Read Kahua SIRAKE 9 Bible Online

SIRAKE 9 - Kahua bible

SIRAKE 9

¹Siana ko ngaria na gete iamu go takuia. Siana ko hagesuria ki aera tangago.

²Siana ko nakago maremu ngavê i rimana na gete, i era ma ki raha tangago.

³Siana ko karihira na êrâ, i era ma ko tu igê na etu iata.

⁴Siana ko hakunira na gete ni kiha, i era ma ka uhungigo ko vota.

⁵Siana ko boretenia bâraha na kare viru, i era ma ka hagaturigo renia.

⁶Siana na êrâ ka bêbanu igê na aitangihamu, i era ma ko tê tara renigi na nahuninga hato iamu.

⁷Siana ko bâbâ rârâ i hinua se go arârâ ma igê na agua i hinua na enoni ka magu vige arâ igê.

⁸Matena go bâsia na gete i bâkoro, siana ko boretenia. Siana ki tâtâ i na aitangihamu na bâkorohana na gete iana na mane getea. Na bâkorohana na gete ki hagatasira rako na mane. Ngaia ki raria na teniha manga na gi.

⁹Siana ko gâga ngahisia na gete êragi se go mebêrihu se go metono, i era ma ki banu i na aitangihamu ma ko hagaratemu maremu.

¹⁰Siana ko kasikasi renia mabaniharamu suria i asa vigu tarahua na urusina vige koro manga ngaia. Maharamu haoru ki manga na vaini haoru. Na vaini ki koro teha ngavê, matena i êvariga.

¹¹Siana ko hengaria na enoni tasi, suria vi akê me bâkoro igê na ogaha iana. Igo ko pe girara vi na ani ta na bagabevoana ki oga tanga.

¹²Siana ko ageagesigi na marâ na enoni tasi ga ageagesigi, suria ngaira ka erataga ma na hagaitangiha ki page tarahura, henaka matena ga meme.

¹³Go sususu pane tenia na mane i nahuni ramoha, hanana vi nahuigo ko meme. Vikana igo ki asa vigu meanumanuma na mêrihamu. Ma ki manga go karikari hagarangia, go girara, i era ma ki nahuigo ko me. Go girara, vi igo ko arârâ i berarogani na etu ga tâ pinihi ma ko mataku tange na mage.

¹⁴Go girarara bâkoro nga na enoni i pasimu ma ko hagate taramu tenira ma na mane ni aitangisiha.

¹⁵Go meratamasi na mane ni takoha mataha ma kamu tamasi renigi nga na ramata iana God, na Araha raramohaga hunia.

¹⁶Go merabêrihu na mane ga koro ma ka oto i maana God ma ko ageagesia ngavê na hagahigasiana na Araha.

¹⁷Na enoni ka konetenigi na marâ i tagarahigi na mane i manisingenigi ngavê vi tagarahigi. Na tamasinga iana na maneraha ka hagabângenia vi ngaia ka na enoni ni takoha mataha.

¹⁸Na enoni ni hinua ka magutenia na ani i toratora tamasinga ma ka usitenia na ani i tamasi tararu.