tagara raha tangago.

²¹Go takuia na kare rakuraku iamu i mêrihamu hagenani ma ko naka vê ki asitatara.

²²Manga go nahunira na togoha, go bâbâsurira maninga. Manga ga hagavaraha haga tangago, go mengira nga.

²³Manga go nahunira o karemu, go hagesurira. Go hagaotora matena ga karekare.

²⁴Manga go nahunira ka karemu, go anumasira ka voravora re na gete koro ma siana ko tenira so go apeape surira hete.

²⁵Matena go hagauragingenia ka karemu, igo ko bani tagara bâkoro me ngavê. Go hagauragingenia henia na mane i nahuni takoha maninga.

²⁶Manga go nahunia na gete i râ igê na aitangihamu, siana ko kasia. Ma ki manga go pe takuia na gete, siana ko hagêguria.

²⁷Go hagahigasia o vaemamu i mêrihamu hagenani ma ko takusia tare na mamasiaganiha iana kenamu matena i hara renigo ki aparago.

²⁸Takusia vi ngairerua kani garu vatego renia na mêriha. Manga i he kanigo girara vigo barugi aporo na tagaraha hato iaterua tangago?

²⁹Go hagahigasia na Araha i mêrihamu hagenani ma ko hanetasira na mane ni hagarahenga iana.

³⁰Go takuia i mêrihamu hagenani God i hagavorago ma ko tamanira na ani ga tagara tanga.

³¹Go magutenia na Araha ma ko hagahigasira na mane ni vogasiha iana. Go vatera renigi na marâ i bonasigo na ramata renigi: na nagoni na mu ma na togoha iamu, na vogasiha ni bonoteniha ni tasi, na gaparata na ganiani go vogasi re ma na ani getigi hato na vogasiha ma na votovoto tanga na Araha.

³²Go mahata tangara na enoni matareha ma na korohana na Araha ki page aharêsigo igo.

³³Go mahata tangara na enoni hato ga mauri ma ko korokoro nikâ tangara na ani ga bani me.

³⁴Go obâbarugu henira na ani ga oga igê na memeta. Go angiangi henira na akêkuha.

³⁵Siana ko makumakusiga vigu bâsira na ani ga maeha. Vikana na enoni ka page takuigo.

³⁶Henaka na ani mavê na tarani go katogi, go takusia tare, vi igo ko page meme i ta na tangiana. Vikana igo ki asa vigu tasi.