Read Kahua SIRAKE 8 Bible Online

SIRAKE 8 - Kahua bible

SIRAKE 8

¹Siana ko mehetuguri na mane i nahuni ramoha, i era ma ko vota i rimana.

²Siana ko hekorekore henia na mane ruruguha, i era ma ki vatevatera na enoni ka merongasigo. Na golo ki hagavotarira rako na enoni ma ki hagatasira na maneraha.

³Siana ko mehetuguri na enoni i nahunahu tamasinga tare. Vikana igo ko ama ni raria nga na gi.

⁴Siana ko memarabe na ani i atani ataka mavê, i era ma ki tamasi erasia na êvarimu.

⁵Siana ko ama ni ramunia nga na ani i murisigea noga na tasi iana. Go girara na hagaitangiha ki ararigia igia hato.

⁶Siana ko ruhia na ani i gemêa, suria tani na hitangika ka page gemêa nogaka.

⁷Siana ko manavatenia na enoni, suria vi ngaia ki me. Go girara, vi igia hato ka page me.

⁸Go botage renigi na tamasinga iata na enoni ni takoha mataha. Go hagesuringenigi na tamasinga ni takoha mataha iata. Igo ko girara go totora tenira na aitangisiha, hanana go tagara tangara na ani ga oga igê na tagaraha raha.

⁹Go karingara maninga na enoni ga gemêa, suria ga tora giraraha tenira na êvarita. Igo ko girara go hagesuri tenira, hanana go nahuni aramiha igê na matena tange.

¹⁰Na teniha iana na enoni tasi ki manga na gi. Siana ko raria, i era ma ko tihu igê.

¹¹Siana ko bekabeka suria na ani i pe maki vige megomarabe. Go piringiape ma, i era ma ki ririgi na tamasinga iamu ma ki hagaratemu renigi.

¹²Siana ko naka na ani i nahuni ramoha tenigo ki torea noga tenigo ta na marâ. Go girara, manga go katoa vikana, ngaia ki arâ su tenigo.

¹³Siana ko surusuru, vigo barua na hagaba iana ta na enoni, manga vi bara tangago vigu barua. Go girara ototo nga vi tuguhigo go barua.

¹⁴Siana ko torea igê na tamasinga na mane ni suriha, suria ngaia ki page teharigo, suria ma i mane ni hagatamasinga.

¹⁵Siana ko takua na ani i pe hinahinaru, i era ma ki tarahugo na perenga raha. Ngaia ki râ suri barisuna, henaka i arâ bekabekaga, ma igo ko meme henia.

¹⁶Siana ko mehetuguri na ani i bagamangamangariaga se go takua igê na agua i hihiruga, suria na nahuta ni nuni ka na marâ purua ma tanga. Ngaia ki nahuigo ko meme i ngekana, suria i mareha rârâ igê na enoni hanana vige tamanigo.

¹⁷Siana ko hagate taramu i pasina na enoni i bonobonoga, suria i asa vige pinihigi so na tamasinga iamu tanga.

¹⁸Siana ko katoa mave i maata na mahuara na marâ i araria vi pinihi, suria igo ko pe girara na ta ki page akê me.

¹⁹Siana ko tamasigi mave na marâ ga pinihi igê na aitangihamu, hanana ga korokoro tangago, i era ma ko hagaratemu maremu.